“Magmaliw a Mabunlok, Akaparaan a Manginabang”
1 Diad linmabas iran siglo, binilin nen apostol Pablo si Timoteo a pasesegen toray kapananisiaan “a manggawa unong ed maabig, magmaliw a mayaman ed maabig iran gawa, magmaliw a mabunlok, akaparaan a manginabang.” (1 Tim. 6:18, NW) Pinanonotan met nen Pablo iray Hebreon Kristiano ya agda lilingwanan so ‘panaggawa na maabig tan pananginabang ed arum.’ (Heb. 13:16) Akin ya insulat to irayan bilin? Lapud amta ton niwalay “gloria, tan galang, tan kareenan ed siopaman a manggawa na maong.”—Roma 2:10.
2 Lapud sikatoy Manamalsa, si Jehova a Dios so Akankien ed amin a bengatla. (Apoc. 4:11) Maseguron aapresiaen tayo so gagawaen to ed biang tayo tekep na saray kayarian to. Anggaman say awawey na dakel ed katooan et andiay pisasalamat, iyaabuloy ni na Sankatagyan ya amin so nagunggunaan manlapud say mabunlok iran probisyon to parad panustuni ed bilay. (Mat. 5:45) Inter to ni ingen so pinabpabli ton Anak bilang bagat ta pian nawalaan itayoy bilay ya andi-anggaan. Agta satan ya aro a nipanengneng ed sikatayo so managdag ed sikatayon paneknekay pisalsalamat tayo diad pagmaliw a mabunlok ed kaparan totoo?—2 Cor. 5:14, 15.
3 Anto so Inabang Tayo? Manepeg labat ya usaren tayoy antokaman a kayarian tayo diad pamaliket ed Dios. Seguradon labay tayon suportaan so sankamundoan a kimey na Panarian diad materyal tan espiritual a paraan. Siempre, say maong a balita so sankamablian a kayamanan a nakayarian na siopaman, ta satan so “pakayari Dios ed kilalaban.” (Roma 1:16) Diad mabunlok a pangusar ed panaon tan kayarian tayo ed kada bulan pian mibiang ed kimey na panagpulong tan panagbangat, nayarian tayon inabang ed arum iyan espiritual a kayamanan, a mansumpal ed pakagamor da na andi-anggaan a bilay.
4 Malikeliket si Jehova sano tulongan tayo iramay mairap-bilay. Insipan to iray bendision, tan impanonot to met ed sikatayo: “Saray kayamanan andi kakanaan da ed agew na sanok; balet say inkatunong mangilaban a manlapu ed patey.” (Uli. 11:4; 19:17) Say panuporta ed kimey na Panarian unong ed materyal tan sigpot a pibiang ed panangipulong na maong a balita so alay abig iran dalan a nipanengneng tayon sikatayoy talagan mabunlok, akaparaan a manginabang.