Paliisan so Pangemtan ed “Saray Maapan Bengatla”
1 Sakey a popular lan paraan na komunikasyon natan et say E-mail. Anggaman nayarin matukoy diad sankapamilyaan tan mankakaaro so panginabang na personal iran eksperiensya tan ideya panamegley na sayan paraan, antoran “maapan bengatla” so nisiglaot ed ag-apegetan a panangusar ed E-mail?—Uli. 12:11, NW.
2 Panalwar Nipaakar ed E-Mail: Ibabaga na arum a liknaen dan lalo iran makapitatalosan ed organisasyon nen Jehova no makakaawat ira na ipapasen dan balon impormasyon panamegley na E-mail. Nayarin kabiangan ed saya iray eksperiensya, saray nota nipaakar ed saray ebento diad Bethel, saray report ed desyang odino panamasegsegang, tan anggan say kompidensial ya impormasyon ya inyanunsio diad saray Kingdom Ministry School. Arum so ompatnag a masyadon magunaet a mangipawit ed saratan a mensahe, diad paniilalon makauna lan mangipaamta na impormasyon ed kakaaro ra.
3 No maminsan, saray impormasyon tan eksperiensya so apikewet odino alablabas. Odino nayarin lapud gunaet a pagmaliwen a makapasagyat, arum so angipasabi na lingon pakatalos. Saramay maganat a mangiparungtal ed saratan a bengatla so mabetbet ya agmakaamta ed amin a katuaan to. (Uli. 29:20) Diad arum a kaso, anggan sano agnapanisiaan so estorya, satan so ipapasa bilang bengatlan paninteresan. Saratan ya agsusto odino makapalikdo iran report so mipara ed “saray palson tongtong,” ya agmangiyaalibansa na puron maridios a debosyon.—1 Tim. 4:6, 7, NW.
4 No mangipasa ka na impormasyon ya apaneknekan ya aliwan susto, eebatan mo so kagonigon tan kawetwet a nayarin epekto na saya. Sanen naawat nen David so alablabas a report ya amin ya ilalak to so pinatey, “pinilat to so saray kawes to” lapud pirmin gonigon. Balet, diad katuaan to et sakey labat ya ilalak to so inatey. Peteg a makapagonigon itan, balet sayan inkaalablabas ed panangibalita so amaloor ed gonigon nen David. (2 Sam. 13:30-33) Seguradon agtayo labay so manggawa na antokaman a mamalikdo odino manismaya ed anggan siopa ed saray agagi tayo.
5 Say Tinuro na Dios a Paralanan: Tandaan a say mangatatawen ya Ama tayo so anuro na paralanan na pitatalosan, say “matoor tan makabat ya aripen.” Responsabilidad na satan ya “aripen” so panetermina no anton impormasyon so itarya ed sankaabungan na pananisia, ontan met ed ‘manepeg a panaon’ a pangiter ed satan. Sayan espiritual a tagano so nitatarya lambengat panamegley na teokratikon organisasyon. Nepeg a lawas tayon ontupleg ed paralanan na Dios parad napanmatalkan ya impormasyon, ya aliwan diad nansasangal iran manguusar na Internet.—Mat. 24:45.
6 Saray Internet Web Site: Walaan itayo na opisyal ya Internet Web site: www.watchtower.org. Sayan site so magenap la pian niiter so impormasyon ed publiko. Agla nakaukolan so siopaman ya indibidual, komite, odino kongregasyon a mangiparaan na Web page nipaakar ed saray Tastasi nen Jehova. Arum so angipakabat ed saray lugan na saray publikasyon tayo laktip lay amin a teksto tan reperensya tan inyopresi da ni ingen iray kopya na materyal ed kombension diad panamegley na pandonasyon. Balanglan walay tubo odino anggapo, say pangopya tan pangibunog ed saray publikasyon na Tastasi nen Jehova diad elektronikon dokumento et sumlang ed saray ley nipaakar ed kanepegan ed panagkopya. Anggaman nayarin moriaen na arum a saya et panaglingkor ed saray agagi, saya so ag-inabobonan tan kaukolan ya itunda.
7 Say pangagamil na maong a pakatebek tan inkalimpio na nonot sano mitatalosan panamegley na elektroniko so maneguro a saray kanonotan tayo so napno na “mabli tan makapaliket a kaykayamanan.”—Uli. 24:4.