Jehova, say Dios na Katuaan

“Sika dinondon mo ak, O Jehova, sika, Dios na katuaan.”​—SALMO 31:5.

1. Antoray kipapasen ed tawen tan dalin sanen anggapo ni so katilaan?

WALA so panaon nensaman ya anggapo ni so katilaan. Manaayam ed katawenan iray ayadyarin espiritun pinalsa, a panlilingkoran da so Manamalsa ra, say “Dios na katuaan.” (Salmo 31:5) Anggapo so katilaan, anggapo so panamalikdo. Ipapasabi nen Jehova ed saray espiritun ananak to no anto so matua. Ginawa to itan lapud inaro to ira tan sikatoy interesadon maong ed pankaabigan da. Ontan met so kipapasen diad dalin. Pinalsa nen Jehova so inmunan laki tan bii, tan diad panamegley na tinuro ton paralanan et lawas a sikatoy mitatalosan ed sikara diad malinew, diretsaan, tan matuan paraan. Talagan alay abig itan!

2. Siopa so angigapo na katilaan, tan akin?

² Balet diad saginonor et nampangaya so sakey ya espiritun anak na Dios sanen pinagmaliw toy inkasikato bilang kalaslasan a dios, a sumpa ed si Jehova. Kaliktan na sayan espiritun pinalsa ya akabat bilang Satanas a Diablo, a sikatoy dayewen na arum. Pian nagegemtan to so kalat to, inggapo to so katilaan bilang paraan pian nakontrol to so arum. Diad impanggawa to ed satan, sikato so nagmaliw a “matila, tan ama na tila.”​—Juan 8:44.

3. Panon so inkiwas nen Adan tan Eva ed saray katilaan nen Satanas, tan antoray resulta?

³ Diad panamegley na sakey ya uleg, imbaga nen Satanas ed inmunan bii, si Eva, a no ibaliwala to so ganggan na Dios tan mangan ed isesebel a bunga, sikato so ag-ompatey. Satan so sakey a tila. Imbaga to ni ed si Eva a no sikatoy mangan et sikatoy magmaliw a singa Dios, a makaamta na maong tan mauges. Tila met itan. Anggaman si Eva et agnin balot atilaan, binidbir to la komon a say nadngel to ed uleg et sumlang ed imbaga na Dios ed masiken ton si Adan. Balet ta sinisia to si Satanas, aliwan si Jehova. Lapud pirmin apalikdo, binodbor to so bunga tan kinan to. Diad saginonor et si Adan so angan met na bunga. (Genesis 3:1-6) Singa si Eva, agnin balot akadngel si Adan na tila, ingen ta sikato so ag-apalikdo. (1 Timoteo 2:14) Diad saray inkiwas to, impatnag to ya impulisay to so Amalsa ed sikato. Makapadesyang ed sankatooan iray nansumpalan. Lapud intunganga nen Adan, say kasalanan tan patey​—kalaktip lay kaugsan tan pirmin sinagem​—so kinmayat ed amin ya ilalak to.​—Roma 5:12.

4. (a) Anto so nengneng na saray katilaan diad Eden? (b) Anto so nepeg tayon gawaen ta pian ag-itayo nibalang nen Satanas?

⁴ Kinmayat met so katilaan. Nepeg tayon bidbiren a saraman a katilaan diad hardin na Eden so panangataki ed inkamatua nen Jehova a mismo. Inlolot nen Satanas a say Dios so mapalikdon mangikikibot na maong a bengatla ed inmunan sanasawa. Siempre, aliwan tua itan. Si Adan tan Eva so ag-agunggonaan ed intunganga ra. Inatey ira, unong ya imbaga nen Jehova a nagawa ed sikara. Anggaman kuan, nantultuloy so panagpauges nen Satanas ed si Jehova, anggad kalabas na saray siglo et apuyanan si apostol Juan a mangisulat a si Satanas so “mangibabalang ed interon panaayaman a dalin.” (Apocalipsis 12:9, NW) Pian ag-itayo nibalang nen Satanas a Diablo, nepeg a walaan itayo na sigpot a panagmatalek ed inkamatua nen Jehova tan ed Salita to. Panon yon nabayuboan tan napaelet so panagmatalek yo ed si Jehova tan napabiskeg yoy inkasikayo sumpad panamalikdo tan katilaan ya iyaalibansa na Kabusol to?

Amta nen Jehova so Katuaan

5, 6. (a) Anton pikakabat so wala ed si Jehova? (b) Panon a nikompara so pikakabat na too ed pikakabat nen Jehova?

⁵ Si Jehova so mabetbet a tutukoyen na Biblia bilang say “amalsa ed saray lapag a bengatla.” (Efeso 3:9) Sikato so ‘amalsa na tawen tan dalin, tan say dayat, tan saray amin a wala ed saratan.’ (Gawa 4:24) Lapud si Jehova so Manamalsa, amta to so katuaan nipaakar ed amin a bengatla. Pian niyilustra: Nonoten pa so sakey a toon nandesinyo insan angipaalagey ed mismon abung to, a sikaton amin so nankimey. Kabisado to so loob tan paway na abung tan walaan na mas dakel a pakaamta ed satan nen say siopaman a mangiimano. Kabisado na totoo iray bengatlan denisinyo tan ginawa ra. Mipadpara, amta na Manamalsa so amin a bengatlan nipaakar ed pinalsa to.

⁶ Alay dakep so impangideskribe nen propeta Isaias ed kalaknab na pikakabat nen Jehova. Oniay nabasa tayo: “Siopa ta so anukat na danum ed kutlaong na lima to, tan anukat na tawen ed dangan, tan say angilugan na dabok na dalin ed sakey a sukatan, tan animbang na saray palandey ed saray katiyan, tan saray pukdol ed sakey a simbangan? Siopa ta so angipanengneng na espiritu nen Jehova, odino anta sikato so manimbawa ed sikato, sikato so ibangat to? Siopa so angala na simbawa, tan siopa so angibangat ed sikato, tan angipaliwawa ed sikato na dalan na inkatunong, tan say angibangat ed sikato na pikakabat, tan angipatnag ed sikato na dalan na pakatalos?” (Isaias 40:12-14) Tua, si Jehova so “Dios na pikakabat” tan ‘ayadyari ed pikakabat.’ (1 Samuel 2:3; Job 36:4; 37:16) Agaylan kamelanting so pakaamta tayo no ikompara ed sikato! Anggaman ed makapadinayew a pikakabat ya atipon na sankatooan, say pakatalos tayo ed nanengneng a palsa so ag-anggan onabot ed ‘mapaway a kabiangan na saray dalan [na Dios].’ Satan so singa “esaes” no ikompara ed “karol.”​—Job 26:14.

7. Anto so binidbir nen David nipaakar ed pikakabat nen Jehova, tan anto met sirin so nepeg tayon bidbiren?

⁷ Lapud pinalsa itayo nen Jehova, makatunongan ya ibaga a kabat to itayon maong. Binidbir itan nen Arin David. Oniay insulat to: “O Jehova, sika sinukayan mo ak, et akabatan mo ak. Sika antam so kayuyurong ko tan say kakaalagey ko; sika natalosan mo so nonot ko a wala ni ed arawi. Sika sukayan mo so basbas ko tan say kadudukol ko, tan kabat mo so saray amin a kagagawak. Ta anggapo so sakey a salita dia ed dilak, noag say, nia, O Jehova, antam a sigpot.” (Salmo 139:1-4) Siempre, amoria nen David a saray totoo so bulos a makapandesisyon, ya inikdan itayo na Dios na pakasarag a mangunor odino ontunganga ed sikato. (Deuteronomio 30:19, 20; Josue 24:15) Anggaman kuan, mas kabat itayo nen Jehova nen say sikatayon dili. Kaliktan to so pankaabigan tayo, tan sikato so makayarin mangiwanwan ed saray dalan tayo. (Jeremias 10:23) On, anggapo lay managbangat, eksperto, odino managsimbawa a magmaong ya akinlongan a mangibangat ed sikatayo na katuaan tan manggawa ed sikatayon makabat tan maliket.

Si Jehova so Matua

8. Panon tayon naseguro a si Jehova et matua?

⁸ Say pakaamta ed katuaan so agmankabaliksan a say sakey so lawas mansalita na tua, salanti, say pagmaliw a matua. Alimbawa, denesidi na Diablo so ‘ag-ontalindeg ed katuaan.’ (Juan 8:44) Midumaan, si Jehova so “daakan ed . . . katuaan.” (Exodo 34:6) Mabetbet a pepekderan na Kasulatan so inkamatua nen Jehova. Indalatdat nen apostol Pablo ya ‘agnayarin mantila so Dios’ tan say Dios et ‘agto nayarian so manburi.’ (Hebreos 6:18; Tito 1:2) Say inkamatua so importantin kabiangan na personalidad na Dios. Nailaloan tan napanmatalekan tayo si Jehova lapud sikato so matua; agton balot palikdoen iray matoor ed sikato.

9. Panon a nisiglaot so ngaran nen Jehova ed katuaan?

⁹ Say mismon ngaran nen Jehova so mamaneknek ed inkamatua to. Say ngaran na Dios et mankabaliksan na “Pagmaliwen To.” Saya so mangipabidbir ed si Jehova bilang say tuloytuloy a Mananumpal ed amin ya insipan to. Sikato labat so makagawa ed satan. Lapud si Jehova so Supremon Sakey, anggapo so makaamper ed pakasumpal na saray gagala to. Aliwa lambengat a matua si Jehova noagta sikato lambengat so walaan na pakapanyari tan kakabatan a manumpal ed amin ya imbaga to.

10. (a) Panon a naimatonan nen Josue so inkamatua nen Jehova? (b) Antoran sipan nen Jehova so anengneng mo lan agawa?

¹⁰ Si Josue so sakey ed dakel ya akaimaton ed makatantanda iran ebento ya amekder ed inkamatua nen Jehova. Si Josue so walad Ehipto sanen indapo nen Jehova so samploran bakbak ed satan a nasyon, ya impasakbay To ni so kada sakey ed saratan. Nilikud ed saray bengatlan nipasakbay ya agawa la, naeksperiensya nen Josue so kasumpalan na saray sipan nen Jehova ya iliktar iray Israelita manlapud Ehipto tan iwanwan to ira ed Insipan a Dalin, a tinalo ra so mabiskeg iran armada na Canaanita ya onsusumpa ed sikara. Diad pansampot lay bilay to, onia so imbaga nen Josue ed saray mamasiken ed nasyon na Israel: “Amta yo ed simoon a puso yo tan ed simoon a kamarerwa yo, ya anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo, anggapo so sakey a bengatla a linmiwat ed sikara.” (Josue 23:14) Anggaman agmo naimatonan iray milagron anengneng nen Josue, naeksperiensyam la kasi so inkamatua na saray sipan na Dios kaleganay bilay mo?

Ipaparungtal nen Jehova so Katuaan

11. Anto so mangipatnag a kaliktan nen Jehova ya ipasabi so katuaan ed katooan?

¹¹ Isipen pa so sakey ya ateng a walaan na malaknab a pikakabat balet ta mataltalag a mitongtong ed ananak to. Agkayo kasi misalsalamat ta si Jehova et aliwan ontan? Si Jehova so maaron mitatalosan ed katooan, tan mabulos to itan a gagawaen. Sikato so tinawag na Kasulatan bilang “Baleg a Managbangat.” (Isaias 30:20, NW) Lapud maaron-panangasi to, sikato ni ingen so mitatalosan ed saramay ag-ondengel ed sikato. Alimbawa, si Ezequiel so niganggan a manpulong ed saramay kabat nen Jehova ya agmangawat. Oniay kuan nen Jehova: “Anak na too, onla ka, onsabi ka ed abung na Israel, tan salitaen mo ed sikara so saray salitak.” Insan to impasakbay: ‘Ag-ira naani ondengel ed sika; ta ag-ira naani met ondengel ed siak: ta amin ya abung na Israel anawet so moling da tan anawet so puso ra.’ Mairap itan ya asainmin, balet ta sitotoor itan a sinumpal nen Ezequiel, tan diad impanggawa to ed satan et impatnag to so panangabagey nen Jehova. No makapaangat ed sikayo so pampupulongan yo balet ta manmamatalek kayo ed Dios, makapankompiyansa kayo a pabiskegen to kayo a singa ginawa to ed si propeta Ezequiel.​—Ezequiel 3:4, 7-9.

12, 13. Diad antoran dalan ya akitalosan so Dios ed saray totoo?

¹² Pilalek nen Jehova ya “amin a [nengneng na] totoo nilaban ira komon, tan ondago ra ed pakapikabat ed katuaan.” (1 Timoteo 2:4) Sikato so akisalita panamegley na saray propeta, angheles, tan anggan panamegley na pinabpabli ton Anak, si Jesu-Kristo. (Hebreos 1:1, 2; 2:2) Oniay inkuan nen Jesus ed si Pilato: “Nisengeg ed saya nianak ak tan nisengeg ed saya linma ak dia ed mundo, pian tasian ko so katuaan. Balang sakey a kayarian na katuaan dengelen to so boses ko.” Si Pilato so walaan na mablin pankanawnawa pian naamtaan so katuaan a nipaakar ed probisyon nen Jehova parad kilalaban a direkta manlapud Anak na Dios. Balet, si Pilato so anggapo’d dapag na katuaan, tan agto labay so makaaral ed si Jesus. Imbes, oniay manduaruwan ebat nen Pilato: “Anto so katuaan?” (Juan 18:37, 38) Agaylan makapasinagem so ginawa to! Ingen ta dakel so tinmalineng ed katuaan ya inyabawag nen Jesus. Oniay kuanto ed saray babangatan to: “Mapalar so saray mata yo, ta makanengneng ira; tan saray layag yo, ta makadngel ira.”​—Mateo 13:16.

¹³ Pinansiansia nen Jehova so katuaan panamegley na Biblia tan pinawala to itan parad saray totoo a walad nanduruman pasen. Ipaparungtal na Biblia iray bengatla ed matuan paraan. Dedeskribien na satan iray atributos, gagala, tan ganggan na Dios, ontan met ed peteg a kipapasen na saray bengatla ed limog na katooan. Oniay inkuan nen Jesus diad pikakasi to ed si Jehova: “Say salitam sikato so katuaan.” (Juan 17:17) Lapud saya, say Biblia so nikaduman libro. Satan lambengat so nisulat ed silong na panangipuyan na Dios a makaamta ed amin a bengatla. (2 Timoteo 3:16) Satan so mabmablin langkap ed sankatooan, a papablien na saray lingkor na Dios. Makabat itayo no inagew-agew tayon basaen itan.

Ombemben a Malet ed Katuaan

14. Anto so pigaran imbaga nen Jehova a gawaen to, tan akin a sikatoy nepeg tayon panisiaan?

¹⁴ Nepeg ya ipapuso tayo so ibabaga ed sikatayo nen Jehova diad Salita to. Gagawaen to so labay ton pagmaliwan, tan gawaen to so imbaga to. Walaan itayo na amin a rason pian manmatalek ed Dios. Manisia itayo sano ibaga nen Jehova ya “iter to so panamales ed saray agmikabat ed Dios, tan dia ed saray ag-ontulok ed ebanghelyo na Katawan tayon Jesus.” (2 Tesalonica 1:8) Makapanmatalek itayo met ed si Jehova sano ibaga ton aaroen to iramay manggegemtan na inkatunong, sano ibaga ton pagamoran to na andi-anggaan a bilay iramay mangaagamil na pananisia, tan sano ibaga ton ekalen to so ot-ot, dageyem, tan anggan say patey. Indanet nen Jehova so inkanapanmatalkan na sayan unor a sipan diad impangiter to ed si apostol Juan na sayan bilin: “Isulat mo; ta saraya a salita sikara so matoor tan matua.”​—Apocalipsis 21:4, 5; Uliran 15:9; Juan 3:36.

15. Anto so pigaran katilaan ya ikakayat nen Satanas?

¹⁵ Si Satanas so midumaan a tuloy ed si Jehova. Imbes a liwawaan to iray totoo, papalikdoen to ira. Pian nagawaan to so getma ton ibeneg so totoo manlapud tuan panagdayew, ikakayat nen Satanas so dakerakel a katilaan. Alimbawa, labay nen Satanas a manisia itayon say Dios et ag-onapit ed sikatayo tan agto pibabalian so paniirap diad dalin. Ingen, ipapatnag na Biblia a si Jehova so mangiyaansakit a maong ed saray pinalsa to tan paneermenan to so kaugsan tan kairapan. (Gawa 17:24-30) Labay met nen Satanas a panisiaen so totoo a panagdarak labat na panaon so espiritual iran gegemtan. Misunian, ipapaseguro ed sikatayo na Kasulatan a “say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.” Niarum ni, malinew ya indalatdat na saratan a “sikato so magmamaliw a mananumang ed saramay masimoon a manaanap ed sikato.”​—Hebreos 6:10; 11:6.

16. Akin a nepeg a mansiansia iray Kristiano ya akabantay tan ombemben a malet ed katuaan?

¹⁶ Nipaakar ed si Satanas, oniay insulat nen apostol Pablo: “Say dios na sayan panaon binulag to so kaisipan da lapu’d agpanisia, pian say silew na ebanghelyo na gloria nen Kristo a sikato so talintao na Dios, agkomon onsinag ed sikara.” (2 Corinto 4:4) Singa si Eva, arum so pirmin apalikdo nen Satanas a Diablo. Arum so tinmumbok ed kurang nen Adan, ya agmet apalikdo balet ta inggagala to so kurang na katutunganga. (Judas 5, 11) Kanian, importante ya akabantay iray Kristiano tan ombemben ira a malet ed katuaan.

Kakaukolanen nen Jehova so ‘Pananisia ya Andian na Pankunkunwari’

17. Anto so nepeg tayon gawaen pian abobonan itayo nen Jehova?

¹⁷ Lapud sikato so matua ed amin a dalan to, kakaukolanen nen Jehova a magmaliw met a matua iramay mandadayew ed sikato. Oniay insulat na salmista: “Jehova, siopa naani manayam ed tabernakulom? Siopa naani manayam ed masanto a pukdol mo? Say manakar a mapmaptek, tan manggawa na matunong, tan mansalita na matua ed puso to.” (Salmo 15:1, 2) Parad saray Judio ya angikanta ed saratan a salita, say impanalambit ed masanton palandey nen Jehova so maseguron angipanonot ed Palandey Sion, ya angitarokan nen Arin David ed kaban na sipan diad tabernakulo ya impaalagey to diman. (2 Samuel 6:12, 17) Ipapanonot na say palandey tan tabernakulo so pasen a simbolikon nanayaman nen Jehova. Ditan et naasinggeran na totoo so Dios ta pian onkerew ira na pabor to.

18. (a) Anto so kakaukolanen na pikakaaro ed Dios? (b) Anto so singbaten ed ontumbok ya artikulo?

¹⁸ Siopaman a malabay a makapikaaro ed si Jehova so nepeg a mansalita na katuaan ‘ed puso to,’ ya aliwan dia labat ed saray ibebesngaw na bibil to. Saray tuan kakaaro na Dios so nepeg a walaan na puso a matua tan mangipatnag ed ‘pananisia ya andian na pankunkunwari,’ lapud saray gawa na inkamatua so manlalapud puso. (1 Timoteo 1:5; Mateo 12:34, 35) Say kaaro na Dios so aliwan manamalingo odino mapalikdo, lapud ‘kagula nen Jehova so manamalingo.’ (Salmo 5:6) Manbabanikel iray Tasi nen Jehova ed sankadalinan a magmaliw a matua diad pangaalig da ed Dios da. Sayan tema so singbaten ed ontumbok ya artikulo.

Panon Yon Ebatan?

• Akin ya amta nen Jehova so katuaan nipaakar ed amin a bengatla?

• Anto so mangipatnag a si Jehova et matua?

• Panon so impangiparungtal nen Jehova ed katuaan?

• No nipaakar ed katuaan, anto so kakaukolanen ed sikatayo?

[Saray litrato ed pahina 10]

Say Dios na katuaan so makaamta ed amin a bengatla nipaakar ed no anto so pinalsa to

[Saray litrato ed pahina 12, 13]

Nagawa iray sipan nen Jehova