Sakey a Maliket ya Okasyon—Say Impangraduar na Koma-104 a Klase na Gilead

“MALIKET iyan agew, tan masayaksak itayon amin.” Diad saratan a salita si Carey Barber, membro na Mananguley ya Ulop na Tastasi nen Jehova, so angilukas ed magayagan programay pangraduar na koma-104 a klase na Watchtower Bible School of Gilead nen Marso 14, 1998. Say inmatendin 4,945 so inimbitaan a mangigapo’d okasyon diad pangansion na kantay Panarian numero 208, ya atituloan na “A Song of Rejoicing.”

Praktikal a Konseho Pian Mansiansian Maliket

Say manangilukas a kabiangay programa, sakey a serye na limaran antirikey a nibase’d-Biblian diskurso, so angiter na pigaran praktikal a konseho no panon a mantinien so magayagan espiritu a niwala’d agew na pangraduar.

Say inmunan paliwawa so inter nen Joseph Eames na Writing Department. Impaliwawa toy teman “Aligen so Awawey na Saray Matoor,” a nibase’d salaysay na Biblia diad 2 Samuel kapitulo 15 tan 17, a no iner et si Absalom, ya anak nen David, so nangetman samsamey inter na Dios a panarian ed si ama to diad impangisagyat na panrebeldi. Balet, walaray nansiansian matoor ed nilanaan nen Jehova, si Arin David. Anton leksion so naaralan na saray balon misionaryo ed saya? “Inermay panmisionaryoan yo, sitotoor ya idalangirang so awawey a pikokoopera tan panagrespeto’d teokratikon autoridad. Tulongan so arum a manggawa met na ontan,” so impangisampot nen Brother Eames.

Sinmublay ed programa si David Sinclair, so angibinsabinsa ed samploran kakaukolanen, ya asalambit diad Salmo 15, parad pagmaliw a sankaili ed ‘tolda nen Jehova.’ Say paliwawa to, ya atituloan na “Mantultuloy Bilang Sankaili ed Misionaryon Tolda Yo,” so amaseseg ed saray mangraduar ya estudyante a mangiyaplika’d sayan salmo diad saray panmisionaryoan da, a no iner et sikaray sankaili. Impabitar nen Brother Sinclair so kaimportantian na pambilay unong ed maridios iran estandarte diad amin a panaon. Antoy pansumpalan? Ibabaga na Salmo 15:5: “Say manggawa ed saraya a pamaakaran aglawas nagiing.”

Sinmublay si John Barr, membro na Mananguley ya Ulop, tan impaimano toy manamaligsan epektoy pankansion diad saray Kristianon miting. Balet antoy sankamagayagaan a kanta a kakansionen ed sankadalinan natan? Say maong a balita na Mesianikon Panarian na Dios. Antoy resulta na sayan amin a panagkansion, odino panangipulong na Panarian? Say komaduan estansa na kanta numero 208 so matukotukoy ya angikuan: “Diad panamegley na panangipulong na Panarian tan Kristianon panagbangat, dakel so ondadapag ed si Jehova. Saraya met so mangikekelyaw na saray kanta na panggayaga, ya ipapaknol iratan ed lapag!” On, kada agew ngalngalin 1,000 a balon babangatan so nababautismoan. Sinampotan nen Brother Barr: “Agta makapakelkelaw ya isipen, agagi, a sikayoy nibabaki’d saray teritorya pian pegdaten so klase na totoo a manaalagar ya ondengel ed kanta na panangidayew yo?”

“Ontalineng ed Saray Bosis na Eksperiensiado” so titulo na indiskurso nen James Mantz na Writing Department. Impabitar ton walaray bengatlan naaralan labat diad personal ya eksperiensia. (Hebreos 5:8) Anggaman kuan, papasesegen itayo na Uliran 22:17 ya ‘ikiling so layag tayo, tan denglen iray salita na makabat,’ odino saramay akagamor lay eksperiensia. Saray mangraduar ya estudyante so makaaral na dakel manlapud saramay akauna la’d sikara. “Amta ray ontawal ed saray lokal a managlako. Amta ra no dinan iran lugar ed syudad so paliisan lapud pisikal tan moral iran kapeligroan. Amta daray pansyodotan na lokal a totoo. Amta na saray abayag lan misionaryo so kaukolan yo pian magmaliw kayon maliket tan ontalona ed asainmin yo,” kuan nen Brother Mantz.

Diad pansasalita’d teman “Apresiaen so Teokratikon Asainmin Yo,” impaliwawa nen Wallace Liverance, parehistroan ed Gilead School, ya anggaman pigaran misionaryo, a singa di apostol Pablo, Timoteo, tan Bernabe, so angawat na saray asainmin da a nanlapud Dios diad panamegley na masanton espiritu odino diad mamilagro iran panangipatnag, saray nipasal ed Gilead a misionaryo so iyaasain ed sakey a pasen ed sankamundoan a lawak na “say matoor tan makabat ya aripen.” (Mateo 24: 45-47) Impareng toray asainmin na saray misionaryo ed saray pasen ya angiasainan nen Gideon ed lalakin mibakal ed saray Midianita. (Uko-ukom 7:16-21) “Apresiaen yoy teokratikon misionaryon asainmin yo. No panon a saray sundalo nen Gideon so ‘nansiansian nanalagey ed balang pasen na sakey,’ moriaen yoy asainmin yo bilang pasen a kawalaan yo. Manilalon nayarin usaren kayo nen Jehova a singa impangusar to’d talon lasus a sundalo nen Gideon,” so impaseseg nen Brother Liverance.

Manresulta’d Liket so Pagmaliw ya Interesado’d-Totoo

Aminsan ya inkomento na The Watchtower: “Imbes ya iletneg moy paninteresan mo tan kabibilay mo ed saray pinabrikan bengatla tan kagawaan na sayan peles a mundo, bengabengatlan anggapoy pakaseguro’d pansiansia, agaylan magmaong tan mas makabat a gawaen so totoo a peteg a paninteresan tayo tan aralen so pananap na puron gayaga diad panggaway bengabengatla parad arum.” Mitunosan ed satan, si Brother Mark Noumair, sakey ed saray instruktor na Gilead School, so akitongtong ed sakey a grupo na saray estudyante nipaakar ed saray eskperiensia ra ed lawak a serbisyo tan inkomento to: “Say pangipanengneng na personal ya interes ed arum so manggawa’d sikayon maong iran misionaryo.”

Saray Tombok ed Liket Diad Sankailin Lawak

Antoray pigaran tombok ed itatalona tan liket ed panagmisionaryo? Si Brother Charles Woody na Service Department tan Harold Jackson, datin misionaryo ed Latin America tan assistant ed Teaching Committee, so anginterbio ed saray membro na nanduruman Branch Committee a nanaral ed komasiam a klase na eskuelaan parad branch personnel. Nia so pigaran simbawa na saraya:

Onia so inkuan nen Albert Musonda nanlapud Zambia: “Sano mabulos ya unona lay misionaryo ya onasingger tan mangibano ed agagi, mamawala itan na makapabiskeg ya espiritu lapud saray agagi so napaapit ed misionaryo, tan say misionaryo so napaapit met ed sikara.”

Isusuheri nen Rolando Morales na Guatemala a sano opresian na makaaron totoo iray balon misionaryo na nainum, nayarin sipapangasi tan mataktikan ikuan da: “Balo ak ni ed bansa. Labalabay ko komon, balet ompan nabigla so laman ko. Paulyan yo ta nasabin siansian naawat ko itan, tan maliket ak a manggawa’d satan.” Antoray gungguna na ontan ya ebat? “Agnaopendi iray totoo, tan saray misionaryo so magmaliw a mapangasi’d arum.”

Antoy makatulong ed saray misionaryo a naanosan iray asainmin da? Onia so imbaga nen Brother Paul Crudass, nangraduar ed koma-79 a klase na Gilead, a manlilingkor ed Liberia ed loob la na 12 taon: “Amtak a talagan mailiw iray atateng ed ananak da. Balet ta walaray panaon sano panggugunaetan na misionaryo so kipasal ed bansa, ed kaliberliber, ed kultura, ed totoo. Nayarin pirawrawat to lay onsempet. No sikatoy makaawat na sulat manlapud pamilya to a mankuan, ‘Makakailiw kami lan maong ed sika; agmi amta no antoy gawaen mi no anggapo ka,’ nayarin satan so managdag la’d sikaton man-impaki tan onsempet la. Importantin tandaan itan na kakanayon a wadia natan.”

Kayari na saray impaninterbio, say unor a paliwawa ed programa so imparungtal nen Theodore Jaracz, membro na Mananguley ya Ulop. Say tema to: “Pansiansiaen a Manunaan ed Bilay Yo so Panarian.” Panon a makapansiansian akaapasakey tan agnagirogiro iray misionaryo ed kimey da? Pinaseseg toran nawalaan na eskedyul parad personal a panagaral na Biblia, ya ontulong ed sikaran lawas mangiyuna ed intereses na Panarian ed bilay. Tan walay nipanpanaon a panonot: “Arum a misionaryo so angibaliwala ed personal a panagaral lapud sikaray okupadon tuloy ed saray elektronik a kagawaan, E-mail, tan computer. Kaukolan tayoy inkapraktikal ed pagmaliw a balansi ed panangusar na antokaman a kagawaan tan agdadarakey dakel a panaon ed bengatlan manamsam ed personal a panagaral tayoy Salitay Dios.”

Sinmublay ed diskurso nen Brother Jaracz so panangiter ed saray diploma tan panangibasay sulat na apresasyon na klase. Onia so impangibalikas na manangilaman na klase ed liknaan dan amin: “Anengneng miray ebidensia na aro ya inkuan nen Jesus a pakapatnagan ed saray babangatan to, tan saya so amaseguro’d sikami ya inerman so kawalaan mi, walay maligsa, maaro, singa-inan organisasyon a manusuporta’d sikami. Tekep na ontan a tulong, akaparaan kamin onla ed saray sampot na dalin.” Saman so makatenyeg a konklusion na maliket ya agew na impangraduar na koma-104 a klase na Gilead.

[Kahon ed pahina 25]

Saray Estadistika na Klase

Bilang na saray nirepresentan bansa: 9

Bilang na saray bansan angi-asainan: 16

Bilang na saray estudyante: 48

Bilang na saray sanasawa: 24

Promedyon edad: 33 Promedyon taon ed katuaan: 16

Promedyon taon ed sigpot-panaon a ministeryo: 12

[Litrato ed pahina 26]

Koma-104 a Klase na Watchtower Bible School of Gilead

Diad listaan ed leksab, saray dasig so anumeroan manlapud arap a pabeneg, tan saray ngaran so akalista manlapud kawigi a manpakawanan ed kada dasig

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.