Panarian na Dios​—Akin ya Importantin Maong ed si Jesus?

Singa naamtaan tayod akaunan artikulo, manunad bilay nen Jesus so ‘pangipulong tan pangiyabawag ed maong a balita na panarian na Dios.’ (Lucas 8:1) Sikatoy makulikuli, nanakar na nilasus a kilometro ed interon Israel pian ibangat itan. Say ministeryo nen Jesus et nabasad apatiran Ebanghelyo, ya masulok a 100 beses ya abitla so Panarian. Maslak ed saratan et si Jesus so angibaga, balet daiset ni itan no amtaey amin ya imbaga to tungkol ed Panarian na Dios!​—Juan 21:25.

Akin ya importantin maong itan ed si Jesus nen wadiad dalin? Ta amta ton sikatoy pinili na Dios ya manuley ed satan. (Isaias 9:6; Lucas 22:28-30) Balet aliwan say pangawat na pakapanyari odino dayew so nanpokusan to. (Mateo 11:29; Marcos 10:17, 18) Ag-itan impakabat nen Jesus lapud sarili ton pankaabigan. Imbes, nensaman ya anggad natan et ipapakabat toy Panarian na Diosa ta sikatoy interesado ed gawaen na satan parad saray inad-aro to​—say Ama tod tawen tan saray matoor ya papatumbok to.

NO ANTOY GAWAEN NA PANARIAN PIAN NIDAYEW SO AMA NEN JESUS

Inar-aro nen Jesus so Ama tod tawen. (Uliran 8:30; Juan 14:31) Pandinayewan to iray marakep ya ugali na Ama to, singa say aro, panangasi, tan hustisya. (Deuteronomio 32:4; Isaias 49:15; 1 Juan 4:8) Kanian seguradon aglabay ya narengel nen Jesus iray katilaan ya kinmayat tungkol ed Ama to​—singa say tila ya anggapoy pibabali na Dios ed paniirap na totoo tan labay na Dios ya manirap tayo. Aya so sakey a rason no akin ya labalabay nen Jesus ya ipaamta so “maong a balita na panarian.” Amta ton onsabi panaon et linisan na Panarian so ngaran na Ama to. (Mateo 4:23; 6:9, 10) Panon iyan nagawa?

Manggawa si Jehova na baleg ya pananguman parad totoo. “Punasen to so amin a lua ed kamataan” na saray matoor. Ekalen to ray lapuan na lua, seguroen to ya “anggapo lay ipapatey, tan anggapo met lay panermen tan pannangis tan ot-ot.” (Apocalipsis 21:3, 4) Ekalen na Dios so amin ya kairapan panamegley na Panarian.b

Agla pankelawan no akin ya labalabay nen Jesus ya ibagad totoo so tungkol ed Panarian! Amta ton panamegley na satan et naamtaan ya say Ama to et talagan makapanyari tan mapangasi. (Santiago 5:11) Amta met nen Jesus ya minabang ed Panarian so arum ya inad-aro to​—saray totoon matoor ed Dios.

NO ANTOY GAWAEN NA PANARIAN PARAD SARAY MATOOR ED DIOS

Antis ya linma diad dalin, nambilay si Jesus ed tawen kaibay Ama to. Impila na Ama so Anak diad impanggawad amin a bengatla​—manlapud makapakelkelaw ya tawen kaibay agnabilang ya bitewen tan galaksi, pati say marakdakep ya planeta tayo tan amin ya mabilay a pinalsa. (Colosas 1:15, 16) Balet diad saratan ya amin, say “nagkalalo lan panliliketan” nen Jesus et saray totoo.​—Uliran 8:31, NW.

Nanengneng ed ministeryo nen Jesus ya inaro to ray totoo. Manlapud gapo, impaseguro ton sikatoy linma diad dalin pian ‘iyabawag so maong a balita’ ed saray mankaukolan. (Lucas 4:18) Pero aglabat imbaga nen Jesus ya sikatoy ontulong ed totoo. Imbes, paulit-ulit ton impanengneng so panangaro tod sikara. Alimbawa, nen nantitipon iray totoo pian ondengel ed sikato, “akasian to ra tan pinaabig to ray mansasakit.” (Mateo 14:14) Nen imbagad si Jesus na sakey a lakin grabe so sakit to: “Katawan, sarag mo ak a linisan no labay mo,” apakiwas si Jesus lapud panangaro to. Pinaabig to, tan mapangasi ton imbaga: “Labay ko. Nalinisan ka.” (Lucas 5:12, 13) Nen anengneng nen Jesus so kaaro ton si Maria ya manak-akis ed impatey na agi ton si Lazaro, sikatoy “naermenan,” “agonigon,” tan “akalua.” (Juan 11:32-36) Insan nanggaway milagro​—binilay toy Lazaro anggano apat agew lan inatey!​—Juan 11:38-44.

Siempre amta nen Jesus ya temporaryo labat iray agawaan to. Saramay pinaabig tan binilay to et nansakit tan inatey lanlamang. Balet amta met nen Jesus ya permanentin solusyonan na Panarian na Dios iratan ya problema. Kanian aglabat nanggaway milagro si Jesus; makulikuli to met ya impulong so “maong a balita na panarian.” (Mateo 9:35) Panamegley na saray milagro, impanengneng to no antoy gawaen na Panarian na Dios ed arapen diad interon mundo. Imanoen iray pormisa na Biblia tungkol ed satan a panaon.

• 

  Anggapo lay sakit tan ikapuy na laman.

  “Diad satan a panaon et makanengneng la iray mata na bulag, tan makarengel la iray layag na telek. Diad satan a panaon et onlukson singa ulsa so piley, tan oneyag ed liket so dila na emel.” Ontan met, ‘anggapoy manaayam a mangibagay: “Mansasakit ak.”’​—Isaias 33:24, NW; 35:5, 6, NW.

• 

  Anggapo lay patey.

  “Say matunong tawiren to so dalin tan manayam diman lawas [odino andi-angga].”​—Salmo 37:29.

  ‘Akmonen to so patey ed ando lan ando, et say Katawan a Jehova punasen to ray lua ya unagus ed saray amin a lupa.’​—Isaias 25:8.

• Nabilay iray inaatey.

  “Amin a walad pakanodnonotan iran lubok et narengel day boses to tan ompaway ira.”​—Juan 5:28, 29.

  “Wala so kioli.”​—Gawa 24:15.

• 

  Anggapo lay andiay abung tan trabaho.

  ‘Mangipaalagey ira na saray abung, tan manayam ira, et mantanem ira na saray ubas, tan mangan ira ed saray bunga ra. Ag-ira mangipaalagey et sananey so manayam, ag-ira mantanem et sananey so mangan. Saray pinilik manliket ira a maando ed saray gawa na lima ra.’​—Isaias 65:21, 22.

• 

  Anggapo lay guerra.

  ‘Patundaen to ray guerra diad interon dalin.’​—Salmo 46:9, NW.

  “Say nasyon et agla mangitagey na espada sumpad nasyon, agmet la ra manaral a miguerra.”​—Isaias 2:4, NW.

• 

  Agla onkulang so naakan.

  ‘Iter na dalin so bunga to, et say Dios tayo, bendisyonan to itayo.’​—Salmo 67:6.

  “Wala so daakan ya ilik ed tapew na dalin ed tapew na toktok na saray palandey.”​—Salmo 72:16.

• Anggapo lay manirap.

  “Agnalingwanan lawas iray mairap-bilay.”​—Salmo 9:18, Maung a Balita.

  “Iyagel to ray mairap-bilay ya ontatawag ed sikato, saray walad pankaukolan tan saray napapaulyan. Maabagey ed saray makapuy tan saray mairap-bilay, ilalaban toy bilay da ray walad pankaukolan.”​—Salmo 72:12, 13, MB.

No iisipen mo irayan pormisa na Panarian na Dios, malinew la kasid sika no akin ya importantin maong ed si Jesus so Panarian? Nen wadiad dalin, labalabay ton itongtong so Panarian na Dios, ta amta ton panganggaen na satan so amin ya problema natan.

Kasin interesado kad sarayan pormisa na Biblia tungkol ed Panarian? Anto sirin so gawaen mo pian dakel ni naaralan mo tungkol ed satan? Tan antoy gawaen mo pian nasegurom ya naawat moy bendisyon? Ebatan iratan ed sampot ya artikulo na sayan serye.