Sankaepektiboan so Simpli
1 Akin a saray malangwer a manangipalapag so mabetbet a makaala ed imano na saraman so panginanabangan da na mensahe na Panarian? Say sakey a rason et simpli iray pananalita ra. Arum a manangipalapag so nayarin mangipasen a say epektibon panagpulong et mankaukolan na alay abig a presentasyon. Balet, ipapanengneng na eksperiensia a sankaepektiboan so simpli tan malinew a presentasyon.
2 Inyabawag nen Jesus so Panarian na Dios ed simpli tan diretsaan a paraan tan impasal toray babangatan to ya ontan met so gawaen da. (Mat. 4:17; 10:5-7; Luc. 10:1, 9) Sikatoy angusar na simpli iran introduksion, tepet, tan ilustrasyon pian naala so imano na saray ondedengel ed sikato tan nasabi so kapusoan da. (Juan 4:7-14) Maabig ya aligen tayo so ehemplo to tan mangiter na saray presentasyon a mainomay a talosan.
3 Say “maong a balita na Panarian” so mensahe a nepeg ya iyabawag tayo. (Mat. 24:14) Say pangusar ed Panarian bilang manunan tema yo so ontulong pian napansiansian simpli so presentasyon yo. Tongtongen iray bengatlan paninteresan na saray dumerengel yo. Mas interesado iray bibii nipaakar ed pamilya ra nen say nipaakar ed mapolitika iran tongtongan. Say kapapagaan a tuloy na ama et say trabaho to tan say inkaligen na pamilya to. Saray kalangweran so interesado ed arapen da; saray maedad a totoo et interesado ed magmaong a bunigas tan ed kaligenan da. Saray totoo so kaslakan a mapaga nipaakar ed lokal iran ebento nen say nagagawa ed ararawin pasen. Kayari pangitongtong ed saray bengatla a kaslakan a paninteresan, ipaimano iray bendision a panggayagaan na matulok a katooan diad silong na uley na Panarian na Dios. Sankaepektiboan so pigaran simpli tan pinilin maong iran salita ya atekepan na sakey a teksto pian sagyaten so interes na katongtong yo.
4 Nayarian yon igapoy tongtongan diad pangibagay:
◼ “Seguradon onabobon ka a say katooan et sasaloten na dakel ya agnatambal iran sakit. Balet kasin akabatan mo la ya insipan na Dios a magano to lan sigpot ya ekalen so amin a nengneng na sakit, ontan met ed ipapatey?” Abuloyan ya onebat, insan basaen so Apocalipsis 21:3, 4.
5 Tekep na malinew tan simpli iran presentasyon, komon ta nasabi yoy kanonotan tan kapusoan na dakel a totoo ed teritorya yo, a tulongan iran makaaral nipaakar ed si Jehova tan say ilalon panggayaga ed andi-anggaan a bilay.—Juan 17:3.