“Say Katuaan Sikayo So Gawaen To a Bulos”
“Nakabatan yo so katuaan, et say katuaan sikayo so gawaen to a bulos.” Ontan so inyabawag nen Jesus leleg ton babangatan so dakel a totoo diad templo ed Jerusalem. (Juan 8:32) Mainomay a nibiig na apostoles nen Jesus iray bangat to bilang katuaan. Dakel lay anengneng dan ebidensia nipaakar ed madibinon gapoan na managbangat da.
BALET, arum natan so naiirapan a mangibiig ed katuaan a sinalita nen Jesus. Singa ed agew nen propeta Isaias, walara natan so “manawag na mauges ed maong, tan maong so mauges; ya iyan da so kabilungetan a pinagkaliwawa, tan say liwawa a pinagkabilunget; ya iyan da so ampait a pinagkamasamit, tan say masamit a pinagkaampait.” (Isaias 5:20) Lapud dakel ya opinyon, pilosopiya, tan estiloy-bilay a nidadalangirang natan, ipasen na dakel a totoo ya amin a bengatla et relatibo tan anggapoy ontan a bengatla bilang katuaan.
Sanen inkuan nen Jesus ed saray dumerengel to a say katuaan so mangibulos ed sikara, inmebat ira a kuanda: “Sikami poli nen Abraham, tan agkami impaaripen a balot ed siopaman a too. Panon so pangibagam, ‘Nagawa kayo a bulos’?” (Juan 8:33) Agda naimano so pankaukolan parad siopaman odino antokaman a mangibulos ed sikara. Balet insalaysay nen Jesus: “Tua, tua kuan ko ed sikayo, Balang sakey a manggawa na kasalanan sikato so aripen na kasalanan.” (Juan 8:34) Say katuaan a sinalita nen Jesus so makapangilukas ed dalan ed kibulos manlapud kasalanan. Inkuan nen Jesus: “No say Anak gawaen to kayon bulos, sikayo so peteg a bulos naani.” (Juan 8:36) Kanian say katuaan a mangibulos ed totoo et say katuaan a nipaakar ed si Jesu-Kristo, say Anak na Dios. Diad panamegley labat na pananisia ed bagat na ayadyarin atooan a bilay nen Jesus a makabulos so sakey ed kasalanan tan ipapatey.
Diad sananey ya inkagawa et inkuan nen Jesus: “Pasantos mo ’ra ed katuaan; say salitam sikato so katuaan.” (Juan 17:17) Say salita na Dios a nibalikas diad Biblia so katuaan a makapangibulos manlapud anito tan palson panagdayew. Lugan na Biblia so katuaan nipaakar ed si Jesu-Kristo, a mangipapaarap ed totoo pian manisia ed sikato tan mangilukas na dalan a mamaarap ed masnag ya ilalo ed arapen. Alay abig a bengatla so pakapikabat ed katuaan na Salitay Dios!
Kaunongan kaimportanti so pakaamta ed katuaan? Dakel a relihyon natan, anggaman mankuan a manutumbok ed Biblia, so inkalapagan a naimpluensiaan na saray pilosopiya tan tradisyon na too. Mabetbet, saray panguloy relihyon so ompatnag a mas mapaga nipaakar ed pagmaliw a naawat na totoo nen say mapaga nipaakar ed inkasusto na mensahe ra. Ipasen na arum a napapaliket so Dios ed dinanman a nengneng na panagdayew, daput no masimoon itan. Balet insalaysay nen Jesu-Kristo: “Say oras onsabi, tan natan la, sano saray tua a manangigalang igalang da so Ama dia ed espiritu tan katuaan; ta saray ontan so anapen na Ama a manangigalang ed sikato.”—Juan 4:23.
No labay tayon dayewen so Dios ed naabobonan a paraan, nepeg tayon amtaen so katuaan. Importanti iyan isyu. Say magnayon a liket tayo so mandedependi ed satan. Sirin, kaukolan a tepetan na balang sakey so inkasikato: ‘Kasin aabobonan na Dios so paraan na panagdayew ko? Talaga ta’n interesado ak ed pakaamtay katuaan na Salitay Dios? Odino antakot ak ed nayarin iparungtal na maalwar a panangusisa?’