Aligen so Dios na Katuaan
“Aligen yo sirin so Dios, singa anak to kayon inararo.”—EFESO 5:1.
1. Anto so papanisiaan na arum nipaakar ed katuaan, tan akin a makapuy so panagkatunongan da?
“ANTO so katuaan?” (Juan 18:38) Satan a manduaruwan intepet nen Poncio Pilato ngalngali 2,000 taon lay linmabas, so pakapatnagan a say katuaan et mairap ya anapen. Dakel natan so mipakna ed satan. Nasusuppiat so mismon kalidad na katuaan. Nayarin nadngelan yo lan nibaga a makauley lay balang sakey ed ipasen ton katuaan, odino say katuaan et aliwan absoluto, odino lawas a manguuman. Makapuy so ontan a panagkatunongan. Say mismon kalat na panagsukimat tan edukasyon et say pakaaral ed saray peteg a detalye, say katuaan, nipaakar ed mundon pambibilayan tayo. Say katuaan et aliwan personal ya opinyon. Alimbawa, no kasin say kamarerwan too et ag-ompatey odino ompatey. No kasin wala so Satanas odino anggapo. Wala kasi so gagala na bilay odino anggapo. Diad saratan a bengatla, wala lambengat so sakey a dugan ebat. Say sakey et tua, tan say sananey et palso; agnayarin satan a dua et parehon tua.
2. Diad antoran dalan a si Jehova et Dios na katuaan, tan antoran tepet so singbaten tayo?
2 Diad inmunan artikulo, siningbat tayo a si Jehova et Dios na katuaan. Amta to so katuaan ed amin a bengatla. Diad pisumlangan ed manamalikdon kabusol to a si Satanas a Diablo, si Jehova so lawas matua. Nagkalalo ni, si Jehova so mabulos a mangipaparungtal na katuaan ed arum. Pinaseseg nen apostol Pablo iray kapara ton Kristianos: “Aligen yo sirin so Dios, singa anak to kayon inararo.” (Efeso 5:1) Bilang saray Tasi nen Jehova, panon tayon naalig si Jehova diad panagsalita tan pambilay tayo unong ed katuaan? Akin ya importante so panggawa ed satan? Tan anton panamaseguro so walad sikatayo ya aabobonan nen Jehova iramay manggegemtan na inkamatua? Nengnengen tayo.
3, 4. Panon so impaneskribe nen apostol Pablo tan Pedro ed walan nagawa legan na saray “kaunoran ya agew”?
3 Manbibilay itayo ed panaon a dakerakel iray katilaan na relihyon. Unong ya impasakbay nen apostol Pablo diad silong na panangipuyan na Dios, dakel a totoo ed sarayan “kaunoran ya agew” so walaan na nengneng na maridios a debosyon balet ta pankunkunwari labat itan. Arum so onsusumpa ed katuaan, ya “aderal so kanonotan da.” Niarum ni, “saray totoo a mauges tan saray managsaol onuges lara’n onuges, a managsaol ira, tan nasaol ira met a dili.” Anggaman lawas manaaral iratan a totoo, ag-iran balot makarateng ed ‘suston pikakabat ed katuaan.’—2 Timoteo 3:1, 5, 7, 8, 13.
4 Apuyanan met si apostol Pedro a mangisulat nipaakar ed saray kaunoran ya agew. Unong a suston impropesiya to, saray totoo et aglambengat mangipulisay ed katuaan noagta manludlurey met ed salita na Dios tan ed saramay mangiyaabawag ed katuaan a lugan na satan. “Unong ed kaliktan da,” imbaliwala na saratan a managludlurey so katuaan a say mundo ed panaon nen Noe so nalgep ed danum, ya inletneg da so padron ed arapen ya agew na panangukom. Say pitamitam dan nagawa so mankabaliksan na kadederal ed sikara sano onsabi so panaon na Dios a maneral ed agmaridios a totoo.—2 Pedro 3:3-7.
Amta na Saray Lingkor nen Jehova so Katuaan
5. Unong ed si propeta Daniel, anto so nagawa diad ‘panaon na anggaan,’ tan panon a nasusumpal iyan propesiya?
5 Bilang deskripsion ed ‘panaon na anggaan,’ impasakbay nen propeta Daniel so miduman nagawa ed limog na totoo na Dios—say kiwala lamet na relihyoson katuaan. Inkuanto: “Dakerakel naani so saray ombatik ya onla tan ompawil, tan say pikakabat ondaak naani.” (Daniel 12:4) Saray totoo nen Jehova so agnawetwet odino nabulag na baleg a Managpalikdo. Diad pansusukimat da ed saray pahina na Biblia, sikara so akagamor na tuan pikakabat. Nen inmunan siglo, niliwawaan nen Jesus iray babangatan to. “Nilukasan to so saray kaisipan da, pian natalosan [da] so saray sulat.” (Lucas 24:45) Diad panaon tayo, ontan met so ginawa nen Jehova. Panamegley na Salita to, espiritu to, tan organisasyon to, tinulongan to so minilyon diad interon dalin pian makatalos ed walan kabat to la—say katuaan.
6. Saray totoo na Dios natan so makakatalos ed antoran katuaan ed Biblia?
6 Bilang totoo na Dios, natatalosan tayo so dakel iran bengatla ya agtayo ni atalosan nensaman. Amta tayo iray ebat ed saray tepet a kawewetwetan na saray makabat a totoo ed mundo diad loob la na saray nilibon taon. Alimbawa, amta tayo no akin a walay kairapan, no akin ya ompapatey so totoo, tan no akin ya agnarapat na totoo so deen tan pankakasakey ed interon mundo. Abendisyonan itayo met na sakey a pasingawey ed walan nagawa ed arapen—say Panarian na Dios, paraison dalin, tan agmanganggan bilay diad inkayadyari. Akabat tayo si Jehova, say Supremon Sakey. Naaralan tayo so makapasagyat a personalidad to katekep lay nepeg tayon gawaen pian napanggayagaan so bendisyon to. Say impakapikabat tayo ed katuaan so ontulong ed sikatayon makapangibiig ed no anto so aliwan tua. Say pangiyaplika ed katuaan so manasalimbeng ed sikatayo manlapud saray agmakagunggonan gegemtan, ontulong ed sikatayon narapat so sankaabigan ed bilay, tan mangiter ed sikatayo na alay abig ya ilalo ed arapen.
7. Sioparay makagamor na saray katuaan na Biblia, tan sioparay agmakagamor?
7 Kasin natatalosan yo so katuaan na Biblia? No ontan, sikayo so mayamyaman ya abendisyonan. Sano mansusulat na libro so sakey ya autor, sikato so manggawa ed satan a makapasagyat ed espesipikon grupo na totoo. Walaray libro a nisulat parad saray de-aral, arum et parad saray ugugaw, balet ta saray arum et parad saramay eksperto ed nanduruman klase na kimey. Anggaman say Biblia et mainomay a naala na amin, nigana itan pian natalosan tan naapresya na sakey a grupo na totoo. Denisinyo itan nen Jehova parad saray mapaabeba, saray mauyamo ed dalin. Say Biblia so natebek na saratan a totoo, antokaman so aral, kultura, kipapasen da ed bilay, odino etnikon grupo ra. (1 Timoteo 2:3, 4) Diad biek a dapag, say pakatalos ed katuaan na Biblia so agnipagamor ed saramay agnikiling ed maptek, anggan panon lay inka-utek odino inka-edukado ra. Saray mapangta tan mapaatagey so agmakatebek ed mabli iran katuaan na Salitay Dios. (Mateo 13:11-15; Lucas 10:21; Gawa 13:48) Say Dios lambengat so makapawala ed satan a libro.
Matua Iray Lingkor nen Jehova
8. Akin a si Jesus so mismon mangirerepresenta ed katuaan?
8 Singa si Jehova, saray matoor a Tasi to so matua. Si Jesu-Kristo, say manunaan a Tasi nen Jehova, so amekder ed katuaan panamegley na saray bengatlan imbangat to tan diad paraan na impanbilay tan impatey to. Intandoro to so katuaan na salita tan saray sipan nen Jehova. Kanian, si Jesus so mismon mangirerepresenta ed katuaan, unong ya inkuan ton mismo.—Juan 14:6; Apocalipsis 3:14; 19:10.
9. Anto so ibabaga na Kasulatan nipaakar ed pansalita ed katuaan?
9 Si Jesus so “napno na grasya tan katuaan” tan “anggapo met so panamalingo ed sangi to.” (Juan 1:14; Isaias 53:9) Tutumboken na saray tuan Kristiano so padron ya inletneg nen Jesus diad pagmaliw a matua ed arum. Oniay insimbawa nen Pablo ed saray kapananisiaan: “Salitaen yo so tua, balang sakey ed kapara ton too: ta sikatayon arum kabiangan da itayo na saray arum.” (Efeso 4:25) Diad asasakbay, oniay insulat nen propeta Zacarias: “Mansalita naani na tua ed kaabay [yo].” (Zacarias 8:16) Saray Kristiano so matua lapud kaliktan dan paliketen so Dios. Si Jehova so matua tan amta to so mauges ya epekto na panagtila. Kanian, sikato so makanepegan a manilalo ed saray lingkor to a mangibaga na katuaan.
10. Akin a mantitila so totoo, tan antoray negatibon resulta na satan?
10 Parad dakel, say panagtila so nayarin ompatnag a mainomay a paraan pian nagamoran so pigaran bentaha. Saray totoo so mantitila pian agnadusa, makaganansya ed arum a paraan, odino pian pandinayewan na arum. Balet, say panagtila et sakey a mauges ya ugali. Nagkalalo ni, say matila so ag-aabobonan na Dios. (Apocalipsis 21:8, 27; 22:15) Sano kabkabat itayon matua, panisiaan na arum so ibaga tayo ed sikara; panmatalekan da itayo. Balet, no niwalwal a nantila itayo anggano aminsan labat, nayarin manduaruwa la so arum no kasin tua ni so antokaman a bengatlan ibaga tayo ed arapen. Oniay kuan na sakey a diparan ed Aprika: “Say sakey a katilaan so maneral ed sanlibon katuaan.” Inkuan ni na sananey ya uliran: “Say matila so agnapanisiaan, anggano sikato lay mansasalita na katuaan.”
11. Diad anton dalan a say inkamatua et aglambengat pangibaga na tua?
11 Say inkamatua so aglambengat mankabaliksan na pangibaga na tua. Satan so dalan na bilay. Satan so mangipatnag na inkatoo tayo. Ipapaamta tayo so katuaan ed arum, aliwa lambengat a diad ibabaga tayo, noagta diad gagawaen tayo met. ‘Kanian sika a mangibangat ed arum, agmo bangatan so inkasika a dili?’ so intepet nen apostol Pablo. “Sika ya ipupulong mo so agpantakew mantakew ka ta? Sika, a kuan mo a say sakey a too agto nepeg so manggawa na pikakalugoran mikalugoran ka ta?” (Roma 2:21, 22) No inabang tayo so katuaan ed arum, nepeg a matua itayo ed amin a paraan tayo. Say reputasyon tayo bilang matua so walaan na mapuersan epekto ed no panon so ikiwas na totoo ed ibabangat tayo.
12, 13. Anto so insulat na sakey a kalangweran nipaakar ed inkamatua, tan anto so rason na atagey a moral ya estandarte to?
12 Natatalosan met na saray kalangweran ed limog na saray lingkor nen Jehova ya importante so pagmaliw a matua. Diad sakey ya essay na eskuelaan, oniay insulat nen Jenny sanen sikatoy 13 años ni: “Say inkamatua et papablien kon maong. Makapaermen ta daiset a totoo natan so sigpot a matua. Insipan ko ed inkasiak a lawas ak a mansiansian matua diad bilay ko. Siak so magmaliw met a matua anggano say pangibagak na katuaan et agtampol a mangunggona ed siak odino ed saray kakaarok. Seseguroen ko a saray kakaarok et saramay mangibabaga na katuaan tan matua ira.”
13 Oniay inkomento na maestra nen Jenny ed sayan essay: “Anggaman uga-ugaw ka ni, abayuboan mo la so mapekder ya estandarte nipaakar ed moral tan maong ya ugali. Amtak a mansiansia ka ed estandartem lapud walaan ka na biskeg ed moral. Anto so makasengeg ed inkabiskeg ed moral na sayan maneeskuela nin bii? Diad gapo na essay to, indalatdat nen Jenny a say relihyon to so “angiletneg na saray estandarte ed bilay [to].” Pitoy taon lay linmabas manlapu la nen insulat nen Jenny itan ya essay. Singa inilaloan la na maestra to, nantultuloy ya impatnag nen Jenny so atagey ya estandarte ed moral diad bilay to bilang sakey ed saray Tasi nen Jehova.
Ipaparungtal na Saray Lingkor nen Jehova so Katuaan
14. Akin a saray lingkor na Dios so walaan na nagkalautlan baleg a responsabilidad pian itandoro so matua?
14 Siempre, nilikud ed saray Tasi nen Jehova et walaray nayarin mangibaga na katuaan tan manggunaet a magmaliw a matua. Balet, bilang lingkor na Dios, walaan itayo na nagkalautlan baleg a responsabilidad pian itandoro so matua. Nimatalek ed sikatayo iray katuaan na Biblia—saray katuaan a mangitonton ed sakey a too diad andi-anggaan a bilay. Kanian, walaan itayo na obligasyon ya inabang so pikakabat ed arum. “Anggan siopa a naikdan na dakel, dakel met so nasingil [“kaukolanen,” NW] ed sikato.” (Lucas 12:48) Maseguro a ‘dakel so kakaukolanen’ ed saramay apalaboan na mablin pikakabat na Dios.
15. Anton liket so naroromog yo diad panginabang ed katuaan na Biblia ed arum?
15 Wala so liket ed panginabang na katuaan na Biblia ed arum. Singa saray inmunan-siglon babangatan nen Jesus, iyaabawag tayo so maong a balita—sakey a makapaligsay-puson mensahe na ilalo—parad saramay ‘maermen tan abuybuyak, a singa saray karnero ya anggapoy pastol da’ tan ed saramay abulag tan awetwet ed “saray bangat na saray demonyo.” (Mateo 9:36; 1 Timoteo 4:1) Oniay insulat nen apostol Juan: “Anggapo so babaleg a liket ko nen say saya, salanti say pakadngel ko a saray ana’ko manaakar ira ed katuaan.” (3 Juan 4) Say inkamatoor na ‘ananak’ nen Juan—a nayarin saramay tinulongan ton makaaral na katuaan—so angitarok ed sikato na baleg a gayaga. Mangitarok ed sikatayo na gayaga so pakanengneng ed totoon onkikiwas lapud apresasyon da ed Salitay Dios.
16, 17. (a) Akin a say katuaan et ag-aawaten na amin? (b) Anton gayaga so naeksperiensya yo legan yon iyaabawag so katuaan na Biblia?
16 Tua, aliwan amin et mangawat ed katuaan. Sinalita nen Jesus so katuaan nipaakar ed Dios, anggano satan so ipupulisay na arum. Oniay inkuanto ed saray onsusumpan Judio: “Akin et agyo ak sisiaen? Say kayarian na Dios dengelen to so saray salita na Dios. Lapu ed saya agyo ra dengelen, nisengeg ed agkayo kayarian na Dios.”—Juan 8:46, 47.
17 Singa si Jesus, agtayo ikikibot so pangibaga na mablin katuaan nipaakar ed si Jehova. Agtayo iilaloan ya awaten na amin so ibaga tayo ed sikara, lapud inkuan nen Jesus ya aliwan amin et mangawat. Anggaman kuan, walaan itayo na gayaga ed pakaamtan gagawaen tayo so duga. Lapud maaron-kaabigan nen Jehova, kaliktan to a niparungtal so katuaan ed sankatooan. Bilang mangaakbibit ed katuaan, saray Kristiano so magmamaliw a manangakbibit na liwawa diad mundon walad kabilungetan. Diad pangiyabuloy tayo ed liwawa na katuaan ya onsinag panamegley na saray salita tan gawa tayo, natulongan tayo so arum a mangigloria ed mangatatawen ya Ama tayo. (Mateo 5:14, 16) Mapubliko tayon ipapaamta ya ipupulisay tayo so palson nengneng na katuaan nen Satanas tan itatandoro tayo so malinis tan ag-alaokan a Salitay Dios. Say katuaan a kabat tan inanabang tayo so mangipagamor na tuan kawayangan ed saramay mangawat ed satan.—Juan 8:32.
Gegemtanen so Kurang na Inkamatua
18. Akin tan panon ya impatnag nen Jesus so pabor ed Natanael?
18 Pinabli tan sinalita nen Jesus so katuaan. Legan na ministeryo to ed dalin, impatnag to so pabor ed saramay matua. Oniay kuan nen Jesus nipaakar ed si Natanael: “Nia, so sakey a peteg ya Israelita, a dia ed sikato anggapo so panamalingo.” (Juan 1:47) Diad saginonor et si Natanael, a nayarin tinawag met a Bartolomeo, so apili bilang sakey ed 12 apostoles. (Mateo 10:2-4) Agaylan pribilehyo!
19-21. Panon ya abendisyonan so datin bulag a too lapud makpel ya inkamatua to?
19 Walay sakey ya interon kapitulo ed libro na Biblia a Juan a mangisasalaysay ed sananey nin matuan too a benendisyonan nen Jesus. Agtayo amta so ngaran to. Say amta tayo labat et sikatoy sakey a mipapayabol tan bulag lan nianak. Mankelaw so totoo sanen impawil nen Jesus so pakanengneng to. Saray balita nipaakar ed satan a mamilagron inkatambal so akasabi ed pigara ed saray Fariseo, a managgula ed katuaan, a nannononong a siopaman a mangaagamil na pananisia ed si Jesus so napatakyas ed sinagoga. Lapud naamtaan da iyan getma, saray matakot ya atateng na datin bulag a too so nantila ed saray Fariseo, ya imbaga ran agda amta no panon ya akanengneng so anak da odino no siopa so amaabig ed sikato.—Juan 9:1-23.
20 Say apaabig a too so tinawag lamet ed arap na saray Fariseo. Imbaliwala to so antokaman a pansumpalan, a makpel ton imbaga so katuaan. Impaliwawa to no panon so inkatambal to tan no panon itan a ginawa nen Jesus. Lapud pankelawan to no akin ya agpanisiaan na sarayan prominente tan de-aral a totoo a si Jesus et nanlapud Dios, sayan apaabig a too so makpel ya amaseseg ed sikara a mamidbir ed ebidensya: “No sayan too agnanlapu ed Dios, anggapo komon so ayarian to a gawaen.” Lapud anggapo la so nisuppiat da, say too so inakusaan na saray Fariseo a sikato so mapalakbat kanian sikato so pinapaway da.—Juan 9:24-34.
21 Sanen naamtaan nen Jesus itan, simamaaro ton inanap iman a too. Sanen nalmo to, pinabiskeg to so pananisia ya impatnag na datin bulag a too. Si Jesus so maparungtal ya angipabidbir ed inkasikato bilang Mesias. Agaylay inkabendisyonan na saman a too diad impangibaga to ed katuaan! Maseguron niwala so pabor na Dios ed saramay mansasalita na katuaan.—Juan 9:35-37.
22. Akin a nepeg tayon gegemtanen so kurang na inkamatua?
22 Say pangagamil na katuaan et gegemtan a nepeg tayon ipapuso. Satan so makanakana ed pamaelet tan pamasiansia ed maong a pisisiglaotan ed totoo tan ed Dios. Say pagmaliw a matua et pagmaliw a maparungtal, tua, mainomay ya asinggeran, tan napanmatalkan, tan satan so pakagamoran na abobon nen Jehova. (Salmo 15:1, 2) Say pagmaliw a matila et pagmaliw a mapalikdo, agnapanpiyaan, tan palso, tan satan so ag-abobonan nen Jehova. (Uliran 6:16-19) Kanian, magmaliw a determinado a gegemtanen so kurang na inkamatua. On, pian naalig so Dios na katuaan, nepeg ya amtaen tayo so katuaan, salitaen so katuaan, tan manbilay unong ed katuaan.
Panon Yon Ebatan?
• Akin a misalsalamat itayo ed impakaamta tayo na katuaan?
• Panon tayon naalig si Jehova diad pagmaliw a matua?
• Antoray nagunggona ed panginabang na katuaan na Biblia ed arum?
• Akin ya importante a gegemtanen so kurang na inkamatua?
[Saray litrato ed pahina 17]
Lapud nimatalek ed sikara so katuaan na Biblia, saray Kristiano so maseseg a manginanabang ed satan diad arum
[Saray litrato ed pahina 18]
Say bulag a too a tinambal nen Jesus so abendisyonan a tuloy diad impangibaga to ed katuaan