Sakey a Nidumaduman Pampapasesegan
1 Anggapoy ondadalan ya agew ya agnasusubok so pananisia na saray totoo nen Jehova. Lapud amta na Diablo ya antiktikey lay panaon to, gagawaen to so unor lan panangataki to pian deralen so integridad tayo ed si Jehova. (Apo. 12:12) Importante a ‘manpabiskeg itayo ed Katawan dia ed biskeg na pakayari to’ pian ‘nayarian tayo so mitalindegan ed mauges ya agew, tan, sano agawa tayo la ya amin, wala itayo a sitatalindeg.’—Efe. 6:10, 13.
2 Say pitipon ed saray kapananisiaan tayo et sakey a probisyon nen Jehova pian natulongan itayon ombiskeg. Inapresya iya nen apostol Pablo. Pinirawat ton nakaiba iray Kristianon agagi to pian parepareho iran napaseseg tan ombiskeg. (Roma 1:11, 12) Pian napabiskeg itayon manggawa na linaway Dios, maaron inyuksoy na Mananguley ya Ulop so pangiter ed sikatayo na pribilehyo a nagunggonaan ed pampapasesegan diad magano lan nagawa a “Maridios a Katutulok” a Distriton Kombension.
3 Onatendi Pian Nagunggonaan: Gawaen a kalat ya atendian iyan amin a taloran agew. ‘Minabang itayo’ diad isabi tayo antis na unonan kanta tan pansiansia tayo anggad pangibaga tayoy impapuson “Amen” diad pansaran pikakasi. (Isa. 48:17, 18) Dakel so mangiyarunsa lan masakbay na eskedyul na trabaho ra pian nipanaon day iyatendi ed amin a taloran agew. Tua, nayarin aliwan mainomay so ikerew ed amo yo na bakasyon, balet pinaseguroan itayo nen Jehova a tulongan to itayon manggawa na linawa to. (1 Juan 5:14, 15) No agtayo ni itan agawaan, natan la so panaon pian iseguro lan iyuksoy so naluganan tan napanpundoan. Makapankompiyansa itayo a bendisyonan nen Jehova iray sagpot tayo ya atendian so amin na sayan taloy agew.—Uli. 10:22.
4 Talaranan so Pakapabiskegan: Asali yo ta lan imbaga so onia kayari na asamblea: “Agaylay abig na saman!” Akin kasi et ontan so nayarin alikna yo? Lapud bilang ag-ayadyarin totoo kalkalna itayon nakesawan, kanian kaukolan tayoy napabiskeg ed espiritual. (Isa. 40:30) Oniay naimano na sakey ya agin bii: “Uupoten na sayan sistema so kasil ko, tan saray kombension so mangiyaapiger ed espiritual a panmoriak, a pakakagamoran koy kaukolan a biskeg ed espiritual. Ompatnag a napapaseseg ak diad eksakton panaon a kakkaukolan ko itan.” Nayarin akalikna kayo met lay singa ontan.
5 Aliwa labat a diad panamegley na saray paliwawa tan interbio a napapabiskeg itayo noagta ontan met ed arum niran makanakanan aspekto na saray kombension tayo. Oniay inkomento na sakey ya agi: “Say talagan aapresyaen ko et say malinew, tan praktikal ya aplikasyon na saray prinsipyo na Biblia. Siempre, makanakana [met] iray drama ed pangibabangat no panon itayon nagunggonaan ed saray alimbawa nensaman, maabig man odino mauges. Saray balon paway so naynay kon pitalaran, tan panliliketan ko iratan anggan wala ak la’d abung.”
6 Saray kombension et importantin probisyon nen Jehova legan na “sarayan panaon a maatap [a mairap a pidenengan].” (2 Tim. 3:1) Tutulongan itayo na saratan ya ontalineng ed sayan impuyan a simbawa: “Manpuyat kayo, mansiansia kayo ed pananisia, manugali kayo na singa ugali na laki, tan ombiskeg kayo.” (1 Cor. 16:13) Sirin, determinado itayo ya onatendi ed kada sesyon tan panggayagaan so daakan a pakapabiskegan dia ed “Maridios a Katutulok” a Distriton Kombension!
[Kahon ed pahina 3]
Iplanon Atendian so Amin a Taloy Agew
■ Onkerew na bakasyon ed trabaho.
■ Paireserba la so panpundoan ed pankombensionan, no nakaukolan.
■ Iyareglo lay naluganan paonla ed kombension.