Iyabawag so Mensahe na Panarian
1 ‘Kaukolan ya ipulong ko so ebanghelyo na panariay Dios ta sikato’ya so nibakian ko.’ (Luc. 4:43) Diad panamegley na saratan a salita et impaamta nen Jesus so tema na ministeryo to—Panarian na Dios. Say mensahen iyaabawag tayo natan so nisentro met ed Panarian, unong a nipasakbay diad Mateo 24:14: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi so anggaan.” Antoran katuaan nipaakar ed Panarian na Dios so kaukolan a narengel na totoo?
2 Manuuley la so Panarian na Dios ed katawenan tan magano to lan salatan so amin ya uley na too. Nibasileng la so Diablo manlapud tawen, tan amantok la so panaon na peles a marelmeng a sistema na bengabengatla. (Apoc. 12:10, 12) Say marelmeng a daan a sistema nen Satanas so sigpot a naderal, balet agnatenyeg so Panarian na Dios. Satan so mansiansia lawas.—Dan. 2:44; Heb. 12:28.
3 Peneken na Panarian iray maabig a pilalek na amin a matulok a totoo. Paandien na satan so paniirap a resulta na bakal, krimen, inkaruksa, tan inkaduka. (Sal. 46:8, 9; 72:12-14) Niwala so daakan a tagano ed amin. (Sal. 72:16; Isa. 25:6) Saray sakit tan deperensya’d laman so bengabengatlan apalabas la. (Isa. 33:24; 35:5, 6) Legan ya onaaligwas ed inkayadyari so katooan, napasimbaloy dalin a magmaliw a paraiso, tan manayam so totoo ed inkasaksakey a walaay pantutunosan.—Isa. 11:6-9.
4 Ipatnag tayo a labay tayoy magmaliw ya uuleyan na Panarian na Dios diad paraan na pambibilay tayo natan. Say mensahe na Panarian so kaukolan a mangimpluensya ed interon kabibilay tayo, laktip la iray kalat tan prayuridad tayo. Alimbawa, anggaman walaan itayoy obligasyon a manlegpet ed sankaabungan tayo, agtayo nayarin abuloyan iray kapagaan ed materyal a mangamper ed intereses na Panarian. (Mat. 13:22; 1 Tim. 5:8) Imbes, nepeg tayon talinengen so simbawa nen Jesus: “Ingen anapen yo nin unona so panarian, tan say inkatunong to; et amin iraya a bengatla [saray materyal a nakakaukolan ed bilay] niarum ira ed sikayo.”—Mat. 6:33.
5 Inkaganatan lan narengel tan onkiwas so totoo ed mensahe na Panarian legan a wala ni so panaon. Tulongan tayo komon ira a manggawa ed satan diad ‘pangusar na pananagyat nipaakar ed panarian na Dios.’—Gawa 19:8, NW.