Ipaamta so Ngaran tan Saray Pidedeneng nen Jehova
1 “Misalamat kayo ed Jehova, tawagan yo so ngaran to; ipaamta yo ed utel na katooan so saray ginawgawa [“pidedeneng,” NW] to. . . . Manggayaga komon so puso na saray manaanap ed Jehova.” (Sal. 105:1, 3) Say salmista ya angisulat ed saratan a salita so akaromog na baleg a personal a gayaga diad impangipaamta ed arum nipaakar ed si Jehova tan saray “pidedeneng” to. Antoran pidedeneng? Andi-duaruwa a saraman so misiglaotan ed maglorian inkaari na Dios tan ed “maong a balita na panangilaban to.”—Sal. 96:2, 3, NW; 145:11, 12.
2 Legan a manasingger tayo ed panaon na Memoryal ed taon 2001, walaan itayo na dakel a rason a manggayaga nipaakar ed saray pidedeneng nen Jehova ed sikatayo. Panon ya ontan? Seguradon say Pangdem na Katawan so sankabalegan a selebrasyon ed taon parad amin a tuan Kristianos. Anggapo lay arum ya okasyon a singa satan no nipaakar ed kaimportantian, gagala, odino paraan a panggagawa ed satan. Saya so panaon ed sikatayon amin pian nodnonoten so ginawa nen Jehova tan si Jesus ed impangitarya na paraan parad kilalaban tayo. Agpankelawan a legan na panaon na Memoryal et natural labat ya ilaloan tayo so idaak na kimey ed lawak a serbisyo, legan tayon ipapakabat so “maong a balita na panangilaban”!
3 Kasin Man-auxiliary Payunir Ka? Nen imbeneg ya Abril walay 19,704 a nan-auxiliary payunir. Nen Mayo, walay nampalista a 13,775. Nen Marso et walay bilang a 6,125. Diad sayan taon, kasin nagawaan tayo lamet ya espisyal iran bulan na apadaak a kimey ed ministeryo so Marso, Abril, tan Mayo? Say Marso so walaan na limaran Sabado, tan say Abril so walaan na limaran Simba. Diad pangiplano ed nagnap a serbisyo ed saray agew na sampot-simba, naimano na dakel a manangipalapag a mantratrabahon sigpot-panaon a makapan-auxiliary payunir ira. Pian naabot so kakaukolanen a 50 oras ed sakey bulan, nakaukolan a naabot na sakey ya auxiliary payunir so promedyon 12 ya oras kada simba. Konsideraen a maalwar so nisuheri iran eskedyul ed kahon diad pahina 4. Ontukoy kasi so sakey ed saraya diad saray sirkumstansiam? No andi, nayarin makapanggawa ka na dilin eskedyul mo pian makapan-auxiliary payunir ed sayan Marso, Abril, tan Mayo.
4 Nepeg a pabiskegen la natan na mamatatken so seseg tan suporta parad apadaak a kimey ed serbisyo. Diad sakey a kongregasyon nen imbeneg a taon no iner et amin a mamatatken tan ministeryal a lingkor so nan-auxiliary payunir, 64 ed 121 a manangipalapag so nampayunir nen Abril! Aliketan met so kongregasyon ed impakanengneng da’d anemiran agbautismadon manangipalapag a ginmapon nanreport ed Marso tan Abril. On, sankaabigan a panaon iya parad ananak tan saray balo ni pian kerewen ed mamatatken no sikaray onkualipikan makapibiang ed mapublikon panagpulong.
5 Mangitarok na Saray Bendision so Malaem a Sagpot: Nanggayagaan na saray kongregasyon a walaan na espisyal iran kalat tan angisekar na malaem a sagpot so dakel a bendision. Arum a kongregasyon so nayarin nagkalautlan mangipurek ed pangobri ed matalag a nakikimeyan a teritorya, ya iyapasakey so arum iran nengneng na panagpulong, odino idanet so panagpulong panamegley na telepono—sakey ya epektibon paraan pian nakatongtong iray agnasasabi ed kaabungan tan saray mairap a nakatongtong iran residenti.
6 Kasin pakaamperan na siopaman so makapuy a bunigas odino inkatakken diad pibiang a nagkalalo no posibli ed serbisyo? Aliwan diad amin a kipapasen. Alimbawa, sakey ya 86 años ya agin bii a walaan na kanser so akapan-auxiliary payunir nen Abril anggaman ed panlarag na saray ulpo to. Say panagpulong panamegley na telepono so nanggawan posibli parad sikato pian sigpot a makapibiang ed serbisyo, ya amadaak na panangidayew to ed si Jehova. Saya so akapasesegan to tan say kongregasyon.
7 Manparaan a Maong Parad Memoryal: Ombana so Memoryal ed sayan taon no Abril 8. Lapud saya et Simba, posiblin dakel so makaatendi. Nayarin nawalaan itayo na sankarakelan a bilang na onatendi no gawaen tayoy biang tayo diad (1) mismon iyatendi tayo tan (2) pangimbita ed arum a mila ed sikatayo diad Memoryal. Siopa iray imbitaan tayo?
8 Nengnengen ed personal iran rekord yo ed lawak na kimeyan iray kangaranan na saraman so angipanengneng na interes ed katuaan, anggaman agyo nira regular a dadalawen. Duara odino taloran simba antis na Memoryal, iyapasakey so pambisita ed amin na saraya tekep na imbitasyon ed Memoryal. No iyabuloy na sirkumstansia yo, iyopresi a samaren iraman so malabay ya onatendi.
9 Diad pigaran kongregasyon, agnauusar so amin ya inimprintan imbitasyon ed Memoryal. Nepeg a seguroen na saray sekretaryo na kongregasyon ya akatarya iray imbitasyon legan a malubay ni panaon a mangibunog ed satan ya amin. Nayarin labay yon imakinelya odino isulat a malinew so oras tan lugar parad Memoryal ed leksab na imbitasyon. Odino nayarin ilaktip so sakey a handbill a pakanengnengan na address na Kingdom Hall no ditan so pakagawaan na Memoryal yo. Bilang panonot, diad maslak a kipapasen nepeg ya iderew a mismo ed onabung iray imbitasyon ed Memoryal.
10 Nonoten Iray Inaktibo: Makapagayaga sano say estudyante na Biblia et idedika toy inkasikato ed si Jehova tan isimbolo iya panamegley na kipalseb ed danum. Balet, kada taon et walaray tinmundan milimog ed sikatayo, tan tinmunda iran mangipaamta ed arum nipaakar ed ngaran tan saray pidedeneng nen Jehova. Walaan itayo na maabig a rason a manpaga. Anggaman maslak ya inaktibo et ag-angikaindan ed katuaan, nayarin tinmunda iran manpulong lapud impakadismaya, personal iran problema, odino arum a kapagaan ed bilay. (Mat. 13:20-22) Saramay linmetey ed espiritual so mankaukolan na tulong pian makapawil ira ed kongregasyon sakbay iran sabsaben na sistema nen Satanas. (1 Ped. 5:8) Diad sayan panaon na Memoryal et kaliktan tayon panbanikelan a tulongan so amin a kualipikado iran inaktibo a mibiang lamet ed pangipulong ed maong a balita.
11 Kaukolan a pakabatan na sekretaryo na kongregasyon iray konduktor na panagaral na libro no sioparay inaktibo ed grupo ra. Say Congregation Service Committee so mangidaulo’d pangiyuksoy ed panagpastol ya idadalaw ed amin ya inaktibo. No adetermina a nagunggunaan so indibidual manlapud personal a panagaral ed Biblia, say service committee so mandesidi no siopay matukotukoy a mangikondukta na panagaral. Anggaman nayarin agnakaukolan a manbayag so panag-aral, say sakey ya apabtangan a mangikondukta ed satan so nayarin mangireport ed oras, panagpawil, tan panangiyaral na Biblia.
12 Nen imbeneg ya Abril, sakey ya agin bii a mankakabkaabungan so angiyopresi na saray magasin ed kalangweran a laki a walad karsada. Inkuan na laki a say asawa to et sakey ya inaktibon Tasi. Tinepet to no iner so kawalaan na Kingdom Hall tan inimbitaan toy agin bii ya ombisita ed sikaran sanasawa. Bilang resulta, inmatendi so sanasawa ed tinmumbok a miting tan impaiyaralan na Biblia.
13 Manparaan Parad Apadaak a Kimey! Onia so inkuan ni na salmista ya angiyabawag a nepeg tayon ipakabat so ngaran tan saray pidedeneng nen Jehova: “Sikato so kantaan yo, sikato so kantaan yo na daydayew; isalita yo so amin a pankelkelawan a gawagawa to. Manliga kayo ed masantos a ngaran to.” (Sal. 105:2, 3) Komon ta ipatnag tayoy kapagaan tayo parad matalonggaring a ngaran nen Jehova tan saray “pankelkelawan a gawagawa” to diad pamadaak ed saray sagpot tayo ed ministeryo, a gawaen so panaon na Memoryal a sankatalonggaringan ed kapiganman!
[Kahon ed pahina 4]
Nanduruman Dalan a Pangiyeskedyul ed 12 Oras Kada Simba Diad Pan-auxiliary Payunir
Agew Oras
Lunes 1 2 - -
Martes 1 - 3 -
Mierkoles 1 2 - 5
Huebes 1 - 3 -
Biernes 1 2 - -
Sabado 5 4 3 5
Simba 2 2 3 2
Dagup: 12 12 12 12
Kasin ontukoy ed sika so sakey ed sarayan eskedyul? No andi, akin ya agmanggawa na dilin eskedyul mo?