Mantultuloy a Manakar ed Dalan nen Jehova
“Manalagar ka ed Jehova, tan tonton mo so dalan to, et itandoro to ka a manawir na dalin.”—SALMO 37:34.
1, 2. Anto so lalanoren na panakar ed dalan nen Jehova parad si Arin David, tan anto so kakaukolanen na satan ed sikatayo natan?
“IPAANTAM ed siak so dalan a nepeg ko a dalanan; ta itangay ko so kamarerwak ed sika.” (Salmo 143:8) Sigpot-puson uulit-uliten na saray Kristiano natan iratan a salita nen Arin David. Masimsimoon dan papaliketen si Jehova tan manaakar ira ed dalan to. Antoy lalanoren na saya? Parad si David, mankabaliksan itan na pananumpal ed ganggan na Dios. Saglawien na satan so panagmatalek ed si Jehova imbes a mialyansa ed saray nasyon. On, tan kabaliksan toy matoor a panaglingkor ed si Jehova, aliwan ed dirios na kakaabay a totoo. Parad saray Kristiano, wala ni lalanoren na say panakar ed dalan nen Jehova.
2 Diad sakey a bengatla, say panakar ed dalan nen Jehova natan so mankabaliksan na pangagamil na pananisia ed dondon bagat nen Jesu-Kristo, a sikatoy bidbiren tayo bilang “[say] dalan, tan say katuaan, tan say bilay.” (Juan 3:16; 14:6; Hebreos 5:9) Mankabaliksan met itan na panumpal ed “ganggan nen Kristo,” a mangilaktip ed panangipanengneng na aro ed balang sakey, nagkalalo la ed saray alanaan ya agagi nen Jesus. (Galacia 6:2; Mateo 25:34-40) Saramay manaakar ed dalan nen Jehova so mangaaro ed saray prinsipyo tan ganggan to. (Salmo 119:97; Uliran 4:5, 6) Papablien da so mablin pribilihyo ran pibibiang ed Kristianon ministeryo. (Colosas 4:17; 2 Timoteo 4:5) Say pikakasi so regular a kabiangan na bilay da. (Roma 12:12) Tan ‘manaakar ira ya atekepan na panaglikas, aliwan singa andi-kalakal, noag ingen singa makalakal.’ (Efeso 5:15) Maseguron agda isakripisyo iray espiritual a kayamanan parad temporaryon materyal iran gungguna odino agmanepeg a likeliket na laman. (Mateo 6:19, 20; 1 Juan 2:15-17) Niarum ni, siansian makana so katooran ed si Jehova tan panagmatalek ed sikato. (2 Corinto 1:9; 10:5; Efeso 4:24) Akin? Lapud say kipapasen tayo et mipadpara ed panaon na kadaanan ya Israel.
Say Pankaukolan Parad Panagmatalek tan Katooran
3. Akin a makatulong ed sikatayo so katooran, pananisia, tan panagmatalek pian makapansiansia itayon manakar ed dalan nen Jehova?
3 Say Israel so melag a nasyon ya aliber na agmakaaron kakaabay a mibibiang ed imoral iran seremonya diad panagdayew ed saray talintaon dirios. (1 Awaran 16:26) Say Israel lambengat so nanlingkor ed saksakey a tua tan agnanengneng a Dios, si Jehova, tan kinaukolan ton mantinien da iray atagey ya estandarte ed moral. (Deuteronomio 6:4) Mipadpara natan, wala labat so pigaran milyon a totoon mandadayew ed si Jehova, tan manbibilay ira ed mundon walaay ngalngali anemiran bilyon a totoon midumaan a maong ed sikara iray estandarte tan relihyoson panmoria ra. No kabiangan itayo ed saramay pigaran milyon, nepeg a manbantay itayon sumpad pakaimpluensia ed makapuy a dalan. Panon? Makatulong so panmatoor ed si Jehova a Dios, pananisia ed sikato, tan mapekder a panagmatalek a sumpalen toray sipan to. (Hebreos 11:6) Saya so mamuger ed sikatayo manlapud panmatalek ed bengabengatlan iilaloan na mundo.—Uliran 20:22; 1 Timoteo 6:17.
4. Akin a saray nasyon et “abilungetan so kalakal da”?
4 Impanengneng nen apostol Pablo no panoy pidumaan na saray Kristiano manlapud mundo sanen insulat to: “Saya sirin so ibagak, tan tasian ko ed Katawan, ya agkayo la manakar a singa kakaakar met na saray Gentiles ed maapan kalakal da. Ya abilungetan so kalakal da, a niarawi ra ed bilay [ya unong ed] Dios, lapu ed agpikakabat a wala ed sikara, a nisengeg ed yaawet na puso ra.” (Efeso 4:17, 18) Si Jesus so “tua a silew.” (Juan 1:9) Siopaman a mangipulisay ed sikato odino mangibagan manisia ed sikato balet ta agda unoren so “ganggan nen Kristo” et “abilungetan so kalakal da.” Lapud ag-ira manaakar ed dalan nen Jehova, sikara so ‘niarawi ed bilay ya unong ed Dios.’ Anggano panon lay pangipasen dan inkakabat da unong ed minumundon dalan, walaan ira na ‘agpikakabat ed sikara’ nipaakar ed alenleneg a pikakabat a mangitonton ed bilay, salanti, pikakabat ed si Jehova a Dios tan si Jesu-Kristo.—Juan 17:3; 1 Corinto 3:19.
5. Anggaman onsisinag so liwawa na katuaan ed mundo, akin a dakerakel a kapusoan so mairap ya onkiwas?
5 Ingen, say liwawa na katuaan so onsisinag ed mundo! (Salmo 43:3; Filipos 2:15) “Say kakabatan mankelyaw a maksil ed pulong.” (Uliran 1:20) Nen imbeneg a taon et angusar so Tastasi nen Jehova na masulok a sakey bilyon ya oras a mangipapaamta ed saray kakaabay da nipaakar ed si Jehova a Dios tan si Jesu-Kristo. Nilasus nilibo so kinmiwas. Balet, kasin nepeg tayon pakasurprisaan so ag-ikikiwas na dakel? Andi. Sinaglawi nen Pablo so “iyaawet na puso ra.” Arum so walaan na kapusoan a mairap ya onkiwas lapud inkasiblet odino aro ed kuarta. Arum so naimpluensiaan na palson relihyon odino sekular a panmoria ya ontanlan malaknab natan. Lapud agaylan irap iran naeksperiensia ed bilay, dakel so mangibebeneg ed Dios. Impulisay na arum so pangapet ed atagey iran estandarte nen Jehova ed moral. (Juan 3:20) Kasin agnaimpluensiaan so puso na sakey a manaakar ed dalan nen Jehova ed ontan iran pamaakaran?
6, 7. Anggaman sikaray managdayew ed si Jehova a Dios, diad antoran inkagawa a kinmasipa iray Israelita, tan akin?
6 Agawa iya ed kadaanan ya Israel, a singa impanengneng nen Pablo. Insulat to: “Sarayan bengatla panuliranan ed sikatayo, ta pian ag-itayo onagum ed saray mauges a bengatla, a singa inaguman da met. Tan agkayo komon mangigalang ed saray talintao, singa saray arum ed sikara; unong na nisulat, Saray totoo imyurong ira a mangan tan oninum, tan inmalagey ira a manggalaw [“manliliket,” NW]. Tan ag-itayo met manlawan, a singa arum ed sikara a manggawa ra, tan naplag ed sikara ed sanagew so duamplo tan talon libo.”—1 Corinto 10:6-8.
7 Tinukoy ya unona nen Pablo so inkagawa sanen nandayew so Israel ed sakey a gawa’d balitok a kilaw a baka diad leksab na Palandey Sinai. (Exodo 32:5, 6) Saya so direktaan ya isusunggay ed ganggan na Dios ya akipaknaan dan unoren pigaran simba ni labat so apalabas. (Exodo 20:4-6; 24:3) Insan, tinukoy nen Pablo so panaon sanen dinmakmomo so Israel ed si Baal a kaibay ananak a bibii na Moab. (Numeros 25:1-9) Nabidbiran so panagdayew ed kilaw a baka tekep na graben kaalakan na laman, ‘a manliliket ira.’a Atekepan so panagdayew ed si Baal na mabanbanday a seksual ya imoralidad. (Apocalipsis 2:14) Akin ya akagawa iray Israelita na onia iran kasalanan? Lapud ta inabuloyan daray kapusoan dan ‘onagum ed saray mauges a bengatla’—panagtalintao man odino imoral iran agamil a katekep na satan.
8. Antoray naaralan tayo manlapud saray eksperiensia na Israel?
8 Impabitar nen Pablo a kaukolan itayon makaaral ed sarayan agawa. Naaralan so anto? Agmakatunongan ya isipen parad sakey a Kristiano so idakmomo to ed sakey a gawa’d balitok a kilaw a baka odino ed sakey a kadaanan a dios na Moabita. Balet komusta so imoralidad odino agnabanlongan a kaalakan na laman? Kaslakan iraya natan, tan no abuloyan tayo ya onlesa ed kapusoan tayo so pampilalek ed saratan, saratan so mangiyarawi ed sikatayo manlapud si Jehova. Say pansumpalan et singa tayo met la nantalintao—iyaarawi ed Dios. (Ikompara so Colosas 3:5; Filipos 3:19.) On, sinampotan nen Pablo so panisingbat to’d sarayan ebento diad impanimbawa to ed saray kapanisiaan: “Ibatikan yo so saray talintao.”—1 Corinto 10:14.
Tulong Pian Makapanakar ed Dalan nen Jehova
9. (a) Anton tulong so naawat tayo pian makapansiansia itayon manakar ed dalan nen Jehova? (b) Anto so sakey a dalan a narengelan tayo so ‘salita a walad benegan tayo’?
9 No determinado itayon mansiansian manakar ed dalan nen Jehova, walaan itayo na tulong. Impropesiya nen Isaias: “Saray layag mo makadngel ira naani na sakey a salita ed beneg mo, a kuan to, Saya so dalan, ondalan kayo ed sikato; sano onarap kayo ed nikawanan, tan sano onarap kayo ed nikawigi.” (Isaias 30:21) Panon a narengel na ‘dilin kalayagan tayo’ itan a ‘salita a walad benegan tayo’? Bueno, anggapo natan so makarengel ed literal a bosis odino mangawat na personal a mensahe manlapud Dios. Say “salita” a narengel so niwala ed sikatayon amin diad parehon paraan. Sankamanunaan, manlalapu itan ed panamegley na apuyanan a Kasulatan, say Biblia, a lugan toray kanonotan na Dios tan rekord na saray impideneng to ed totoo. Lapud inagew-agew itayon nipapaarap ed propaganda a manlalapud bengabengatlan ‘niarawi ed bilay ya unong ed Dios,’ nakaukolan tayon basaen so Biblia tan dalepdepen itan a maparanay, ta pian mabunigas itayo ed espiritual. Ontulong iya ed sikatayo a makapaliis ed saray “kaapaan” tan magmaliw ya ‘anggapo so pankulangan to, a nabangatan a maong ed amin a gawa a maabig.’ (Gawa 14:14, 15; 2 Timoteo 3:16, 17) Satan so mamakasil ed sikatayo, mamabiskeg ed sikatayo, tan ontulong ed sikatayon ‘nagawaan so dalan tayo a maaligwas.’ (Josue 1:7, 8) Kanian, oniay ipapaseseg na Salita nen Jehova: “Natan sirin, ana’ko ra, denglen yoak; ta bendito so saray manonton ed saray dalan ko. Denglen yo so panangibangat, tan onkabat kayo komon, tan sikato so agyo ipulisay.”—Uliran 8:32, 33.
10. Anto so mikaduan dalan a narengelan tayo so ‘salita a walad benegan tayo’?
10 Say ‘salita a walad benegan tayo’ so manlalapu met ed panamegley na “say matoor tan makabat ya aripen,” a mangitatarya na “tagano ed panaon a kinepeg to.” (Mateo 24:45-47) Say sakey a paraan a kitatarya na sayan tagano et diad niprinta iran publikasyon a nibase’d Biblia, tan diad apalabas iran taon et daakan iyan abaston tagano. Alimbawa, diad panamegley na magasin a Panag-Bantayan, onlilinew so pakatalos tayo’d saray propesiya. Diad sayan dyurnal, napapaseseg itayon mansiansia ed kimey a panagpulong tan panaggaway babangatan anggaman ed ompapalalon agpananginenen, natutulongan itayon makapaliis ed saray pakakulasbongan, tan napapaseseg itayon mamayubo ed saray maabig a kualidad bilang Kristiano. Agaylay panamabli tayo ed saratan a tagano diad panaon a kinepeg to!
11. Ipaliwawa so mikatlon dalan a narengelan tayo so ‘salita a walad benegan tayo’?
11 Itatarya met na matoor tan makabat ya aripen so tagano diad panamegley na regular iran pantitipon. Laktipen na saraya iray miting ed kongregasyon, sirkito iran asamblea, tan babaleg iran tinaon a kombension. Anto so agnapabli na sakey a matoor a Kristiano ed ontan iran pandaragup? Makanan tulong iratan a manuporta ed sikatayo diad panaakar ed dalan nen Jehova. Lapud mabetbet a pakapipiulop na dakel ed saray agkapananisiaan diad trabaho odino diad eskuelaan, say maparanay a Kristianon panlilimog so literal a makapangisalbay bilay. Saray pantitipon so mangiter ed sikatayo na maabig a pankanawnawa a ‘manaayatan ed balang sakey diad aro tan dia ed saray maabig a gawa.’ (Hebreos 10:24) Papablien tayoray agagi tayo, tan papablien tayo so pililimog ed sikara.—Salmo 133:1.
12. Anto so walan determinasyon na Tastasi nen Jehova, tan panon da itan ya impatnag ed agano ni?
12 Lapud napapabiskeg ed ontan iran espiritual a tagano, ngalngali anemiran milyon a totoo natan so manaakar ed dalan nen Jehova, tan minilyon nin arum so manaaral na Biblia pian makaaral a manggawa met na ontan. Kasin nadidismaya odino onkakapuy ira lapu ed katuaan a daiset ira no ikompara ed binilyon a populasyon na mundo? Andin balot! Determinado iran mantultuloy ya ontalineng ed ‘salita a walad benegan da,’ a matoor dan gagawaen so linawa nen Jehova. Pian nipaamta ed publiko iyan determinasyon, legan na 1998/99 a “Dalan na Dios ed Bilay” a Distriton tan Internasyonal iran Kombension, inabobonan na saray delegado so sakey a resolusyon a mangibabalikas na impapuson talindeg da. Say lugan na satan a resolusyon so walad onggendan.
Resolusyon
13, 14. Anto so walan realistikon panmoria na Tastasi nen Jehova nipaakar ed kipapasen na mundo?
13 “Sikatayo, bilang Tastasi nen Jehova a nantitipon diad ‘Dalan na Dios ed Bilay’ a Kombension, so intiron-puson mipakna a say dalan na Dios et sankaabigan a dalan ed bilay. Balet, bidbiren tayo a duman tuloy so panmoria na karaklan a katooan natan. Ineksperimento la na sosyedad na too so dakel lan ideya, pilosopiya, tan relihyoson ideya ed no antoy naromog a sankaabigan a dalan na bilay. Say matuan pangimano ed awaran na too tan saray kipapasen na mundo natan so mamekder ed inkamatua na madibinon deklarasyon a nirekord diad Jeremias 10:23: “Aliwa a wala ed too a manakar a mangitonton ed saray kurang to.”
14 “Inagew-agew et nanenengneng tayoy nagkalalon ebidensian mamepekder ed inkamatua na saratan a salita. Kaslakan, ibabaliwala na sosyedad na too so dalan na Dios ed bilay. Ginegemtan na totoo no antoy duga ed dilin panmoria ra. Nagmaliw a makapaermen iray resulta—say inkabuyak na bilay ed pamilya, a napapaulyan so ananak ya anggapoy panangigiya; say malaknab a pangegemtan ed materyalismo, a mansusumpal ed inkaapa tan inkadismaya; say andi-kabaliksan a krimen tan karawalan, a manitigway ed agnabilang iran biktima; etniko iran irangan tan bakal, a pirmin mangegetel ed bilay na totoo; say kasmak ya imoralidad, a mamapaloor ed epidemya na makaalis iran sakit ed sekso. Pigara lambengat iraya ed kinarakel na komplikado iran problema a mangaamper ed pangegemtan na liket, kareenan, tan kaligenan.”
15, 16. Nipaakar ed dalan na Dios ed bilay, anton determinasyon so nibalikas ed resolusyon?
15 “Nisesengeg ed makapaermen a kipapasen na sankatooan tan say kinaasingger na ‘bakal na baleg ya agew na Makapanyarin-amin a Dios,’ a tinawag ya Armagedon (Apocalipsis 16:14, 16), sikatayo bilang Tastasi nen Jehova so determinadon:
16 “Unona: Moriaen tayoy inkasikatayo a kayarian nen Jehova a Dios, diad impangidedikay inkasikatayo bilang indibidual ed sikato ya anggapoy kondisyon, tan kaukolan tayon mantiniey agnagiing a pananisia ed probisyon nen Jehova a dondon diad panamegley na Anak to, si Jesu-Kristo. Determinado itayon manakar ed dalan na Dios ed bilay, a manlingkor bilang Tastasi to tan manpasakop ed inkasoberano to a singa nibalikas diad panamegley na pananguley nen Jesu-Kristo.
17, 18. Anton talindeg so itultuloy a mantinien na Tastasi nen Jehova nipaakar ed saray moral ya estandarte tan say Kristianon impanaagi?
17 “Mikadua: Itultuloy tayon tumboken so atagey ed moral tan espiritual iran estandarte ed Biblia. Determinado itayon agmanakar a singa kakaakar na nasyones diad maapan kalakal na kanonotan da. (Efeso 4:17-19) Determinasyon tayo so pansiansian malinis ed imaton nen Jehova tan andiay matik manlapud sayan mundo.—Santiago 1:27.
18 “Mikatlo: Bembenan tayon malet so Makasulatan a talindeg tayo bilang sankamundoan a Kristianon impanaagi. Mantinien tayoy Kristianon neutralidad ed limog na nasyones, ya ag-abuloyay inkasikatayon napatitan ed pambubusolan odino inkaapag-apag lapud rasa, nasyon, odino etniko.
19, 20. (a) Anto so gawaen na saray Kristianon atateng? (b) Panon ya itultuloy na amin a tuan Kristiano so pangipabidbir da’d inkasikara bilang babangatan nen Kristo?
19 “Mikapat: Sikatayo ya atateng so mangipurek ed dalan na Dios ed ananak tayo. Ipanengneng tayo so alimbawa na Kristianon panagbilay, a lalaktipen toy regular a panagbasay Biblia, panagaral na pamilya, tan intiron-kamarerwan pibibiang ed Kristianon kongregasyon tan diad lawak na ministeryo.
20 “Mikalima: Panggunaetan tayon amin a bayuboan iray maridios a kualidad ya inyalimbawa na Manamalsa tayo, tan pambanikelan tayon aligen so personalidad to tan saray dalan to, a singa ginawa nen Jesus. (Efeso 5:1) Determinado tayo ya amin iray kurang tayo so nagawa tekep na aro, diad ontan nipapakabat tayoy inkasikatayo bilang babangatan nen Kristo.—Juan 13:35.
21-23. Anto so itultuloy a gawaen na Tastasi nen Jehova, tan anto so akakombinsian da?
21 “Mikanem: Itultuloy tayon ipulong so maong a balita na Panariay Dios, manggaway babangatan, tan bangatan tayora unong ed dalan na Dios ed bilay tan pasesegen iran mangawat na nagkalalon panangipasal diad saray miting ed kongregasyon.—Mateo 24:14; 28:19, 20; Hebreos 10:24, 25.
22 “Mikapito: Bilang indibidual tan bilang relihyoson organisasyon, itultuloy tayon iyuna ed bilay tayo so linawa na Dios. Diad pangusar ed Salita to, say Biblia, bilang giya tayo, ag-itayo onkasipa ed nikawanan odino ed nikawigi, sirin et pepekderan tayon say dalan na Dios so mas superyor nen saray dalan na mundo. Determinado itayon gegemtanen so dalan na Dios ed bilay—sipepekder tan sitotoor, natan tan ed ando lan ando!
23 “Ginawa tayo iyan resolusyon lapud sigpot itayon manmamatalek ed maaron sipan nen Jehova a siopaman a manggawa ed linawa na Dios so mansiansia lawas. Ginawa tayo iyan resolusyon lapud kombinsido itayon say pambilay diad panamegley na Makasulatan iran prinsipyo, konseho, tan simbawa so manggawan sankaabigan ed dalan na bilay natan tan mangiletneg na maabig a pundasyon parad arapen, ta pian nabembenan tayon malet so peteg a bilay. (1 Timoteo 6:19; 2 Timoteo 4:7b, 8) Manuna’d amin, ginawa tayo iyan resolusyon lapud inaro tayo si Jehova a Dios tekep na intiron puso, kamarerwa, nonot, tan biskeg!
24, 25. Anto so inyebat ed niproponin resolusyon, tan anto so determinasyon na saramay manakar ed dalan nen Jehova?
24 “Amin ya inmatendi ed sayan kombension a pabor ed pangawat ed sayan resolusyon, ipangasin ibagay ON!”
25 Nilasus ya arena tan istadyum ed intiron mundo so maungol diad inyebat na amin ya inmatendi ed makmaksil ya “ON!” Anggapoy panduaruwa na Tastasi nen Jehova a mantultuloy iran manakar ed dalan nen Jehova. Walaan iray nagnap a panagmatalek ed si Jehova tan pananisia a sumpalen toray sipasipan to. Mansiansia iran matoor ed sikato, anggan antoy nagawa. Tan determinado iran manggaway linawa to.
“Say Dios Gampi ed Sikatayo”
26. Anto so walan maliket a kipapasen na saramay manakar ed dalan nen Jehova?
26 Tinandaan na Tastasi nen Jehova so simbawa na salmista: “Manalagar ka ed Jehova, tan tonton mo so dalan to, et itandoro to ka a manawir na dalin.” (Salmo 37:34) Agda lilingwanan iray makapaseseg a salita nen Pablo: “No say Dios gampi ed sikatayo, siopa ni kasi onsumpa ed sikatayo? Saman so agto kinawanan so dili ya Anak to, noag ingen inyawat to lapud sikatayo ya amin, panon so agto pangiter ed sikatayo, ya anggapo so bayar, na ami ganagana a pati sikato?” (Roma 8:31, 32) On, no mantultuloy itayon manakar ed dalan nen Jehova, taryaan to itayo na “daakan na saray amin a bengatla a pinabangan tayo.” (1 Timoteo 6:17) Iner nin pasen so magmaong nen say kawalaan tayo la—a manaakar ed dalan nen Jehova, kaiba iray pinablin agagin lalaki tan bibii. Lapud walad dapag tayo si Jehova, komon ta determinado itayon mansiansia ditan tan mansungdo anggad anggaan, a nagnap a matalek a diad aturon panaon to, nanengneng tayoy panumpal to’d ami-amin a sipan to.—Tito 1:2.
[Paimano ed leksab]
a Diad panutukoy ed Griegon salita a nipatalos dia a “manliliket,” inkuan na sakey a komentarista ya ontutukoy itan ed saray pansasayaw ya agawa ed pagano iran piesta tan inyarum to: “Dakel ed sarayan pansasayaw, unong a kabkabat la, so direktan denisinyo a managyat na imoral a tuloy iran liknaan.”
Kasin Natandaan Yo?
◻ Anto so kakaukolanen ed sakey a Kristiano pian makapanakar ed dalan nen Jehova?
◻ Akin a nakaukolan tayon bayuboan so panagmatalek tan katooran ed si Jehova?
◻ Anto so walan tulong legan na panaakar tayo ed dalan nen Jehova?
◻ Mangiter na pigaran pabitar ed resolusyon ya inawat ed “Dalan na Dios ed Bilay” iran Kombension.
[Saray litrato ed pahina 18]
Inawat so importantin resolusyon diad “Dalan na Dios ed Bilay” a Distrito tan Internasyonal iran Kombension