“Nasubok ni no Onnepeg”—Panon?
1 Lapud ibabaleg na organisasyon nen Jehova, walay mantultuloy a pankaukolan parad kualipikadon agagin lalaki a manlingkor bilang ministeryal a lingkor. Maslak ya agagin lalaki ya agni aturo, kaiba laray tin-edyer, so manpipilalek a manlingkor diad loob na kongregasyon. Sano napabtangan ira na kaaruman a kimey, liknaen dan mausausar ira tan nalikna ran walay nagawaan da. Mandependi so iyaligwas da ni diad pagmaliw dan “nasubok ni no onnepeg.” (1 Tim. 3:10) Panon iyan nagawaan?
2 Say Betang na Mamatatken: Bilang kabiangan ed pangamta no kasin say agin laki et kualipikado unong ed saray Makasulatan a kualipikasyon parad ministeryal a lingkor a naromog ed 1 Timoteo 3:8-13, nasubok na mamatatken no kasin onnepeg so agi a manakbat na responsabilidad. Nayarin sikatoy pabtangan da a manumpal na makatulong iran trabaho a singa say panangiter na saray magasin tan literatura, pangasikaso ed saray mikropono, panangasikaso ed Kingdom Hall, tan arum nira. Sikatoy obserbaan na mamatatken no panoy ikikiwas tan pangaasikaso to ed saray asainmin to. Imanoen da iray kualidad a napanpiyaan, inkasakbay, inkakuli, kabintaan, inkamabulos, tan maong a pililimog to ed arum. (Fil. 2:20) Kasin sikatoy napanuliranan ed panangawes tan panag-ayos? Kasin sikatoy talagan responsabli? Kaliktan dan nanengneng so “maabig ya ugali to ed saray kimey to a walaan na inkaulimek ya ontukoy ed kakabatan.” (Sant. 3:13, NW) Kasin sikatoy talagan manadampot pian ontulong ed kongregasyon? Kasin susumpalen to so ingganggan nen Jesus a ‘manggawa na saray babangatan’ diad maseseg a pibiang ed lawak na ministeryo?—Mat. 28:19; nengnengen so Setyembre 1, 1990, a Watchtower, pahina 18-28.
3 Anggaman anggapoy nigeter ya edad parad sakey a naturo a ministeryal a lingkor, tutukoyen na Biblia iratan bilang “lalaki a manlingkor.” Mairap tayon nailaloan iratan no sikaray katayatdang ni, nagkalalo la ta abitla so posibilidad a walaan ira na asawa tan ananak. (1 Tim. 3:12, 13, NW) Saratan a lalaki so nepeg ya onarawi ed “saray ibibeg ya inuugaw” noagta nepeg a manugali ira a makalakal, walaan na maabig a talindeg tan malinis a konsiensia ed imaton na Dios tan totoo.—2 Tim. 2:22.
4 Anggaman mausar so natural ya abilidad, say importanti et say awawey tan walna na sakey. Kasin mapaabeban pilalek na agi ya idayew so Dios tan manlingkor ed saray agagi to? No ontan, bendisionan nen Jehova iray sagpot to pian onaligwas ed kongregasyon.