Apinengnengan nen Saulo Iray Datin Kakaaro To tan Saramay Binusol To

NAYARIN napapagaan si Saulo, a nagmaliw ya apostol Pablo ed saginonor, sanen sikatoy pinmawil ed Jerusalem diad sankaunaan a pankanawnawa manlapu la’d nen sikatoy nan-Kristiano.a Taloy taon lay apalabas sanen tinaynan to iyan syudad, ya inggagaem ton pagyawen tan pateyen iray babangatan nen Jesus. Sikato so walaan na autoridad nensaman a mangerel ed siopaman a naromog ton Kristiano diad Damasco.​—Gawa 9:1, 2; Galacia 1:18.

Sanen nagmaliw a Kristiano si Saulo, makpel ton inyabawag so pananisia to nipaakar ed apaolin Mesias. Bilang resulta, sikato so labay a pateyen na saray Judio diad Damasco. (Gawa 9:19-25) Nailaloan to kasi a marakep so pangawat ed sikato na saray datin kakaaro ton Judio diad Jerusalem? Balet ta mas importante ed si Saulo so pakapinengneng to ed saray patumbok nen Kristo diad Jerusalem. Ingen ta aliwan mainomay itan.

‘Nen sikatoy akasabi ed Jerusalem, sineetan to so mitipon ed saray binangatan, et sikara ya amin so tinmakot ed sikato, ya ag-ira anisia a sikato et sakey lan binangatan.’ (Gawa 9:26) Natalosan tayo no akin ya ontan so liknaan na saray babangatan, lapud say pakaamta ra et sikato ni imay maruksan manamasegsegang. Nayarin iisipen da a taktika to labat so pangibabaga ton sikatoy nagmaliw lan Kristiano ta pian nalooban to so kongregasyon. Kanian, sikato so labay a paliisan na saray Kristiano ed Jerusalem.

Balet, wala so sakey ed sikara a tinmulong ed si Saulo. Ibabaga na Biblia ya inyarap nen Bernabe iyan datin managpasegsegang ed ‘saray apostol,’ a mapatnag a manutukoy ed si Pedro (Cefas) tan Santiago, say agi na Katawan, pian ipaamta to ed sikara so inkakomberte tan impanpulong nen Saulo diad Damasco. (Gawa 9:27; Galacia 1:18, 19) Agnisulat ed Biblia no akin a nanmatalekan nen Bernabe si Saulo. Kasin sankabat la ran dua, a satan so amakiwas ed si Bernabe a mangusisan maong ed inkatoo nen Saulo, kanian napaneknekan to a maabig so motibo nen Saulo? Kasin walaray Kristiano ed Damasco a kabat nen Bernabe, ya akaamtaan to ed impanguman nen Saulo? Antokaman so kipapasen, inekal nen Bernabe so paniinap na saray Kristiano ed si Saulo. Kanian, si Saulo so akapiulop ed si apostol Pedro ed loob na 15 ya agew.

Labinliman Agew a Kaiba nen Pedro

Unong ya impurek nen Saulo ed saray taga-Galacia, agto la nakaukolan so antokaman ya autorisasyon na too lapud sikato so direktan imbaki nen Jesus. (Galacia 1:11, 12) Balet seguradon binidbir to ya importante so pakawalaan na sigpot a pikakabat ed ministeryo nen Jesus. Kanian say impiulop to ed si Pedro so angiter ed sikato na malaem a pankanawnawa pian makaaral nipaakar ed impanministeryo nen Jesus. (Lucas 24:12; 1 Corinto 15:3-8) Nayarin dakel so intepet to ed si Pedro tan Santiago, tan walaray tepet da met ed sikato nipaakar ed saray pasingawey tan kimey a niganggan ed sikato.

Panon so Inkiliktar To Manlapud Datin Kakaaro To?

Si Esteban so primeron martir a Kristiano. Saramay datin akisuppiatan nen Esteban et saramay “wala ed sinagoga [ya] inngaran a sinagoga na saray Libertinos, tan saray taga-Cirene tan Alejandria, tan saray taga-Cilicia tan Asia.” Diad saman et si Saulo so “akisangsangan ed saray Griego a Judio,” a makpel to iran pinulongan. Anto so reaksion da? Sikato so labay dan pateyen.​—Gawa 6:9; 9:28,29.

Natural labat ya isalaysay nen Saulo so sigpot ya impanguman na bilay to, tan panggunaetan ton ipulong so Mesias ed saray datin kakaaro to. Balet, sarayan Judio a mansasalitay Griego so sinmumpa ed si Saulo, ya impasen dan traidor.

Kasin atebek nen Saulo so kapeligroan ya inkidungetan to? Nabasa tayo a sanen sikatoy manpipikasi diad templo, abalang so liknaan to insan anengneng to si Jesus, ya oniay ingganggan to ed sikato: “Siglatan mo et ompaway ka ed Jerusalem, ta agda akoen ed sika so pamatuam nipaakar ed siak.” Et inmebat si Saulo: ‘Katawan, amta ra ed sikaran dili ya angipangaw ak tan nanlewet ak dia ed balang sinagoga ed saray anisia ed sika: Et nen nikalbo so dala nen Esteban a tasim, wadman ak met ya akaarap, et inabuloyan ko.’​—Gawa 22:17-20.

Impasen na arum a say kabaliksan na sayan ebat nen Saulo et amta to so kipapaarapan ton kapeligroan. Iisipen balet na arum ya ibabaga ton: ‘Sakey ak a datin managpasegsegang a singa sikara, tan amta ra itan. Seguradon pannonotan dan maong so impakakombertik. Nayarin natulongan ko iran makaaral na katuaan.’ Balet, amta nen Jesus ya agdengelen na saraman a Judio so ipulong na sakey ya impasen dan “apostata.” Oniay imbaga to ed si Saulo: “Onla ka, ta ibaki ta ka ed arawi, dia ed saray Gentiles.”​—Gawa 22:21, 22.

Sanen naamtaan na saray kapara ton Kristiano a napepeligro lay Saul, sikato so pinabuat dan tampol diad daongan na Cesarea tan pinambaroy da na 500 kilometro a paarap ed Tarso, say binalegan ton syudad. (Gawa 9:30) Pigaran taon ni so apalabas insan akapawil si Saulo ed Jerusalem.

Satan a kalimbuatan ya inyalis nen Saulo so nayarin analimbeng met ed Kristianon kongregasyon. Say inkiwala diman na datin managpasegsegang so posiblin makaapekto a maong ed sikara. Sanen akaalis lay Saulo, “say iglesia apadeen ed lapag na Judea tan Galilea tan Samaria, et binmiskeg; et nanakar ira ed takot ed Katawan tan diad panliligliwa na espiritu santo dinmakel ira.”​—Gawa 9:31.

Saray Leksion ed Pagmaliw a Maalwar

Singa met nen inmunan siglo, wala met iray kipapasen natan a matukoy so pagmaliw a maalwar. Ingen ta aliwa met itan a rason pian pansuspetsaan lan amin so agkabat a totoo. Balet, no maminsan et walaray managpalikdon totoo a mangaanamot ed totoo nen Jehova, balanglan pian nagunggonaan iran dili odino getma ran deralen so kongregasyon. Kanian nepeg tayon ikana so pakatebek ta pian agtayo nabiktima ed saray panamalikdo na saray impostor.​—Uliran 3:27; 2 Timoteo 3:13.

Say reaksion nen Saulo sanen sikatoy nampulong ed Jerusalem so mangipapabitar ed sakey nin paraan pian makapanalwar iray Kristiano. Say pampulong ed pigaran lugar odino ed arum a totoo, pati ed saray datin kakaaro, so nayarin mapeligro ed pisikal, espiritual, odino anggan diad moral. Matukoy so panalwar a maong sano manpupulong itayo, a nepeg tayon pilien met so panaon tan pasen.​—Uliran 22:3; Mateo 10:16.

Makapanmatalek itayo a nipulong so maong a balita na Panarian na Dios antis a manampot iyan mauges a sistema na bengabengatla. Agaylan abig ya alimbawa so impatnag nen Saulo ed sayan pamaakaran, “a nampupulong a makmakpel ed ngaran na Katawan” anggan ed saray datin kakaaro to tan saray binusol to!​—Gawa 9:29.

[Paimano ed leksab]

[Litrato ed pahina 16]

Kasabi nen Saulo ed Jerusalem, sikato so makpel a nampulong ed saray Judion mansasalita na Griego