Akin ya Nepeg Kan Nainteresan ed Biblia?

Diad amin ya libro, say Biblia so labalabay na totood interon mundo. Akin? Say sakey a rason et lapud mainomay a natalosan. Nabasa ditan iray istoryay bilay na totoo nensaman, saray ginawgawa ra, tan say relasyon dad Dios. Saratan ya istorya et pakaaralan tayo tan simpli labat iray salita, ya ni-translate ed nilasus iran lenguahe kanian natalosan na anggan siopa, ed anggan anton panaon, tan ed anggan anton lugar. Tan lanang ya praktikal iray prinsipyo ed Biblia.

Balet say importante ed amin, say Biblia et aglabat tungkol ed Dios noagta nanlapu met itan ed Dios. Nabasa ditan so ngaran na Dios, saray ugali to, tan say rason no akin ya pinalsa toy dalin tan too. Isasalaysay met na Biblia so abayag lan panlalaban na maong tan mauges—makapainteres itan ya istoryan marakep so ending to. No basaen tayoy Biblia tan agtayo huhusgaan a tampol, nawalaan itayoy pananisia tan ilalo.

Diad Biblia, wala ray nabasa tayon impormasyon ya agnabasad arum a libro. Alimbawa, ibabaga na Biblia so katuaan ed sarayan topic:

• No iner so nanlapuan tayo tan no akin ya maniirap itayo

• No antoy ginawa na Dios pian nadondon so totoo

• No antoy ginawa nen Jesus parad sikatayo

• No antoy nagawad dalin tan ed totoo diad arapen

Anto kasi no basam ya magano irayay ontumbok ya pahina pian naamtaan mo no anto ray nabasad Biblia?