EBAT ED SARAY TEPET ED BIBLIA
Antoy nagawa ed saray totoo diad arapen?
Panon ya nagmaliw a posiblin manaaroan la ray totoo diad arapen lapud dondon nen Jesus?
Seguradon dakdakel ni nadiskobre tan naimbento na totoo ed arapen. Balet makagawa ra kasi na komunidad ya amin et manaaroan? Agda nagawaan itan. Say mundo tayo natan et napnoy makasarili tan maagum ya totoo. Balet walay marakep ya gagala na Dios ed saray totoo.—Basaen so 2 Pedro 3:13.
Ibabaga na Biblia ya diad arapen, amin ya totoo et manaaroan lan amin. Mareen lay bilay tan anggapo lay manggaway mauges.—Basaen so Miqueas 4:3, 4.
Panon ya naandi so inkamakasarili?
Pinalsa na Dios so too ya anggapoy makasarilin ugali. Balet nagmaliw ya aliwan perpekto so inmunan too, si Adan, nen agto inunor so Dios. Atawir tayoy tendensia ya magmaliw ya makasarili ed si Adan. Balet usaren na Dios si Jesus pian gawaen lamet ya perpekto iray totoo.—Basaen so Roma 7:21, 24, 25.
Pian nagaway linawa na Dios, inatey si Jesus bilang dondon tan inekal toy makapuy ya epekto na ag-inyunor na inmunan too. (Roma 5:19) Lapud si Jesus, nagmaliw a posible ya saray totoo et agla ra makasarili diad arapen.—Basaen so Salmo 37:9-11.