Onsabi la so Pamakepa ed Eras!

‘ANTON klase na eras?’ nayarin itepet yo. Eras nipaakar ed espiritual a tagano! Sayan eras so impasakbay na sakey a Hebreon propeta nensaman: “Nia, onsabi ray agew, kuan nen Katawan a Jehova, a payakar ko naani so eras ed dalin, aliwa ya eras ed tinapay, odino pega ed danum, noag ingen pandengel ed saray salita nen Jehova.” (Amos 8:11) Pian ontulong a mamakepa ed espiritual ya eras, say 48 a membro na koma-112 a klase na Watchtower Bible School of Gilead, a naromog ed Patterson, New York, so ibaki ed 19 a nanduruman bansa ed 5 kontinente tan isla na dayat.

Sikaray ibaki ya akinlongan na aliwan say literal a tagano, noagta pikakabat, eksperiensya, tan inkipasal. Diad loob na limaran bulan et sikaray akibiang ed impasyan panagaral ed Biblia ya adesinyon mamabiskeg ed pananisia ra parad misionaryon serbisyo diad biek-taew. Nen Marso 9, 2002, say 5,554 ya inmatendi ed programa na impangraduar so dinmengel tan aliketan.

Si Stephen Lett, a manlilingkor bilang membro na Mananguley ya Ulop na Tastasi nen Jehova, so maligsan angilukas ed programa. Nagkalalo lan inabrasa to iray dakel a bisita manlapud nanduruman parte na mundo. Insan to intuloy ya inyaplika iray salita nen Jesus a, “Sikayo so silew na mundo” ed kimey na saray man-misionaryo. (Mateo 5:14) Impaliwawa to: ‘Diad saray asainmin yo et “liwawaan” yo so nanduruman aspekto na makapakelkelaw iran kimey nen Jehova, ya ontulong ed saray matuan-impanpuso a makanengneng ed karakpan nen Jehova tan saray gagala to.’ Pinaseseg nen Brother Lett iray misionaryo a mangusar ed liwawa na Salitay Dios pian iwalwal so kabilungetan na palso iran doktrina tan mangiwanwan ed saray manaanap na katuaan.

Importante so Suston Awawey Pian Ontalona

Kayari na manangilukas iran komento na tsirman, si Baltasar Perla, a membro na United States Branch Committee, so angipaliwawa ed unaan ed saray serye na paliwawa ya inggana pian ontulong ed saray nangraduar ya ontalona bilang misionaryo. Tinibukel to so teman “Manpabiskeg Ka tan Manpakpel Ka.” (1 Awaran 28:20) Si Arin Solomon na Israel nensaman so akaawat na mairap ya asainmin ya agto ni agawaan a balot​—say pangipaalagey na templo ed Jerusalem. Kinmiwas si Solomon, tan diad tulong nen Jehova et asumpal so templo. Diad impangiyaplika to ed leksion diad klase, inkuan nen Brother Perla: ‘Akaawat kayo na balon asainmin, salanti, say pagmaliw a misionaryo, tan kaukolan yo so manpakpel tan manpabiskeg.’ Talagan aligliwa iray estudyante ed panamaseguro ya ag-ira kaindanan nen Jehova daput no sikaray mansiansian maapit ed sikato. Pinakiwas nen Brother Perla so kapusoan na saray dumerengel diad impangisampot to ed personal a komento to: ‘Dakel so nagawaan yo a maabig bilang misionaryo. Saray misionaryo so angitarok na katuaan ed pamilya mi!’

“Manilalo ed si Jehova Parad Italona” so teman impaliwawa nen Samuel Herd, membro met na Mananguley ya Ulop. Onggapo iray estudyante ed sakey a karera diad panagmisionaryon kimey, tan say italona ra so mandependi a maong ed relasyon da ed si Jehova. Sikaray binilin nen Brother Herd: ‘Dakel so agamoran yon pikakabat ed Biblia diad impanaral yo ed Gilead. Malikeliket kayo ya akaawat. Balet natan, parad peteg ya italona, onggapo kayon manginabang ed naaralan yo.’ (Gawa 20:35) Saray misionaryo so nawalaan na dakel a pankanawnawa a manggawa ed saya legan dan ‘isasaklang so inkasikara’ nisengeg ed arum.​—Filipos 2:17.

Antoray panamatanir a konseho na saray instruktor parad saray estudyante? Imbase nen Mark Noumair so tema to ed Rut 3:18, unong ed New World Translation: “Onyurong Ka a Maligen Anggad Naamtaan Mo No Panon so Pansumpalan na say Bengatla.” Diad impangusar to ed ehemplo nen Noemi tan Rut, pinaseseg na espiker iray nangraduar a sigpot a mankompiyansa ed saray uksoyan ya inletneg na mangaraldalin ya organisasyon na Dios tan manrespeto ed teokratikon autoridad. Diad impanenyeg ed kapusoan na saray estudyante, inkuan nen Brother Noumair: ‘Nayarin walaray panaon sano agyo natalosan no akin ya agawa so desisyon a mangaapekta ed sikayo odino sano walaan kayo na mabiskeg a liknaan a duma komon so paraan a panggawa ed sakey a bengatla. Anto so gawaen yo? Kasin onkiwas kayon tampol tan gawaen yo ed inkasikayo so pamaakaran odino ‘onyurong kayo a maligen,’ a manmatalek ed panangiwanwan na Dios, a mankompiyansa a nasabi panaon et sikatoy mamawala labat na maong a resulta’? (Roma 8:28) Say simbawan ‘iyapasakey ed pangiyalibansa ed intereses na Panarian, a manimano ed gagawaen na organisasyon nen Jehova imbes a diad saray totoo,’ so maseguron napaneknekan a makana parad saray asainmin na saray man-misionaryo ed biek-taew.

Si Wallace Liverance, a nanlingkor met a misionaryo tan manlilingkor natan bilang instruktor ed Gilead, so angiter ed unor a diskurso ed manangilukas iran serye. Say tema na paliwawa to so “Mansiansian Niyapasakey, Mansiansia ed Serbisyo ed Dios.” Impabitar to ya atebek nen propeta Daniel manlapud impakanengneng to ed inkagba na Babilonia tan manlapud impasakbay nen Jeremias ya asingger lay kibulos na saray Israelita manlapud inkakautibo. (Jeremias 25:11; Daniel 9:2) Kabat nen Daniel so panag-orasan nen Jehova, tan satan so tinmulong ed sikaton mansiansian niyapasakey ed kiparungtal na gagalay Dios. Diad pidumaan, inkuan na saray Israelita ed panaon nen propeta Aggeo: “Aliwa nin panaon ya onla itayo.” (Aggeo 1:2) Agda inyapasakey so imano ra ed panaon a pambibilayan da, noagta inyapasakey da ed dili iran pakainawaan tan dilin-pakapenekan da, tan kinaindan da so kimey ya inkibulosan da manlapud Babilonia, say pangipaalagey lamet ed templo. Sinampotan nen Brother Liverance: “Kanian mansiansian niyapasakey diad pantultuloy a pannonot ed gagala nen Jehova ed amin a panaon.”

Indaulo na instruktor na Gilead a si Lawrence Bowen so parte ya atemaan na “Bebendisyonan nen Jehova Iraman so Manguusar ed Mabilay a Salita.” (Hebreos 4:12) Sayan betang so nipaakar ed saray eksperiensya na klase diad lawak na kimeyan, a mangipapabitar ed no panon a bebendisyonan nen Jehova iramay manguusar ed Biblia sano manpupulong tan manbabangat. Impabitar na angidaulo ya angiletneg si Jesu-Kristo na maabig ya ehemplo parad saray ministro na Dios: ‘Peteg a nayarian nen Jesus ya ibaga a say imbangat to et agto kien, noagta sinalita to so Salita na Dios.’ Nibiig na saray matuan-impanpuso so katuaan tan kinmiwas iran paborabli ed satan. (Juan 7:16, 17) Ontan met natan.

Say Panangipasal ed Gilead so Manginlong ed Sakey Parad Amin a Maabig a Kimey

Tinmumbok et ininterbio na saray abayag lan membro na pamilya na Bethel a di Richard Abrahamson tan Patrick LaFranca so anemiran nangraduar ed Gilead a manlilingkor natan ed nanduruman nengneng na nikaduman sigpot-panaon a serbisyo. Apaseseg iray nangraduar ed koma-112 a klase ed impakadngel da a diad inlabas na saray dekada et saraman ya anemira, antokaman so peles ya asainmin da, so mantutultuloy a manguusar ed agamoran dan panangipasal diad Gilead nipaakar ed panangiyaral na Biblia, panagsukimat, tan diad pidedeneng ed saray totoo.

Si Theodore Jaracz, membro na Mananguley ya Ulop, so angipaliwawa ed kapantokan a diskurso ed programa. Satan so apauloan na “No Anto so Nagagawaan Diad Pansusungdo ed Satanikon Panggula.” Legan na apalabas a limaran bulan, saray estudyante so nanayam ed maligen tan teokratikon kaliberliber. Anggaman ontan, unong a nipabitar ed klase ra, sikatayo so manbibilay ed kabusol a mundo. Saray totoo nen Jehova so aatakien diad sankamundoan. (Mateo 24:9) Diad impangusar ed pigaran salaysay na Biblia, impabitar nen Brother Jaracz a sikatayo so ‘nagkalalo lan puntirya na Diablo. Nepeg tayon pabiskegen so relasyon tayo ed si Jehova tan manpakpel pian nasungdoan iray subok.’ (Job 1:8; Daniel 6:4; Juan 15:20; Apocalipsis 12:12, 17) Sinampotan nen Brother Jaracz ya anggaman mantutultuloy so panggula sumpad totoo na Dios, ‘anggapo so ayura ya agawan ontalona a sumpad sikatayo, unong ya ibabaga na Isaias 54:17. Seguroen nen Jehova a sikatayo so niliktar ed dilin panaon tan paraan to.’

Lapud “sigpot ya akinlongan,” maseguron baleg so nagawaan na saray nangraduar ed koma-112 a klase na Gilead pian pakepaen so eras ed espiritual a tagano diad saray bansa a panserbian da. (2 Timoteo 3:16, 17) Magunaet tayon talaranan iray report nipaakar ed no panon dan itulor so makapabunigas a mensahe ed totoo diad saratan a bansa.

[Kahon ed pahina 23]

SARAY ESTADISTIKA NA KLASE

Bilang na saray nirepresentan bansa: 6

Bilang na saray bansan angiyasainan: 19

Bilang na saray estudyante: 48

Promedyon edad: 33.2

Promedyon taon ed katuaan: 15.7

Promedyon taon ed sigpot-panaon a ministeryo: 12.2

[Litrato ed pahina 24]

Koma-112 a Nangraduar a Klase na Watchtower Bible School of Gilead

Diad listaan ed leksab, saray dasig so anumeroan a manlapud arap a pabeneg, tan saray ngaran so akalista manlapud kawigi a manpakawanan ed kada dasig.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.