Pamaer ed Pangaapekta na Ag-inkaparpareho
Magano lan itarok na Manamalsa so inkaparparehon panpirpirawatan na totoo. Anggad natan, anggan panon et makapanggawa tayoray kundang pian napaer so pangaapekta na ag-inkaparpareho ed sikatayo tan ed saray pamilya tayo. Singa say inkuan nen Nelson Mandela, datin presidenti na Abalaten ya Aprika, “say pangusar tayo’d walad sikatayo, aliwan no antoy niiter ed sikatayo, so mangibiig ed sakey a too manlapud arum.”
SARAYAN salita to so pinaneknekan na awaran. Dakel a lalaki tan bibii so naikdan na daiset manlapud inkianak da balet, diad impangusar da’d walad sikara et arapat da iray aligwas ya angibiig ed sikara manlapud saray nayarin mas alangkapan a kalimog da. Midumaan, arum ya indibidual a mayamyaman ya apapalar na dakel a paninawaan manlapula’d inkianak da so nandarak ed walad sikara tan agda inusar ed maabig a pansumpalan da.
Usaren a Maong so Walad Sikayo!
Interesadon tuloy iray Tastasi nen Jehova ya ontulong ed totoo a makagamor na pikakabat ed saray gagala na Dios diad panamegley na panagaral na Biblia. Balet, namomoria ran pian nagunggunaan a sigpot ed impormasyon a manlapud Biblia, nepeg a makabasa tan makapansulat so totoo. Makasengeg ed satan, binangatan na Tastasi nen Jehova so sinamplon libo a totoo pian makabasa tan makapansulat, a laktipen toy 23,000 a totoo (dia ed kapegleyan na dekaday 1990) diad sakey lambengat a bansa ed Sagur ya Aprika. Nipaakar ed matalonggaring a serbisyo ya itatarya na Tastasi nen Jehova ed sosyedad, oniay impaimano na San Francisco Examiner: “Naipasen yo iran napanuliranan a mibabaley. Mapeleng iran manbayar na buis, mangasikasoy mansasakit, manalona ed ag-impakapanaral.”
Niarum ni, diad panamegley na tuloytuloy a kurso nipaakar ed panagpaliwawa ed publiko, nipapasal la na Tastasi nen Jehova so nilasus nilibo a totoo pian magmaliw iran kualipikadon managpaliwawa, a marmarlas la iran makapansalita diad publiko. Arum ed sarayan nilibo so datin walaay pirmin deperensya ed panagsalita. Konsideraen pa so insulat na lakin taga-Abalaten ya Aprika: “Grabe lay inkabaer ko kanian nagmaliw ak a mabaing, a naynay ak a mandedependi ed arum a mansalita parad siak. . . . Sanen akibiang ak ed Teokratikon Eskuelaan Parad Panagministro tan kaukolan kon basaen so Biblia ed arap na daiset a dumerengel . . . , nabaer ak la kanian agko asumpal so betang ko ed nigeter ya oras. Kayari na aral et mapangasin angiter ed siak [so managkonseho] na praktikal a simbawa. Insuheri ton man-insayo ak diad pambasan maksil. Kanian onmay ginawak, ya angipanaon ak ed agew-agew, a manbabasan maksil ed Bibliak tan say magasin a Panag-Bantayan.” Inmaligwas a maong iyan too kanian sikato la natan so mangiiter na saray diskurso ed publiko a manbilang na nilasus, nilibo ni ingen.”
Panggayagaan so Inkaparpareho ed Limog na Agagi
No nipaakar ed edukasyon, kaasikaso ed bunigas, tan kipapasen ed ekonomya tan bilay, mandurumaan a maong iray sirkumstansia ed limog na Tastasi nen Jehova. Sarayan pandurumaan so mangipatnag lambengat ed ag-ayadyarin kipapasen ed mundon pambibilayan da. Balet midumaan ed arum niran relihyoson grupo, ngalngali la naandi ed limog da so pandurumaan a nisesengeg ed rasa, sosyal, tan ekonomya.
Nagagawaan da iya diad pansasagpot dan agamilen so naaralan da manlapud Biblia. Intiron-puso ran iyaaplika iray prinsipyo na Biblia a singa say: “Si Jehova aliwa a singa say too ya onnengneng; ta say too onnengneng ed mapaway a nengneng, balet si Jehova onnengneng ed puso.” (1 Samuel 16:7) “Say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.” (Gawa 10:34, 35) “Aleg ya itumang yo ed anggan siopa so mauges ed mauges. Pansesegan yo so saray bengatla a makapagalang ed arap na ganagana a totoo. No nayari, dia ed anganggaan na nayarian yo, manayam kayo ed kareenan ed ganaganay totoo.”—Roma 12:17, 18; nengnengen met so 1 Timoteo 6:17-19; Santiago 2:5, 9.
Diad maapit ya itutumbok ed sarayan prinsipyo na Biblia a mangiyaalibansay pankakasakey, ag-aabuloyan na Tastasi nen Jehova so antokaman a panagamil na ag-inkaparpareho diad limog da lapud pandurumaan ed rasa, sosyal, odino ekonomya. Alimbawa, aliwan basiyan irayan bengatla diad pandesidi no siopay ikdan na saray pribilihyo ed serbisyo diad loob na Kristianon kongregasyon. Saray posisyon na responsabilidad, singa say panagbangat tan panangasikaso, so niiter lambengat a nibase ed maespiritual iran kualipikasyon.—1 Timoteo 3:1-13; Tito 1:5-9.
Parad saray indibidual a nidudunget ed ag-inkaparpareho ed mundon walaay panaglabi, agaylan makaparepresko ya itratrato ira na arum bilang agagin lalaki tan bibii a walaay miparan talindeg ed Manamalsa ra! Napaneknekan iya nen Martina. Kayarin tinaynan na ama to so pamilya ra, sikatoy binmaleg a pobri, diad ayaman a saksakey so ateng. Sikatoy mabetbet a tratoen a singa kinaindan lay sosyedad, ya anggapoy tanton talek to ed inkasikaton dili, tan nairapan a mideneng ed arum. Abayuboan toy awawey ya agmanginennenen. Balet, anguman iray bengatla sanen sikatoy nanaral lay Biblia insan nagmaliw a sakey ed Tastasi nen Jehova. Inkuan to: “Siansia nin nepeg kon labanan so negatibon panag-isip, balet natan et mas sarag ko lan talonaan so problema. Inmaligwas so respetok ed inkasiak, tan mansasalita ak lan mas makompiyansa. Lapu ed katuaan et nagmaliw ak a responsabli. Natan et kabat ko lan inaro to ak nen Jehova tan say bilay so makanakanan usaren.”
Bilang sakey ya internasyonal a grupo na Kristianos, saray Tastasi nen Jehova ed masulok a 230 a bansa so manggagayaga ed sakey a sukat na inkaparpareho a talagan nikadkaduma ed walan mundo natan. Nayarian kasi na arum a relihyoson organisasyon ya ibaga met so ontan tan napaneknekan met itan ed panamegley na gawa?
Siempre, saray Tastasi nen Jehova et realistiko. Mabulos dan aaksobien lapud epekto na ag-ayadyarin kaliberliber et agda nayarian ya ekalen so ag-inkaparpareho ed totoo ya aliwan singa say arum a manasalin manggawa ed satan ed loob la na saray siglo—balet ta sinmaew. Anggaman kuan, panliliketan da a diad limog da et dakerakel lay ginawa ra pian paeren iyan makapatey a salot. Tan tekep na mabiskeg a pananisia ed sipan na Dios, iilaloan day sakey a balon mundo na inkatunong ya anggapo lan balot so ag-inkaparpareho.
On, amin a matulok a totoo so magano lan nipawil ed inkaparpareho a “walaay kagalangan tan saray kanepegan” ya inggagala lay Manamalsa ra parad sikara pian panggayagaan da itan. Agaylan abig a nonoten! Tan diad sayan pankanawnawa et magmaliw itan a petepeteg!
[Litrato ed pahina 7]
Tatalonaan na Tastasi nen Jehova so ag-impakapanaral diad pangibabangat da ed sinamplon nilibo a totoo a manbasa tan mansulat
[Litrato ed pahina 8]
Ontulong so katuaan na Biblia pian sigpot a naekal iray panangidumaduma lapud rasa, sosyal, tan ekonomya