“Itultuloy Yon Pablien Iray Ontan a Lalaki”

MANLAPU la nen 1992, anuro so Mananguley ya Ulop na eksperiensyado tan maespiritual iran elder ya ontulong ed saray kimey na nanduruman committee.a Sarayan katulongan ya kabiangan na ‘arum a karnero’ et baleg so nitutulong dad Mananguley ya Ulop. (Juan 10:16) Onaatendi irad sinimban miting na committee ya akaasainan da, tan mangiiter ira na saray suhestion tan impormasyon ya makatulong ed pandesisyon na Mananguley ya Ulop. Saray membro na Mananguley ya Ulop so mandedesisyon, balet seseguroen na sarayan katulongan ya amin a desisyon da et nasumpal, tan gagawaen da so antokaman ya inyasain ed sikara na Mananguley ya Ulop. Iibaan na sarayan katulongan iray membro na Mananguley ya Ulop ed espisyal tan internasyonal iran kombension. Iyaasain met iran ombisita ed saray branch office bilang representative na headquarters.

Oniay imbaga na sakey ed saray katulongan ya nanlingkor manlapu la nen ginmapo itan ya uksoyan: “No susumpalen ko iray kimey ya inyasain ed siak, mas naasikason maong na Mananguley ya Ulop iray espiritual ya bengatla.” Onia met so imbaga na sananey nin brother ya duaran dekada lan manlilingkor bilang katulongan: “Agko inilaloan ya nawalaan ak na onian kabaleg ya pribilehyo.”

Dakel so imamatalek na Mananguley ya Ulop ed sarayan katulongan tan papablien da so kimey ya gagawaen na sarayan matoor tan makukulin brother. Kanian, komon ta ‘itultuloy tayon pablien iray ontan a lalaki.’—Fil. 2:29.