Atateng—Ipasal Iray Ananak Yo Manlapud Inkaugaw
1 “Ibangat mo so anak ed dalan a nepeg to a laen, tan anggan sano masiken la ag-onarawi ed sikato.” (Uli. 22:6) Atateng, no agyo labay ya ‘onarawi’ ed dalan na katuaan iray anak yo, kapigan so nepeg a pangigapo ed ontan a panangipasal? Manlapud inkaugaw!
2 Sanen inkuan nen Pablo a say espiritual ya inkibangat nen Timoteo et “manlapu ed inkaugaw,” mapatnag a say labay ton ibaga et manlapud inkianak to. (2 Tim. 3:14, 15) Bilang resulta, binmaleg si Timoteo bilang ekselentin espiritual a too. (Fil. 2:19-22) Atateng, nepeg yo met ya igapo “manlapu ed inkaugaw” pian ipasal iray anak yo ‘pian ombaleg ed arap nen Jehova.’—1 Sam. 2:21.
3 Salogen Pian Ombaleg: No panon a saray ankelag nin tanaman et mankaukolan na tuloytuloy a pansalog pian ombalbaleg a magmaliw iran kiew, saray ananak met, anggan antoy edad da, so kaukolan a nasalog na katuaan na Biblia pian ombaleg a magmaliw a matatken ed espiritual iran lingkor na Dios. Say manunan paraan pian nibangat so katuaan ed ananak tan natulongan iran nagamoran so inkamaapit ed si Jehova et diad panamegley na regular a panagaral na Biblia bilang pamilya. Balet sikayoran atateng, ikonsidera so dukey na pan-imano na kada ugaw. Parad ankelag nin ananak, say mabetbet tan antikey iran panagaral so lalon epektibo nen say mataltalag tan andukey.—Deut. 11:18, 19.
4 Agbalot memelagen so posibilidad na ananak yon makaaral. Estoryaen ed sikara so nipaakar ed saray karakter ed Biblia. Ipadrowing ed sikara iray litrato nipaakar ed saray eksena ed Biblia odino ipaiyakto iray agawa ed Biblia. Usaren a maong iray video tan audiocassette tayo, pati saray drama nipaakar ed Biblia. Iyadapta so panagaral na pamilya ed edad tan abilidad na ananak yon makaaral. Igapo ed mainomay a panangipasal, a kankaninot; balet diad ibabaleg na ugaw, say pangipasal ed sikato so mas malaknab tan progresibo. Gawaen a mabilabilay so panangibangat ed Biblia tan aliwan apasakey. Labay yon ‘manpilalek’ ed Salita iray ananak yo, kanian gawaen so anggaay nayarian yon pagmaliwen a makapainteres so panagaral.—1 Ped. 2:2.
5 Ipibali Ira ed Kongregasyon: Mangiletneg na progresibo iran kalat ed ananak yo ta pian magmaliw iran sigpot a napibali ed kongregasyon. Anto so nayarin manunan kalat da? Inkuan na atateng na ugugaw nin ananak: “Inggapo miran impasal ya onyurong a mareen diad Kingdom Hall.” Diad saginonor, tulongan iray anak a mankomento diad saray miting ed dili ran salita tan gawaen a kalat da so pampalista ed Teokratikon Eskuelaan Parad Ministeryo. Diad lawak na serbisyo, saray maabig a kalat a dampoten et say pangiyopresi ed sakey a tract diad unabung, pangibasa na teksto, pangipresenta ed magasin, tan pibiang ed makabaliksan a pitotongtong ed saray unabung.
6 Mangiletneg na Makapasagyat ya Alimbawa: Kasin inagew-agew a narerengel kayo na ananak yo a mansasalita nipaakar ed si Jehova tan manpipikasi ed sikato? Kasin nanenengneng da kayo a manaaral ed Salita to, onaatendi ed saray miting, manpupulong, tan maliket ed panggagawa na linaway Dios? (Sal. 40:8) Importante a satan so naimano ra tan gagawaen yon mankakasakey irayan bengatla. Sakey a binmaleg lan anak a bii so angikuan nipaakar ed ina to, ya amabaleg ed anemiran ananak a magmaliw a matoor a Tastasi: “Say akasagyatan min maong et say mismon alimbawa nen Ina mi—mas mapuersa so alimbawa to ed inkamatoor nen saray salita.” Onia so inkuan na ateng na apatiran ananak: “Aliwa labat lan kaslakan so balikas a ‘manunaan si Jehova ed bilay mi’ noagta say paraan na kabibilay mi.”
7 Atateng, igapo lan ibangat a masakbay so ananak yo, ibangat ira ed katuaan manlapud Salita na Dios, mangiletneg na progresibo iran kalat, tan mangitarya na sankaabigan ya ehemplo. Panliketan yo no agawaan yo iratan!