EBAT ED SARAY TEPET ED BIBLIA
Wala tay ilalo na saray inatey?
Saray inatey et singa labat nanaugip—agda amtay nagagawa, tan anggapo met lay nagawaan da. Balet sarag na Amalsa ya bilayen iray inatey panamegley na kioli. Pian napruebaan na Dios ya sarasarag to ’tan a gawaen, inikdan toy Jesus na pakayarin bilayen iray pigaran inatey nensaman.—Basaen so Eclesiastes 9:5; Juan 11:11, 43, 44.
Akin a singa labat nanaugip iray inatey?
Impromisa na Dios ya saray inatey a walad memorya to et paolien to diad matunong ya balon mundo. Say Dios labat so makapangipawil na bilay da. Nagawa itan diad panaon ya implano to. Labalabay na Dios ya usaren so pakayari to pian bilayen iray inatey.—Basaen so Job 14:14, 15.
Antoy nagawad kioli?
No paolien la na Dios iray inatey, kabat da nin siansia so sarili da, pati ray kakaaro tan kapamilya da. Anggano nabulok so laman na too no ompatey, sikato nin siansia iman no paolien la na Dios, balet ta ikdan Toy balon laman.—Basaen so 1 Corinto 15:35, 38.
Daiset labat so paolien ya manbilay ed tawen. (Apocalipsis 20:6) Karaklan ed saray paolien et manbilay diad dalin sano paraiso la. Naikdan iray tsansa ya manbilay na andi-angga.—Basaen so Salmo 37:29; Gawa 24:15.