Ag-inkaparpareho​—Kasin Ginetma Itan na Dios?

Say ebat ed sakey a salita et andi. Imanoen tayo no akin.

GINETMA na Dios ya amin a totoo so nawalaay namparan pankanawnawa pian panggayagaay bilay tan liket. Nipaakar ed inkapalsa na too, oniay nabasa tayo: “Inkuan na Dios, Manggawa itayo na too a kaulibay na inalageyan tayo, a singa say impanuulibay tayo: tan iter ed sikara so pakauley ed saray dayat, tan pakauley ed saray manok ya atap na dagem, tan pakauley ed ayayep ya amo, tan pakauley ed amin a dalin, tan pakauley ed amin a bengatla a korongkorong ed dalin.” Diad impakasumpal na panamalsa ed dalin, “Say Dios anengneng to so amin a bengatla a ginawa to, et nia maong iran tuloy.”​—Genesis 1:26, 31.

Kasin naiyabawag na Dios a “maong iran tuloy” iray makapaermen a kipapasen natan ya ag-inkaparpareho? Andin balot, lapud say ‘Dios et aro.’ (1 Juan 4:8) Nibabagan sikato et “anggapo so iduduma to” tan “ayadyari so gawa to, ta kaptekan so saray amin a dalan to: sakey a Dios a napanmatalkan tan anggapo so kaugsan, sikato so matunong tan maptek.” (Deuteronomio 10:17; 32:4; ikompara so Job 34:19.) Tan inkuan nen apostol Pedro: “Tua a nanengneng ko a say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.”​—Gawa 10:34, 35.

Lapud say Dios et maaro, agmangidumaduma, maalas, maptek, tan matunong, panon ton nayarin palsaen so totoon walaay atawir ya ag-inkaparpareho no nipaakar ed kanepegan dan panggayagaay liket? Say pangiyabuloy ed panangibiigbiig ed limog na totoo tan ipasen ira ed sisteman walaay ag-inkaparpareho so sigpot a mikontraan ed personalidad to. Ginetma to ya amin da et “nianak a bulos tan anggapoy nilabi ed kagalangan tan saray kanepegan.” Ingen, natan et aliwa lan ontan iray mapatnag a nagagawa. Akin ya andi?

Say Sengegan na Ag-inkaparpareho

Say impamalsa na Dios ed totoo ya anggapoy nilabi so agmankabaliksan a ginetma ton amin da et nampapara ed amin a pamaakaran. Mandurumaan ira no nipaakar ed saray talento, paninteresan, tan personalidad. Nayari met a mandurumaan ira ed posisyon odino ed laknab na pakauley. Alimbawa, say laki tan bii so aliwan pareho ed amin a pamaakaran, balet pinalsa na Dios so bii bilang “katulongan” na laki. (Genesis 2:18) Mapatnag a mandumaan iray atateng tan ananak ed pakauley. Balet, anggaman ed sarayan pandurumaan, amin​—lalaki, bibii, tan ananak​—so makapanggayaga ed anggapoy nilabin kanepegan ya inter-Dios iran pankanawnawa pian napenek so manuna iran kakaukolanen parad liket. Panggayagaan dan amin so anggapoy nilabin kagalangan tan talindeg ed arap na Dios.

Ontan met, saray espiritun ananak na Dios, ya apalsa sakbay na totoo et naikdan na miduma iran asainmin tan responsabilidad. (Genesis 3:24; 16:7-11; Isaias 6:6; Judas 9) Anggaman kuan, diad saray limitasyon a niiter ed sikara, parparehon panggayagaan na amin iray probisyon na Dios parad bilay tan liket. Nipatnag da sirin so agpanangidumaduma na Dios diad makapakelaw a paraan.

Makapaermen, walay sakey ya espiritun palsa ya agkontento ed agmanangibiig ya uksoyan na Dios. Agto pankontentoan so inter la’d sikato na Dios, a panpipirawatan toy atagtagey, mas nitandoro, a posisyon. Diad impamayubo to ed sayan makapuy a pilalek, impangaya toy inkasikaton milaslasan ed si Jehova, a bilang Manamalsa et walaay kanepegan a mamemben ed posisyon na inkasupremo ed ami-amin. Diad saginonor, tinangguyor na sayan rebelyoson espiritun anak na Dios iray totoo pian anapen da ed Dios so bengatlan mas ni nen say inter To la’d sikara. (Genesis 3:1-6; ikompara so Isaias 14:12-14.) Sirin, ompatnag a say probisyon nen Jehova parad totoo a panggayagaay bilay tan liket so abangking a maong. Sayan rebeldin espiritu, ya abidbiran diad Apocalipsis 20:2 bilang “Diablo tan Satanas,” so nagmaliw a mauges a managsugsog ed ag-inkaparpareho na totoo.

Nauman ni Kasi Iray Bengatla?

Say ebat ed sakey a salita et on! Balet siopay makapangitarok ed nakaukolan iran pananguman? Akipuligesgesan iray lider a totoo, a seguradon say arum et masimsimoon, ed loob lay dakel a siglo pian gawaen itan. Limitado so itatalona ra, ya angitonton la ingen ed pangibabaga na dakel a totoo ya aglan balot nasolbar so probleman nipaakar ed ag-inkaparpareho na totoo. Balet, say panmoria na Dios et nirekord ed Isaias 55:10, 11: “Unong a say uran tan say musiak a lurem onlasor ira a manlapu ed tawen, et ag-ira ompawil diman noag ingen salogen da so dalin, tan pambungaen da tan panbukelen da, tan pangitdan to na bini ed saray managtanaman tan tinapay ed manangan. Ontan met naani so salitak ya ompaway ed sangik; sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangyakaran ko ed sikato.”

Agaylan makaligliwan naamtaan ya inyabawag la nen Jehova a Dios a sumpalen toy orihinal a gagala to pian niiter ed amin a totoo iray parparehon pankanawnawa parad bilay tan liket! Bilang Dios na katuaan, sumpalen ton sumpalen so insipan to. Makapaliket, sikato so walaay panlabayan tan pakayari pian gawaen itan. Panon ton sumpalen iya?

Say solusyon so akadependi ed Panarian, a nipaakar ed satan et imbangat nen Jesu-Kristo ya ipikasi na amin a papatumbok to: “Ama min wala ka ed tawen, . . . Onsabi komon so panarian mo. Nagawa komon so linawam, unong ed tawen, ontan met ed dalin.” (Mateo 6:9, 10) On, say Panarian na Dios so paraan ya usaren nen Jehova pian “buybuyaken to naani tan upoten to naani so saraya ya amin a panarian [a wala natan], et sikato so mansiansia lawas.”​—Daniel 2:44.

Diad silong na uley na mangatatawen a Panarian, niwala so balon sosyedad na totoo. Nipaakar ed saya, insulat nen apostol Juan ed kaunoran a libroy Biblia, say Apocalipsis: “Akanengneng ak na sakey a tawen a balo tan sakey a dalin a balo: ta say say una a tawen tan say una a dalin linmabas ira.” (Apocalipsis 21:1) Naandi lan amin so makapuy ya aspekto na ag-inkaparpareho​—inkaduka, sakit, inka-ignoranti, panangidumaduma, tan arum nin paniirapay totoo.a

Diad loob na masulok lan sakey a siglo, ipapaimano la na Tastasi nen Jehova ed totoo so nipaakar ed satan a Panarian. (Mateo 24:14) Diad panamegley na niimprintan pahina tan diad panamegley na personal ya itutulong, isesekar da lay inkasikara pian tulongan so totoon makagamor na pikakabat a nipaakar ed gagala na Dios a nirekord ed Biblia. Anggaman ontan, say sankamundoan a kimey dan panagbangat so aglambengat mangiiter ed totoo na ilalon manbilay a walaay inkaparpareho tan liket ed arapen noagta mangungguna met natan diad pamaer ed pangaapekta na ag-inkaparpareho. Nengnengen tayo no panon.

[Paimano ed leksab]

[Blurb ed pahina 5]

Ginetma na Dios ya amin a totoo so walaan na anggapoy nilabin pankanawnawa parad bilay tan liket