MANUNAN ARTIKULO | PANARIAN NA DIOS—ANTOY BENDISYON TOD SIKA?

Panarian na Dios—Antoy Bendisyon Tod Sika?

Nayarin malinew lad sika natan based saray akaunan artikulo ya say Panarian na Dios et importantin maong ed Saray Tasi nen Jehova. Tan nayarin interesado kad saray apantongtongan tayo ya bendisyon na Panarian na Dios ed arapen. Balet, ompan iisipen mo no talaga kasin ontua iratan.

Sabagay, duga tay agmo bastabasta panisiaay narerengel mo. (Uliran 14:15) Walay piparaan mod saray taga Berea nensaman.a Nen unaan dan nadngel so maong a balita na Panarian, inawat da itan aliwan lapud labay dan ontua. Imbes, maalwar dan inaral so Kasulatan ‘no kasin tua iratan.’ (Gawa 17:11) Diad arum ya panangibaga, inkompara day maong a balita ya arengel da ed ibabaga na Kasulatan. Asabi panaon, akombinse ran say maong a balita et talagan nanlapud Salita na Dios.

Marakep no ontay gawaen mo. Iyoopresid sika na Saray Tasi nen Jehova so libren panagaral na Biblia pian nikomparam so papanisiaan da ed ibabangat na Biblia tungkol ed Panarian na Dios.

Likud ed satan, natulongan ka na panagaral na Biblia ya naamtaay ebat ed saray importantin tepet.

Iner so nanlapuan tayo?
Antoy gagala na bilay?
Akin et iyaabuloy na Dios so paniirap?
Antoy nagawa no ompatey tayo?
Naderal kasi so dalin?
Antoy sekreto na maliket a pamilya?

Nagkalalo ed amin, say panaral na Biblia et ontulong ed sikan ‘onapit ed Dios.’ (Santiago 4:8) Diad ontan, lalom ya naapresyan say Panarian na Dios et walay balibalin nagawaan tod sika natan tan anggad andi-anggaan. Impikasi nen Jesus ed Ama to: “Saya so mankabaliksan na bilay ya andi-anggaan, a kabaten da ka, say saksakey a tuan Dios, tan samay imbakim, si Jesu-Kristo.”—Juan 17:3.

Sayan libro et nayarin usaren na Saray Tasi nen Jehova pian iyaralan ka na Biblia.

Pian makapan-request na libren panagaral na Biblia, tepetan moy sakey ed Saray Tasi nen Jehova odino fill-up-an so form ed www.jw.org/pag. (Nengnengen so MANARAL NA BIBLIA diad home page)

a Say Berea et syudad diad Macedonia nensaman.

No Akin ya Importantid Sikato so Panarian

Diad agano ni, naikday asainmin so samploy taon ya si Folake, ya mansulat na essay ed eskuelaan ya say title to: “No Antoy Labalabay Kod Sayan Mundo.” Insulat to no akin ya importantid sikato ya ibagad arum so tungkol ed Panarian na Dios.

“Say Panarian na Dios et tuan gobierno,” so insulat to. “Balet ag-itan nanengneng anggano mansalming ka ni!”

Insulat to met iray bendisyon na Panarian ya tatalaranan to. Binitla to ray problema ya solusyonan na Panarian, “Malungkot ak no wala ray nanenengneng kon manaayam ed karsada” pati saray “ugugaw ya ompapatey ed eras diad nanduruman bansa.” Oniay inkuan to ni, “Balet naliliketan ak lamet no babasaen koy Isaias 65:21.” Tungkol itan ed totoon manbilay sano man-ari lay Panarian na Dios: ‘Mangipaalagey ira na saray abung, tan manayam ira ditan, et mantanem ira na saray ubas, tan mangan ira ed saray bunga ra.’

Insulat met nen Folake ya tatalaranan toy panaon sano say Dios, panamegley na Panarian, et ekalen To lay amin ya sakit. Diad samay essay to, binitla toy Apocalipsis 21:4 ya “punasen to [Dios] so amin a lua ed kamataan da, tan anggapo lay ipapatey, tan anggapo met lay panermen tan pannangis tan ot-ot.” Diad konklusyon to, inulit ton imbaga ya say pangitongtong tungkol ed si Jehova tan say Panarian To so labalabay tod sayan mundo. Nibaga tayo sirin ya pinabpabli na sayan ugaw so Panarian!