Nayarin Nauman na Katuaan so Bilay Mo
OMPAN nadngelan mo la odino imbangat ed sika so sakey ed saray katilaan nipaakar ed Dios ya impaliwawa ed sayan magasin. Balet, nayarin talawan kan umanen itan, lalo la no abayag mo lan papanisiaan.
Natural labat itan, ta wala ray arum a relihyon ya agda labay ya ikomparay bangat da ed no antoy ibabaga na Biblia. Idedepensa na arum ingen so lingon bangat da. Ibabaga ran komplikado kuno so Biblia tan pigpigara labat lay makatalos ed satan. Balet, kaslakan ed saray disipulo nen Jesus et atalosan dan tampol iray imbangat to, anggaman ordinaryo iran totoo tan abebay aral da.—Gawa 4:13.
Sakey ni, ompan talawan kan imbestigaan so papanisiaan mo ta iisipen mon ebidensya itan ya kulang kay pananisia. Balet makatunongan kasin ipasen ya aglabay na Dios ya usisaen moy Biblia, say mensahe to ed totoo, pian natalosan no antoy kekerewen to? Iimbitaan itayo ingen na Salita to ya usisaen itan a mismo, inkuan to: ‘Paneknekan yo ed inkasikayo so maong tan makapaliket tan ayadyarin linawa na Dios.’—Roma 12:2.
No naamtaan moy katuaan nipaakar ed Dios, aglabat ondakel so naaralan mo, noagta ondakep ni ingen so bilay mo. (Juan 8:32) Si Deanne ya asalambit ed gapo na sayan magasin et manmamatalek la natan ed Salita na Dios. Imbaga to: “Nen ginapoan kon inaral so Biblia, diman ko labat naamtaan ya malinlinew manaya itan. Natan amtak la ya si Jehova et aliwan anggapoy liknaan a Dios noagta maar-aron Ama tayon walad tawen. Nalmok so tuan gagala na bilay.”
Ompan inaral mo la nensaman so Biblia balet say pakaliknam et agka agunggonaan. No ontan, agka nadidismaya. Sano sasalien mon aralen so Biblia ingen ta nibangat ed sikay katilaan nipaakar ed Dios, singa ka manbubuo na puzzle ya aliway litraton tutumboken mo. Nayarin makabuo ka na pigaran piraso balet onsuko ka la no agkapara na samay litraton tutumboken mo. Balet, salim pan gapoan ed suston litrato tan seguradon nabuom so puzzle.
Labay mon naaral so katuaan nipaakar ed Dios? Parad libren panagaral na Biblia, kontak mo labat iray Tasi nen Jehova ed lugar yo odino mansulat ed matukoy ya address a walad pahina 4 na sayan magasin.
[Blurb ed pahina 9]
‘Paneknekan yo ed inkasikayo so maong tan makapaliket tan ayadyarin linawa na Dios.’—ROMA 12:2