Panagpulong ed Lawas Manguuman a Mundo
1 Alay peles a manguman so bengabengatla! Diad loob na sanlabi, say desyang, krisis ed ekonomya, gulo ed politika, odino say balitado a trahedya so nayarin pantotongtongan. Balet, ontan met kapeles a manguman so imano na totoo. (Gawa 17:21; 1 Cor. 7:31) Diad sayan lawas manguuman a mundo, panon tayon nasagyat so imano na saray totoo pian ninabang tayo so mensahe na Panarian ed sikara?
2 Tebeken Iray Kapapagaan na Arum: Sakey a paraan pian nasagyat so imano na totoo et diad panukoy ed saray peles a nagagawa. Sanen pinaseseg nen Jesus a seryoson nonoten na saray onderengel ed sikato so talindeg da ed Dios, diad sakey ya inkagawa et sinalambit to so agano niran trahedya a walad kanonotan da. (Luc. 13:1-5) Ontan met, sano iparungtal tayo so maong a balita, maabig no tukoyen tayo iray peles a balita odino sakey ya isyu ed lugar tayo a paninteresan na saramay walad teritorya tayo. Balet, sano sisingbaten iratan a bengatla, kaukolan a maalwar itayo ya ag-ondapag ed politika odino saray isyu ed sosyedad.—Juan 17:16.
3 Panon tayon naamtaan no anto so peles a nononoten na totoo? Nayarin say sankaabigan a paraan et say basta pantepet insan ontalineng. (Mat. 12:34) Say pagmaliw ya interesado ed totoo so mamakiwas ed sikatayo ya imanoen so panmoria na arum tan mataktikan mantepet ni. Say ebat na unabung so nayarin mangipatnag ed saray kapagaan na karaklan ed satan a lugar tan makapangilukas ed dalan pian makapantasi.
4 Pangiparaan ed Presentasyon: Sano manpaparaan parad lawak na kimeyan diad sayan lawas manguuman a mundo, nayari tayon usaren iray suhestion diad libro a Reasoning. Saray makatulong a suhestion no panon ya ilaktip iray peles a nagagawa diad saray presentasyon tayo so nidatak ed pahina 10-11 (p. 11-12 ed Tagalog), diad silong na “Crime/Safety” tan “Current Events.” Naromog met iray miparan impormasyon diad Setyembre 2000 a Ministeryo Tayo ed Panarian, pahina 4. Sano mangipaparaan na presentasyon yo, seguroen ya ilaktip so sakey a matukoy a teksto.
5 Legan ya iimanoen tayo iray lawas manguuman a kapagaan na saramay walad teritorya tayo, kaukolan ya iyadapta tayo met so presentasyon tayo nipaakar ed maong a balita. Diad ontan et nitongtong tayo ed totoo so petepeteg a mangaapekta ed bilay da. Bilang resulta et natulongan tayo so dakel ni a makaamta ed samay Sakey a saray kalidad tan estandarte to so agmanguuman.—Sant. 1:17.