Mangitarok na Mayaman a Tumang so Panakar ed Dalan nen Jehova

ASALIM ta lay nanakar a tinmatdang ed kapalandeyan? No asalim la, maseguron aliknam a singa ka walad tagey na mundo. Agaylan makapalikliket so isungap na preskon dagem, ibantag ed arawi, tan pangimano ed karakpan na palsa! Nayarin saray kapagaan mo et singa baliwala.

Mataltalag itan a panagpasyar parad maslak a totoo, balet no sakey kan dedikadon Kristiano, nayarin manaakar ka la ed mapalandey a lugar diad espiritual a pantalos. Singa say salmista nensaman, seguradon impikasim la: “Iparungtal mo ed siak so saray dalan mo, O Jehova; ibangat mo ed siak so saray basbas mo.” (Salmo 25:4) Kasin nanonotan mo ni no antoy liknaan mo sanen primeron tinmatdang ka ed palandey na abung nen Jehova tan nanakar ka ed niyatagey iran pasen? (Miqueas 4:2; Habacuc 3:19) Maseguron amoriam a tampol a say panakar ed sarayan niyatagey a basbas na puron panagdayew so analimbeng tan amaliket ed sika. Nayarin aliknam met iray alikna na salmista: “Mapalar so katooan ya amta to so mandayew ed sikan magaygayaga: manakar ira, O Jehova, ed liwawa na lupam.”​—Salmo 89:15.

Balet, no maminsan et saray ontatatdang ed kapalandeyan so kaukolan a manbunek diad andukey tan mapareng iran tatatdangen. Napakel iray bikking da, tan onkapuy ira. Naeksperiensya tayo met iray kairapan ed serbisyo tayo ed Dios. Nayarin diad agano ni et makapakesaw iray kundang tayo. Panon tayon nagamoran lamet so biskeg tan gayaga tayo? Say unonan kundang et say pamidbir ed inkasupremo na saray dalan nen Jehova.

Nitandoro Iran Ganggan nen Jehova

Saray dalan nen Jehova so ‘atagtagey nen saray dalan na too,’ tan say panagdayew to so ‘niletneg ed toktok na saray palandey.’ (Isaias 55:9; Miqueas 4:1) Say kakabatan nen Jehova so ‘kakabatan a manlapu ed tagey.’ (Santiago 3:17) Saray ganggan to so atagtagey nen saray arum. Alimbawa, sanen inagamil na saray taga-Canaan so maruksan panagbagat ed ugaw, inikdan nen Jehova iray Israelita na saray ganggan a mangiyalangon ed sikara diad moral tan nipabitar lapud panangabagey. Inkuan to ed sikara: “Agmo nepeg ya ilikud so inkatoo na duka, nisay galangen mo so inkatoo na makapanyari. . . . Say sankaili . . . nibilang a singa say nianak ed abung yo, tan aroen mo naani a singa sika a dili.”​—Levitico 19:15, 34.

Linmabas so labinliman siglo, angiter si Jesus na dakel nin alimbawa nipaakar ed ‘matalonggaring a ganggan,’ nen Jehova. (Isaias 42:21, NW) Diad Sermon ed Palandey, inkuanto ed saray babangatan to: “Aroen yo ray kabusol yo, tan pikasi iray mamasegsegang ed sikayo; pian nayarian yoy magmaliw ya anak ira nen Ama yon wala ed tawen.” (Mateo 5:44, 45) Inyarum to: “Amin a bengatla sirin a labay yo a gawaen na totoo ed sikayo, ontan so gawaen yo met ed sikara; ta sikato’ya so Ganggan tan sinalita na saray Propeta.”​—Mateo 7:12.

Sarayan niyalangon a ganggan so walaan na epekto ed kapusoan na mainomay ya onkiwas a totoo, ya amakiwas ed sikaran mangalig ed Dios a dadayewen da. (Efeso 5:1; 1 Tesalonica 2:13) Isipen pa so panamasimbalo ya agawa ed kaso nen Pablo. Sanen sikatoy primero tayon naamtaan, “akinonongan to so impatey” nen Esteban tan “pinapairap to so iglesia.” Apalabas so pigaran taon, sikatoy akideneng lan matamoy ed saray Kristiano diad Tesalonica a singa “sigsiwa a managano na dilin anak to.” Pinasimbalo na madibinon bangat si Pablo, manlapud manamasegsegang a nagmaliw a manangiyansakit a Kristiano. (Gawa 8:1, 3; 1 Tesalonica 2:7) Sikatoy peteg a misalsalamat ta say personalidad to et minolde na bangat nen Kristo. (1 Timoteo 1:12, 13) Panon a say mipadparan apresasyon so ontulong ed sikatayon mansiansian manakar diad nitandoro iran basbas na Dios?

Panakar Tekep na Apresasyon

Panliketan na saray ontatatdang ed palandey iray alay abig a nabantag da manlapud tagey. Panliketan da met iray ankelag a bengatla a nadalanan da, a singa say nikaduman bato, masanting a rosas, odino pakanengneng ed atap ya ayep. Diad espiritual a pantalos, kaukolan tayoy magmaliw ya alerto ed saray tumang​—baleg man odino melag​—a nagamoran diad panakar a kaibay Dios. Satan a pikabat so mamakasil lamet ed sikatayo tan pagmaliwen ton makapaligsa so makapakesaw a panakar. Onabobon itayo ed saray salita nen David: “Ipadngel mo ed siak so maaro ya abig na linawam no ontan a kabuasan; ta sika so panmatalkan ko; ipaamtam ed siak so dalan a nepeg ko a dalanan.”​—Salmo 143:8.

Si Mary, a dakel lan taon a manaakar ed saray basbas nen Jehova, kuanto: “Sano imanoen ko so palsa nen Jehova, natebek ko met ed satan so maaron personalidad na Dios ya aliwa labat lan say komplikadon desinyo. Balanglan ayep, manok, odino insekto itan, balang sakey so walaan na dilin pakapangibiigan tan makapasagyat a tuloy. Nagamoran met so gayaga manlapud espiritual iran katuaan ya onlilinew diad ilalabas na saray taon.”

Panon tayon napaaralem so apresasyon tayo? Say sakey et diad agpangibaliwala ed gagawaen nen Jehova ed sikatayo. ‘Manpikasi ya andi-tunda,’ insulat nen Pablo. “Dia ed amin a bengatla misalamat kayo.”​—1 Tesalonica 5:17, 18; Salmo 119:62.

Ontulong ed sikatayo so personal a panagaral pian nabayuboan so maapresyan awawey. Pinaseseg nen Pablo iray Kristiano ed Colosas: “Mantultuloy a manakar a kaiba nen [Kristo Jesus] . . . a manleppua ed pisasalamat tekep na pananisia.” (Colosas 2:6, 7, NW) Say pambasa ed Biblia tan pandalepdep ed no anto so abasa tayo et mamabiskeg na pananisia tayo tan mangiyapit ed sikatayo ed Autor na Biblia. Diad panamegley na saray pahina na Biblia et saray kayamanan a managyat ed sikatayon ‘onleppua ed pisasalamat.’

Say panlingkor ed si Jehova a kaiba iray agagi tayo so mamainomay met ed dalan. Inkuan na salmista ed inkasikato: “Sakey ak ya iba na saray amin ya ontatakot ed sika.” (Salmo 119:63) Arum ed saray sankaliketan a bekta tayo so nauusar diad saray Makristianon asamblea odino arum niran okasyon a kaiba tayoray agagi tayo. Bidbiren tayo a say alay abig a sankamundoan a Kristianon pankakasakey tayo so niwawala lapud si Jehova tan ed nitandoro iran dalan to.​—Salmo 144:15b.

Likud ed apresasyon, say inkaresponsable so mamabiskeg ed sikatayo pian mantultuloy so aligwas diad nitandoro iran dalan nen Jehova.

Pankurang ed Responsablin Paraan

Bidbiren na saray responsablin ontatatdang ed palandey so pankaukolan na maalwar a panakar pian ag-ira nabalang odino nipaarap ed saray mapeligron kelas. Bilang walaan na bulos a panagdesisyon, papagamoran itayo nen Jehova na relatibon kawayangan tan ikiwas lan unona. Balet satan a kawayangan so mankaukolan na inkaresponsable legan tayon susumpalen iray obligasyon tayo bilang Kristiano.

Alimbawa, matalek si Jehova ed saray lingkor to a sumpalen da iray obligasyon da diad responsablin paraan. Agto imamando no kaunongan karakel a biskeg tan panaon so nepeg tayon usaren ed saray aktibidad bilang Kristiano odino no kaunongan karakel so nepeg tayon idonasyon odino ed arum a paraan. Imbes, saray salita nen Pablo ed saray taga-Corinto so onaplika ed sikatayon amin: “Balang sakey gawaen to komon so ginetma to ed puso to.”​—2 Corinto 9:7; Hebreos 13:15, 16.

Say responsablin panangiter bilang Kristiano et laktipen toy panginabang ed maong a balita ed arum. Ipanengneng tayo met a sikatayoy responsable diad pandonasyon parad sankamundoan a kimey na Panarian. Insalaysay nen Gerhardt, sakey a matakken, a sikato tan say akulaw to so angarum ed saray kontribusyon da kayari inyatendi ra ed sakey ya asamblea diad Bukig a Europa. “Naimano miray agagi tayo diman a daiset so materyal a kayarian da; ingen papablien dan maong iray literatura na Biblia tayo,” inkuan to, “kanian denesidi min suportaan na anggad nayarian mi iray mankaukolan ya agagi tayo ed arum a bansa.”

Panginatnat ed Panagsungdo Tayo

Say itatdang ed palandey so mankaukolan na paot. Saray ontatatdang ed palandey so man-ehersisyo kapiganman a nayarian da, tan dakel so manakar-akar pian iparaan so inkasikara parad andukey ya itatatdang. Mipadpara, inrekomenda nen Pablo a mansiansia itayon okupado ed teokratiko iran aktibidad ta pian namantini tayo so espiritual ya inka-kondisyon tayo. Saraman so manpirawat a ‘mankurang a makana ed Katawan’ tan magmaliw a ‘mabiskeg,’ inkuan nen Pablo, so nepeg a ‘mamabunga na ganaganan maabig iran gawa.’​—Colosas 1:10, 11.

Say motibasyon so ontutulong ed panagsungdo na saray ontatatdang. Panon? Say pansiansian akaapasakey ed malinew a gagala, a singa say arawin palandey, so walaan na makapaligsan epekto. Tan sano makasabi so ontatatdang diad panandaan ed dalan, nayarian ton sukaten so iyaaligwas to a mamaarap ed ultimon kalat to. Diad ibantag to ed tinatdang to la, sikatoy naliliketan.

Ontan met, say ilalo tayon andi-anggaan a bilay so manustuni tan mamaligsa ed sikatayo. (Roma 12:12) Kaleganan ni, legan tayon manaakar ed saray dalan nen Jehova, napenek itayo diad pangiletneg insan pandampot ed saray Makristianon kalat. Tan agaylan gayaga so nalikna tayo sano molimolien tayo iray dakel a taon na matoor a serbisyo odino pangimano ed saray pananguman ya agawaan tayo ed personalidad tayo!​—Salmo 16:11.

Pian nasabi iray andukey a tatatdangen tan nawalaan na biskeg, saray manaakar so onabanti diad tuloytuloy a kapeles. Mipadpara, say maong a rotina a mangilaktip ed regular a pipiaral tan lawak a serbisyo so mamasiansia ed sikatayon onabanti parad kalat tayo. Kanian, pinaseseg nen Pablo iray kaparan Kristiano: “Mantultuloy itayon manakar a mauksoy ed sayan parehon rotina.”​—Filipos 3:16, NW.

Siempre, ag-itayo manakar a bukor diad saray basbas nen Jehova: “Nonoten tayo no panon itayon makapanpapasesegan ed balang sakey nipaakar ed aro tan maong iran gawa,” insulat nen Pablo. (Hebreos 10:24, New International Version) Say maabig ya espiritual a pililimog so ontulong ed pamasiansia ed peles na panaakar tayo kaiba iray kapananisiaan.​—Uliran 13:20.

Kaunoran, tan sankaimportantian, agtayon balot lilingwanan so biskeg ya ipapagamor nen Jehova. Saramay say biskeg da et walad si Jehova so “onla ra manlapu ed biskeg ya angga ed biskeg.” (Salmo 84:5, 7) Anggaman no maminsan et nepeg tayon dalanen so mairap iran situasyon, lapud tulong nen Jehova et nagawaan tayo itan.