Magmaliw ya “Okupado a Tuloy” ed Ministeryom
1 Sano nabasa tayo a nantrabaho si apostol Pablo diad gawaan na tolda legan a walad Corinto, nayarin ikuan tayo a saya so nanlimita ed pankanawnawa ton manpulong. Balet, isasalaysay na Gawa 18:5: “Si Pablo wala a naspot [“okupado,” NW] a tuloy ed panagpulong a papaletan to ed saray Judios a si Jesus sikato so Kristo.” Akin ya okupado a tuloy si Pablo ed panagpulong a kimey? Anggaman dakel ed Corinto so nagmaliw lan mananisia, pinekderan na Katawan a dakel ni so magmaliw a babangatan ed saman a syudad. (Gawa 18:8-11) Kasin walaan itayo na mipadparan rason ta pian magmaliw ya okupado a tuloy ed ministeryo tayo? On. Dakel nin totoo so naromog tan nabangatan na katuaan.
2 Mangusar na Malaem a Panaon ed Serbisyo Legan na Abril: Nayarin kalat yo so pansiansian okupado ed panangipulong ed maong a balita kada bulan. Balet walaray bulan a mangiter ed sikatayo na dakel iran pankanawnawa pian magmaliw ya “okupado a tuloy” ed sayan kimey. Saraya so mangilaktip ed bulan na Abril, say kapantokan na panaoy Memoryal. Kasin iyabuloy na saray sirkumstansiam a makapan-axiliary payunir ka pian napadaak moy sagpot mo ed ministeryo diad sayan bulan? Dakel a manangipalapag a manggagawa ed satan so mayamyaman ya abendisionan. (2 Cor. 9:6) No gagawaen moy anggaay nayarian mo, tandaan a napapaliket si Jehova ed intiron-kamarerwan serbisyom. (Luc. 21:2-4) Antokaman iray sirkumstansiam, gawam a kalat so pagmaliw ya “okupado a tuloy” ed ministeryo legan na Abril. Tan aglilingwanan ya iter so report mo ed lawak na kimeyan diad sampot na bulan ta pian say sagpot mo so napibilang ed saray sagpot na totoo nen Jehova.
3 Bisitaen Iray Balo ni ya Inmatendi ed Memoryal: Diad Pilipinas nen katantaon, say inmatendi ed Memoryal et walay 413,023. Agtayo ni amta so dagup na inmatendi ed sayan taon. Ingen, napatnagan ed saray report a walay baleg a posibilidad parad babaleg a “panagani.” (Mat. 9:37, 38) Sirin, tampol no nayadyari, iyareglo so ibisita ed saray interesado ya inmatendi ed Memoryal pian tulongan ira ed espiritual. Say pangiguntang ni ed ontan iran ibibisita so mangiyabuloy ed ‘isabi na mauges, tan samsamen to imay nitanem ed kapusoan da.’ (Mat. 13:19) Say tampol ya ibisita so pakapatnagan a talagan “okupado [ka] a tuloy” ed ministeryom.
4 Itultuloy a Tulongan Iray Inaktibo: Nen Pebrero sakey ya espisyal a sagpot so inggapo pian tulongan iray inaktibo. No wala so agni abisita ed panagpastol ya idadalaw, saray mamatatken so nepeg a mangiyareglo na ibisita ed sikara met sakbay a manampot so Abril. Saray mamatatken so magunaet a manetermina ed walan pansesengegan na problema na indibidual tan no panon dan natulongan a maong pian aktibo lamet a manlingkor ed si Jehova. Sayan maaron tulong so mangipapanengneng a saray mamatatken so masimoon a mangaasikaso ed responsabilidad da bilang papastol na “pulok na Dios.” (1 Ped. 5:2; Gawa 20:28) Itatarya na paway na Say Panag-Bantayan, Setyembre 15, 1993, pahina 22-3, so ekselenti iran suhestion a nayarin usaren na saray mamatatken sano asikasoen so dinanman ed limaran kaslakan iran problema a nayarin mangaapekta ed saray inaktibo. Unong ed satan, arum so nayarin magmaliw ya aktibo lamet ed lawak na ministeryo legan na Abril.
5 Tulongan so Dakel ni a Magmaliw ya Agbautismadon Manangipalapag: Kasin kualipikado laray ananak yo bilang balo iran manangipalapag na maong a balita? Komusta met iray arum ya iyaaralan yo na Biblia? No saratan so abobonan na mamatatken, agta say Abril so matukoy a panaon parad sikara pian onggapon mangipalapag? No say sakey a too so onaaligwas tan inyaral la ed sikato so brosyur a Kakaukolanen tan say libron Pikakabat, say panagaral na Biblia so nayarin ituloy ed sakey nin libro—balanglan say libron God’s Word, say True Peace, odino say Nankakasakey ed Panagdayew. Say kalat mo et say panulong ed iyaaralan a makadampot na malalaknab ya aralem a pakatalos ed katuaan, onkualipika bilang agbautismadon manangipalapag, tan magmaliw a dedikado tan bautismadon Tasi nen Jehova.—Efe. 3:17-19; 1 Tim. 1:12; 1 Ped. 3:21.
6 Say tuloytuloy tan puron interes yo ed saray iyaaralan yo na Biblia so nayarin ontulong ed sikara diad kaunoran pian sayakupen day katuaan. Sakey a Tasi so akapitongtong ed maedad lan sanasawa ya impapuson inmabobon a paiyaralan na Biblia. Balet say sanasawa so angiguntang ni ed panagaral kayari taloy simba. Kabekta et nigapon siansia so panagaral. Insan, say sanasawa so angansela ed panagaral a nagmaliw labat lan kada ontumbok a simba. Balet, diad kaunoran say asawan bii so inmaligwas anggad punton labay to lay manpabautismo. “Kayarin sikatoy abautismoan,” nanonotan ni na agi, “manag-agus iray lua na saman ya asawan bii lapud liket to, a pati sikami met a sanasawa et akalua kami lapud liket.” On, say pagmaliw ya “okupado a tuloy” ed maong a balita so mangitarok na baleg a gayaga!
7 Say propesiya na Biblia tan saray ebento ed mundo so pakapatnagan a manbibilay itayo ed kasamsampotan la na panaon na anggaan. Natan la so panaon a nakaukolan na amin a totoo na Dios so magmaliw ya “okupado a tuloy” ed pangipakabat ed arum nipaakar ed maong a balita. Ipapaseguro nen apostol Pablo a satan a kimey so talagan “aliwan kaapaan ed Katawan.”—1 Cor. 15:58, NW.