Balon Aporma Iran Korporasyon

Say Enero 15, 2001, a paway na Say Panag-Bantayan so angireport ed organisadon paraan a tuloy-tuloy ya iyaabanti na saray Tastasi nen Jehova ed kimey nipaakar ed Panarian diad interon dalin. Impaliwawa met na satan no panon a saray nanduruman legal ya ahensia so nauusar bilang instrumento pian ipakurang so pangikayat ed maong a balita. Saratan ya ahensia odino korporasyon so nakaukolan diad pitunosan ed lokal tan nasyonal iran ley, a singa kakaukolanen ed Salita na Dios. (Roma 13:1) Lapud panduruma tan kalaknab na kimey tayo, say Mananguley ya Ulop so angaproba ed pamorma na kaaruman iran korporasyon pian naasikaso iray pigaran nakakaukolan na Tastasi nen Jehova diad Estados Unidos. Niraya so balon korporasyon:

Christian Congregation of Jehovah’s Witnesses

Religious Order of Jehovah’s Witnesses

Kingdom Support Services, Inc.

Saraya so ipakurang a misiglaotan ed Watch Tower Bible and Tract Society of Pennsylvania tan Watchtower Bible and Tract Society of New York, Inc. Naapresyan maong so pikokoopera yo ed sarayan pananguman a ginawa na Mananguley ya Ulop diad panumpal ed kimey to a mangasikaso ed amin a kayarian na Katawan.​—Mat. 24:45-47.