Saglawien Iray Peles a Nagagawa Pian Managyat na Interes
1 Kasin labay yoy nawalaan na mantultuloy a suplay na maabig iran ideya a mamasiansian makapaligsa ed ministeryo yo tan nasagyat so interes na totoo ed mensahe na Biblia? Sirin saglawien so nagagawa ed mundo tan diad komunidad yo pian nigapoy tongtongan. Nitongtong yo iray peles a nagagawa ed komunidad tan ed bansa odino saray balita ed arum a bansa. Sarayan nagagawa so lawas a manguuman. (1 Cor. 7:31) Konsideraen iray onggendan ya alimbawa:
2 Napapagaan so totoo lapud saray problema ed ekonomya tan irap na bilay. Kanian, nibaga yo:
◼ “Nadngel yoy balitan ombili lamet so sasaliwen [bitlaen iratan]?” Odino nayari yon komentoay nipaakar ed kaandi trabaho no ekalen na baleg a kompanya so dakel a trabahador. Mandependi ed no panon yon igapo so tongtongan, nituloy yo diad panepet na balanglan “Agyo kasi pankelawan no akin et alay irap lay bilay?” odino “Isipen yo kasin tuloytuloy lan mairap so pakalmoy pambilay?”
3 Saray balitan karawalan, singa saray makapasinagem ya agawa ed saray pamilya odino ed saray estudyante, so pangibasian na tongtongan. Nitepet yo:
◼ “Abasa yo ta la ed dyaryo a [bitlaen so makapasinagem ya agawa ed komunidad]?” Insan itepet so balanglan “Antoy nibaga yon sengeg na pirmin kaguloan ed mundo?” odino “Iisipen yo kasin wala ni onsabin panaon a nawalaan itayoy kaligenan?”
4 Saray balitan makaderal iran delap, yegyeg, odino kaguloan ed bansa diad nanduruman parti na mundo so managyat met na interes. Alimbawa, nitepet yo:
◼ “Kasin responsabli so Dios ed [bitlaen so natural a desyang]?” Odino nayarin nibaga yoy aganggano nin imbetag na kaguloan ed bansa insan ikuan: “No amin et labay day deen, akin et alay irap a nagamoran itan?”
5 Lanang ya alisto ed saray peles a nagagawa a nayarin saglawien yo ed gapo na pitongtong yo. Naromog iray makatulong a suhestion ed “Current Events,” diad pahina 10-11 (p. 11 ed Tagalog), ed libron Reasoning. Balet, paliisay pibabali ed saray isyu ed politika odino ed sosyal. Imbes, ipaimanon say Kasulatan tan Panarian na Dios so alenleneg a permanentin solusyon ed saray problema na katooan.