Mangitarok na Mayaman a Bendisyon so Pantanem na Daakan
1 Amin tayo so manatalaran ed kasumpalan na saray engranden sipan a lugan na Salita na Dios. Anggan natan et itatarya la nen Jehova iray dakel a bendisyon a mangaarum na gayaga ed bilay tayo. Balet, say laknab na pakagunggonaan tayo so mandependin tuloy ed pansasagpot tayo. Singa ed impangibaga nen apostol Pablo, “say mantanem na daakan, manani met na daakan.” (2 Cor. 9:6) Konsideraen pa so duaran pamaakaran ya aaplikaan na sayan prinsipyo.
2 Say Personal a Ministeryo Tayo: Say panginabang na maong a balita ed totoo sano sarag tayo so manpulong et mangitatarok na dakel a tumang. (Uli. 3:27, 28) Nakomendaan, dakel so mantatanem na daakan panamegley na malaknab a pibibiang da ed ministeryo, a pati say panag-auxiliary tan panag-regular payunir. Amin tayo so makapangitanem na daakan panamegley na sinononot ya ipawil pian nabayuboan so amin a nalmon interesado tan diad pangiyopresi na panagaral na Biblia kapiganman a walay pankanawnawa. (Roma 12:11) Say pangisekar tayo ed inkasikatayo ed oniaran paraan so manresulta ed makapaseseg iran eksperiensya tan mamadaak na gayaga tayo ed ministeryo.
3 Panuporta ed Intereses na Panarian: Nankomento si Pablo nipaakar ed ‘daakan a pantanem’ a misiglaotan ed materyal a panangiter. (2 Cor. 9:6, 7, 11, 13) Natan, baleg so nagawaan tayo diad pisikal tan materyal a paraan pian suportaan so intereses na Panarian. Nayari itayon ontulong ed panagpaalagey na saray Kingdom Hall tan Assembly Hall. Nayari tayo met a manboluntaryo a mibiang ed panaglinis tan panmantini ed sarayan pasen parad tuan panagdayew. Niarum ni, makapan-kontribusyon itayo parad saray gastos ed lokal a kongregasyon ontan met ed sankamundoan a panangipulong na Panarian tan panaggaway-babangatan a kimey. Legan a gagawaen tayon amin so betang tayo, panggayagaan tayon maong a nanengneng so daakan a panamendisyon nen Jehova ed sayan inordinaan na Dios a kimey!—Mal. 3:10; Luc. 6:38.
4 Bibilinen itayo na Salita na Dios a ‘manggawa na maabig, mayaman ed saray maabig a gawa, a mapalangkap, mainomay a mangiter.’ Sano tatalinengen tayo itan a bilin, panggayagaan tayo la natan iray mayaman a bendisyon. Ontan met, ‘makapantipon [itayo] nipaakar ed [inkasikatayo] na sakey a maabig a pangiletnegan a niparaan ed panaon ya onsabi, [tan] say peteg a bilay’ ya onsabi.—1 Tim. 6:18, 19.