Tepet na Saray Manbabasa
Tua Ta a Say Panarian Na Dios et Walad Puso Tayo?
Panisiaan na dakel a say ebat ed satan a tepet et on. Alimbawa, oniay inkuan na The Catholic Encyclopedia: “Say panarian na Dios et kabaliksan toy . . . panuuley na Dios diad kapusoan tayo.” Onia so kaslakan ya ibabangat na papari. Peteg kasin ontan so ibabangat na Biblia?
Walaray say amta ra et si Jesus so nanlapuan na sayan ideya. Tua, oniay inkuan nen Jesus: “Nia! Say panarian na Dios et walad pegley yo.” (Lucas 17:21, NW) Say impangipatalos na arum ed saya et: “Walad sikayoy panarian na Dios” odino “walad dalem yo.” Susto kasi irayan impangipatalos? Peteg ta ya ontan so labay ya ibaga nen Jesus?
Unona, amtaen tayo ni no antoy kabaliksan na salitan puso. Sano nasasalambit ed Biblia, kaslakan lan aliwa itan a literal, noagta tutukoyen na satan so akindalem ya inkatoo na sakey, say panagnonot, awawey, tan liknaan to. Singa marakdakep a tua no diad puso tayo et walay bengatlan magloria a singa say Panarian na Dios, a sarag ton umanen tan pagmaliwen a maong a too so sakey. Balet, wala tay basiyan na sayan bangat?
Oniay ibabaga ed sikatayo na Biblia: “Say puso manamalingo alabas nen saray amin a bengatla, et sikato so mapalalo a mauges.” (Jeremias 17:9) Mismon si Jesus so angikuan: “Manlapu ed dalem, ed puso na totoo, saray mauges a nonot so ompaway, saray panaglawan, panagtakew, panagpatey, pikakalugoran, kaaguman, karelmengan.” (Marcos 7:20-22) Nonoten pa iya: Agta no talagan aralen tayo et say makasalanan a puso na too so lamot na amin lawarin kairapan a naiimatonan tayo natan? Kanian, anta perpekto so Panarian na Dios, panon a nibagan diad makasalanan a puso so panlapuan na satan a Panarian? Sirin, no panon a say sabitan et agmakapanbungay higos, say puso na too et agmet makapamawala na Panarian na Dios.—Mateo 7:16.
Komadua, siopa ta iray katongtong nen Jesus sanen imbaga to itan a balikas a nabasa ed Lucas 17:21? Oniay nabasa tayo ed akaunan bersikulo: “Et nen tinepetan na saray Fariseo, no kapigan so isabi panarian na Dios, inebatan to’ra.” (Lucas 17:20) Saray Fariseo et kakabusol nen Jesus. Imbaga nen Jesus a sarayan mansimpisimpitan et agmakaloob ed Panarian na Dios. (Mateo 23:13) Sirin, no ag-ira anggan makaloob manaya ditan, kasin nibagan walad kapusoan da so Panarian? Imposible! Anto sirin so labay ya ibaga nen Jesus?
Nipaakar ed sayan balikas nen Jesus, angusar so pigaran maalwar a managpatalos na Biblia na mipara ed saramay termino a walad New World Translation. Singa bilang, impatalos da itan a say Panarian et “walad limog yo” odino “walad leet yo.” Natan, panon balet a say Panarian na Dios et walad pegley na saramay totoo ed saman a panaon, a pati saray Fariseo? Bueno, si Jesus so tinuro nen Jehova a Dios a magmaliw ya Ari na Panarian. Bilang say aturon manari, sikatoy wadman ed mismon pegley da, a nambabangat ed sikara nipaakar ed Panarian na Dios tan nanggagawa ni ingen na saray milagro pian ipanengneng no antoy gawaen na satan a Panarian ed arapen. Kanian, nibaga a diad saman et talagan walad pegley da so Panarian.
Malinew sirin ya anggapoy naromog ed Biblia a manuporta ed sisisiaen a walad puso na too so Panarian na Dios. Imbes, satan et literal a gobierno, gobierno a talagan makapanguman na kipapasen diad dalin, a singa impasakbay na saray propeta.—Isaias 9:6, 7; Daniel 2:44.