Pablien so Kaykayarian a Parad Teokratiko Iran Kimey
1 Sanen iyuuksoy so pangapiger ed templo, kinomendaan nen Arin Josias iramay apabtangan a mankimey, a kuanto: “Anggapo so panagbilang ya agawa ed sikara na kuarta a niyawat ed lima ra; ta nanagamil ira a mataletalek.” (2 Ara. 22:3-7) Say panamabli na saraman a lalaki ed sagrado iran bengatla so apatnagan a tuloy ed impamemben da ed kaykayarian ya inmatalek ed sikara. Natan, legan a mibibiang itayo ed masanton kimey na maong a balita na Dios, kaukolan tayo met ya ipatnag so inkamatoor diad panamemben ed kaykayarian a niiter ed sikatayo.
2 Diad Lawak na Ministeryo: Say apresasyon ed makanan mensahe a lugan na saray publikasyon tayo tan say pikabat ed gastos diad impamawala ed saratan so mamakiwas ed sikatayon pablien a maong iratan. Nepeg ya agtayo basta mangititilak na literatura ed saramay agtalagan mangaapresya ed mensahe na Biblia. No samet labat ya interes so impatnag na too ed maong a balita, nayarin iyopresi tayo’d sikato so sakey a tract imbes a say arum a literatura.
3 Ibunog so literatura diad paraan a napatnagan so panamabli ed satan. Ag-ititilak itan ed saray publikon lugar a no iner et natakatak labat itan. Pian napaliisan so pakadarak, imbentaryoen so nakekeraan ni diad abung antis a mangala na kaaruman iran literatura. No lanang a walay sulok mo ed kada isyu na saray magasin, konsideraen so pamawas ed pedidom.
4 Saray Publikasyon a Personal ya Usaren: Nepeg a pedidoen tayo labat iray publikasyon a talagan kaukolan tayo. Nagkalautlan nepeg a kabkaabigan lambengat so alaen sano pedidoen tayo iray deluxe a Biblia, Reference Bible, tan arum niran angkabaleg a publikasyon, a singa say Concordance, Index, saray tomo na Insight, tan say libro a Proclaimers, ya amin iratan so apawala diad baleg a gastos.
5 Kasin seseguroen mon isulat so ngaran tan address mo ed personal iran kopyam a publikasyon? Ontulong iya pian aglamet mangala na saray publikasyon a kasalat na awatak. No walay abalang mon panagkantaan, Biblia, odino aralen a publikasyon, nayarin naromog mo itan diad akolekta iran abalang a bengatla diad Kingdom Hall odino diad pan-aasambleaan.—Luc. 15:8, 9.
6 Panggunaetan tayo sirin so makabat a pangusar ed saray literatura. Saya so paraan pian nipatnag tayo so inkamatoor tayo diad pangasikaso ed saray kayarian na Panarian ya inmatalek nen Jehova ed sikatayo.—Luc. 16:10.