Usaren a Maong Iray Publikasyon Tayo
1. Panon tayon aligen so ehemplo nen Jesus ed panamabli ed saray probisyon nen Jehova?
1 Kayari na mamilagron impamakan nen Jesus ed dakerakel a totoo, impatipon to iray kera. (Mat. 14:19-21) Say ontan a panamabli ed probisyon nen Jehova so angipanengneng na maabig ya ehemplo ed sikatayo pian ipatnag tayoy ‘pisasalamat’ diad pangusar a maong ed amin ya itatarya nen Jehova panamegley na “matoor tan makabat ya aripen.”—Col. 3:15; Luc. 12:42; Mat. 24:45-47.
2. Panon tayon napaliisan so pakabunton na saray magasin?
2 Saray Magasin: Mainomay a nabunton iray magasin. No naynay a walay nakeran magasin tayo, nepeg tayon bawasan so order tayo. Panon to balet iray daan a magasin? Siansia nin balo ed totoo iray artikulo na saratan. No dakel so daan a magasin tayo, natulongan itayo na manangasikaso na serbisyo odino sananey nin elder pian epektibon niyopresi iratan.
3, 4. Antoran punto so nepeg tayon nonoten sano mangala tayo na saray literatura diad Kingdom Hall?
3 Arum a Literatura: No sananey la so opresin literatura, nengnengen yo nin unona ed abung yo ompan wala la iratan a kopyan iyopresi yo ed lawak antis kayon mangala na kaaruman iran literatura diad Kingdom Hall. Mangala labat na saray kopyan usaren yo ed loob na sakey simba, tan mangala lamet no nipalima yo la iratan.
4 Parad saray literaturan usaren yon personal, man-order labat na saray kaukolan yo. Isulat yoy ngaran yo ed niganan pangisulatan pian no nabalang yo et nipawil ed sikayo. No manguusar kayo na Watchtower Library on CD-ROM tan no angisimpen kayo la na personal iran kopya yon magasin, nayarin agyo la kaukolan so man-order na personal iran kopya na saray tomo na Watchtower tan Awake!
5. Anto so lawas tayon nonoten sano iyopresi tayo iray publikasyon tayo?
5 Pangiyopresi na Saray Publikasyon: Iyopresi tayo iray publikasyon tayo ed saramay talagan interesado. Lawas nonoten a sikatayoy manunan responsable pian sapotan so gastos ed sarayan makanan uusaren ed ministeryo tayo. Sano itilakan tayo na publikasyon iray interesado, agtayo nababaingan a salambiten so pribilehyo ran panagdonasyon ed sankamundoan a kimey.
6. Akin a pablien tayon maong iray publikasyon tayo, tan napakiwas itayon manggawa na anto ed saratan?
6 Mamilagron intaryaan nen Jesus so arum na pisikal a tagano, balet mas mabetbet a tinagano to ed espiritual iray totoo. Inkuan nen Jesus: “Aliwa a say tinapay labat so napambilay na too, noag say amin a salitan ombesngaw ed sangi’ Dios.” (Mat. 4:4) Ibabangat na saray publikasyon tayo iray katuaan na Biblia ya importante ed pakagamor na andi-anggaan a bilay. (Juan 17:3) Agaylan makanakana iratan!