Katuaan—Kasin Importante Ni Itan Natan?

Kasin ngalngali agmo nibiig so katuaan ed katilaan? Dakel so nakokombinse natan base ed nalilikna da tan ed sarilin opinyon da, imbes ya diad katuaan. Diad interon mundo, dakel so manisia ya anggapo tay katuaan.

Abayag lan ontan so iisipen na dakel ya totoo. Manga 2,000 taon lay apalabas, oniay intepet na Romanon Gobernador ya si Poncio Pilato ed si Jesus: “Anto so katuaan?” (Juan 18:38) Agla inamta nen Pilato so ebat nen Jesus, pero importante imay tepet to. Walad Biblia so ebat, tan natulongan ka na satan ya nibiig so katuaan ed katilaan.

Talaga kasin walay katuaan?

On wala. Diad Biblia, say salitan “katuaan” et ontutukoy ed no antoy duga tan walay aka-basiyan ton ebidensya. Ibabangat na Biblia ya si Jehovaa a Dios so Lapuan na katuaan, kanian sikatoy tinawag ya “Dios na katuaan.” (Salmo 31:5) Nabasa ed Biblia iray katuaan ya manlalapud Dios. Saray katuaan ya wadtan et inkompara ed liwawa, lapud atan so mangigiya ed sikatayo pian amta tayoy panisiaan tayo ed sayan mundo.—Salmo 43:3; Juan 17:17.

Panon mon naamtaan so katuaan?

Aglabay na Dios ya bastam labat panisiaan so katuaan ya walad Biblia. Diad tua, papasesegen to tayon aralen ya maong itan tan usaren tayoy abilidad tayon mannonot imbes ya unoren labat no antoy nalilikna tayo. (Roma 12:1) Labay To ya sikatoy kabaten tan aroen tayo diad “interon nonot” tan patunayan tayon mismo ed sarili tayo ya tua iray nanaaralan tayo ed Biblia.—Mateo 22:37, 38; Gawa 17:11.

Panon ya ginmapo so katilaan?

Ibabaga na Biblia ya say angigapo na katilaan et say kabusol na Dios, si Satanas a Diablo, ya tinawag na Biblia ya “ama na tila.” (Juan 8:44) Sikatoy angibaga na katilaan ed si Adan tan Eva tungkol ed Dios. (Genesis 3:1-6, 13, 17-19; 5:5) Manlapud saman, tuloytuloy nin mangikakayat si Satanas na katilaan tan iyaamot tod totoo so katuaan tungkol ed Dios.—Apocalipsis 12:9.

Akin et dakel so onkakayat ya katilaan natan?

Diad panaon tayo, ya tinawag na Biblia ya “kaunoran iran agew,” mas grabe so panagpalikdo tan panagtila nen Satanas ed saray totoo. Normal labat la ed totoo so mantila pian nalamangan day arum. (2 Timoteo 3:1, 13) Ontan met, dakel ya relihyon so napnoy katilaan. Agtayo la itan pankelawan ta impasakbay na Biblia ya diad panaon tayo, saray totoo et “mangala ray dakel a managbangat a mangibagad sikara na labalabay dan narengel,” tan “agla ra ondengel ed katuaan.”—2 Timoteo 4:3, 4.

Akin et importante so katuaan?

Kaukolan na totoo so katuaan pian pantiwalaan da so sakey tan sakey. No anggapoy tiwala, naderal so pankakaaro tan anggapoy pankakasakey ed lipunan. Ibabaga na Biblia ya labay na Dios ya sikatoy dayewen tayo base ed katuaan. Oniay nabasa ed Juan 4:24: “Saramay mandadayew ed [Dios] et nepeg a mandayew diad espiritu tan katuaan.” Pian naaralan mo no panon kan natulongan na saray katuaan ya walad Biblia tan nibiig mo iray palson bangat na relihyon tan nibulos ka manlapud saratan ya katilaan, basaen so serye na artikulon “Saray Katilaan Nipaakar ed Dios.”

Akin et labay na Dios ya naamtaan mo so katuaan?

Labay na Dios ya makaligtas ka tan manbilay ka na andi-anggaan. Pero pian nagawa itan, dapat mon aralen so katuaan tungkol ed sikato. (1 Timoteo 2:4) No amtaen moy estandarte na Dios ed duga tan aliwa tan unoren mo itan, nawalaan kay maapit ya relasyon ed sikato. (Salmo 15:1, 2) Pian naaralan na totoo so katuaan, imbaki na Dios si Jesus diad dalin. Labay To ya dengelen tan panisiaan tayo ray bangat na Anak to.—Mateo 17:5; Juan 18:37.

Kasin patundaen na Dios so amin ya katilaan?

On. Aglabay na Dios ya mantitilaan iray totoo. Im-promise to ya deralen to iramay ag-ontutundan mangikakayat na katilaan. (Salmo 5:6) Diad satan ya panaon, tooren met na Dios iyan sipan to: “Say bibil a matua et mansiansia ya anggad angga.”—Proverbio 12:19.