Say Modernon Pananagyat na “Sasanto”

“Nonoten so panaon sanen singa maletletey itayo no nabitla la iray palbayani? Ompatnag ya ag-itan angapekta ed 4.2 milyon iran Amerikano a nanimaton ed ponpon nen Mother Teresa nen Set. 13. Nanlapu la’d impatey to nen Set. 5, nilusboan na totoo so Vatican na saray kerew a sikatoy ideklara bilang santa. Pigpigaran totoo so manduaruwan nagawa itan.”​—Sun-sentinel, Estados Unidos, Oktubre 3, 1997.

SAY inkamatulong tan mapangasin kimey na misionaryon Katoliko a si Mother Teresa so inkonsidera na dakel bilang pakapatnagan na tuan santo. Wala met iray palbayani ed limog na arum a relihyon. Balet, nayarin anggapo iray pormal a bibidbiren a santo a singa ed saraman so indeklara na Iglesia Katolika Romana.

Indeklara nen Pope John Paul II so masulok a 450 a totoo a gawaen a sasanto legan na uley to bilang papa, mas dakel ni nen say indeklara na saray arum a papa nen koma-20 a siglo no panuulopen.a Akin a mantutultuloy so debosyon ed “sasanto,” a dakel ed sikara so agtanton kabat ed limog na saray Katoliko ed inkalapagan?

Onia so insalaysay nen teologon Lawrence Cunningham na Notre Dame University: “Nasasagyat so interes na totoo ed ideyan inkasanto diad mundo. Ipapanengneng na pamibidbir ed sasanto so posibilidad na palbayanin kabibilay, anggan natan.” Niarum ni, ibabaga a saray “sasanto” so walaan na nikaduman pakapitongtong ed Dios, a manggawa ed sikaran epektibon manamegley parad saray mabilay. Sano naromog iray kagawaan odino bangkay na sakey a “santo,” saraya so pagalangan diad panisia a walay pakapanyari ya ompaway ed saratan.

Onia so impalapag na Catechism of the Council of Trent, ya impalapag nen koma-16 siglo pian pekderan lamet so Katolikon doktrina: “Sikatayo so nikakatunongan ed pangikuan, a say pangigalang ed sasanto ‘a miuugip ed Katawan,’ say iyey-ey ed sikara pian mamegley, tan say pangigalang ed saray sagradon kagawaan tan dapol lan laman da, so nagkalalon mangarum ed gloria na Dios, unong ed laknab na kasasagyat tan ibibiskeg na Kristianon ilalo, tan say sakey so napapaseseg a mangalig ed saray kamaongan da.” (The Catechism of the Council of Trent, 1905) Seguradon labay na saray tuan Kristiano so manbilay a walaan na birtud, makaasingger ed Dios diad dugan paraan, tan makaawat na tulong To. (Santiago 4:7, 8) Sirin, unong ed Salita na Dios, siopa so kualipikado bilang tuan sasanto? Tan anton betang so susumpalen da?

[Paimano ed Leksab]