Takotan si Jehova a Sanagew
1 “Say katatakot ed Jehova sikato so sengeg na kakabatan.” (Sal. 111:10) Pakiwasen itayo na satan a gawaen iray maabig tan ontulong ed sikatayon paliisay mauges. (Uli. 16:6) Sayan takot so aralem a panamagalang ed Manamalsa tayo, a mamakiwas ed sikatayon paliisan so pamaermen tan isumlang ed sikato. Satan so kaukolan tayon bayuboan tan ipatnag a sanagew.—Uli. 8:13.
2 Agew-agew et sikatayoy pirmin dedesdesen na espiritu na mundo nen Satanas pian miabobon ed saray mauges a dalan to. (Efe. 6:11, 12) Say ag-ayadyarin laman tayo so makasalanan tan natural ya onkiling a manggaway mauges. (Gal. 5:17) Kanian, pian natulok iray ganggan nen Jehova, manliket, tan makagamor na bilay, kaukolan a sikatoy takotan tayo a sanagew.—Deut. 10:12, 13.
3 Diad Hebreos 10:24, 25, abilin itayo a mantitipon ta pian manpapasesegan “nagkalalo la” dia ed sarayan panaon a pambibilayan tayo. Makana so regular a pipiaral pian makapansungdo tayo ed sarayan kaunoran ya agew. Lapud antakot tayon napaermen so Dios, napakiwas itayon onatendi ed saray miting tan pablien tayon maong so gagala na saraya. Moriaen na saramay ontatakot ed Dios a sagradon pribilihyo so pibiang ed saray Kristianon pantitipon.
4 Say itulok ed ganggan ya ipulong so maong a balita na Panarian et sakey nin paraan pian nipatnag tayoy takot ed Dios. (Mat. 28:19, 20; Gawa 10:42) Say manunan gagala na panagpulong tayo et say panulong ed arum a bayuboan da so takot ed si Jehova tan manpasakop ed linawa to. Nagawaan tayo iya diad saray panagpawil, panggunaet a pangigapo na saray panangiyaral na Biblia, insan pangibangat ed arum nipaakar ed amin a ganggan na Dios. Ipatnag tayo sirin so takot tayo’d si Jehova tan say panangaro tayo ed kaparan too.—Mat. 22:37-39.
5 Saramay ag-ontatakot ed Dios et agda nabayuboan so maapresian awawey nipaakar ed espiritual iran bengatla, tan sikaray onsuko ed makapatey a dagem, odino awawey ed kanonotan na mundo. (Efe. 2:2) Determinado itayo komon a ‘manlingkor ed Dios diad maridios a takot tan giwgiw.’ (Heb. 12:28, NW) Diad ontan, anien tayo iray bendision na saramay ontakot ed si Jehova a sanagew.