Arin Walaay Kayamanan Tan Kakabatan
Diad padesir mo, kasin napaliket ka na kaykayamanan? No walay angiter ed sika na baleg a kantidad na kuarta, agka kasi manliket? Nayari pa lagin ontan. Maseguron nonoten moray pangigastosan ed satan.
AAKSOBIEN, dakel iray bengatlan nasaliw pian mas komportabli tan makapaliket so bilay. Onkana met so kuarta a “sakurong” sumpad ag-iilaloan iran problema, a singa say sakit odino agpaka-impleyo.—Eclesiastes 7:12.
Balet antoy siglaotan na kuarta tan liket? Kasin isipen mo, singa ed panmoria na dakel, a say liket et resulta na kayamanan? Nayarin mairap ya ebatan irayan tepet lapud say kuarta so magmainomay a nasukat, odino nakuenta, bangta say liket et andi. Agmo nakilo so liket tan nasimbang itan.
Insan, walaray mayaman a totoon ompatnag a maliket, bangta say arum et miserabli. Tua met itan ed saramay pobri. Siansia, maslak a totoo—anggan saramay mayaman la—so manisian say dakel a kuarta so makapangitarok ed sikara na babaleg a liket.
Sakey a toon angisulat nipaakar ed ontan iran pamaakaran et si Arin Solomon na kadaanan ya Israel. Sikatoy sakey ed sankayamanan a totoon nambilay ed kapiganman. Nabasam so deskripsion na dakerakel a kayamanan to diad koma-10 a kapitulo na libroy Biblia ya Unonan Arari. Alimbawa, imanoen pay inkuan na bersikulo 14: “Say simbang na balitok a sinmabi ed Solomon dia ed sakey taon sikato so anem a lasus anemaplo tan anem a talento na balitok.” Misimbangan itan a bilang ed 25 tonilada na balitok. Natan, say ontan karakel a balitok so mankantidad na masulok a $200,000,000, E.U.!
Ingen, aliwa lambengat a mayaman si Solomon; sikatoy pinalaboan na Dios na kakabatan. Isasalaysay na Biblia: “Si Solomon tinalonaan to so saray amin ya arari ed dalin dia ed saray kayamanan tan dia ed kakabatan. Et amin a dalin sineetan da a nengnengen so imaton nen Solomon, pian denglen da so kakabatan to, a say Dios inyan to ed puso to.” (1 Arari 10:23, 24) Nagunggunaan tayo met manlapud kakabatan nen Solomon, lapud saray sulat to et kabiangay rekord na Biblia. Nengnengen tayo pa no antoy nikuanto nipaakar ed siglaotan na kayamanan tan liket.
[Picture Credit Line ed pahina 3]
Kinopya manlapud Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart