Ibangat ed Arum so Puron Lenguahe
1 Anggaman manlalapu ira’d nanduruman ‘nasyon, tribu, binaleybaley tan pansasalita,’ saray Tastasi nen Jehova so mankakasakey, sakey a tuan internasyonal ya impanaagi. (Apoc. 7:9) Diad mundo natan a naapag-apag, satan so makatantanda. Panon itan a posibli? Lapud niiter ed sikatayo so “pananguman para ed puron lenguahe.”—Sof. 3:9, NW.
2 Makapakelkelaw Iran Epekto: Anto iyan puron lenguahe? Satan so suston pakatalos ed katuaan a naromog ed Salita na Dios nipaakar ed si Jehova tan saray gagala to, nagkalautla say katuaan nipaakar ed Panarian na Dios. Unong ya impasakbay nen Jesus, sayan katuaan so nipapasabi panamegley na nanengneng a mangaraldalin a paralanan, “say matoor tan makabat ya aripen,” a say resulta et saray totoon ‘manlalapu ed amin a pansasalita na saray nasyon’ so manasayakup ed tuan panagdayew.—Mat. 24:45; Zac. 8:23.
3 Legan a nanaaralan na totoo so puron lenguahe, sikaray napapakiwas a mangitukoy na kabibilay da ed saray estandarte nen Jehova. Naaaralan day magmaliw a “naspot a mankakasakey ed saksakey ya isip tan saksakey a panagnonot.” (1 Cor. 1:10) Say bangat na Dios so mamapawala met ed sikara na maptek a kondukta tan maabig tan matuan panagsalita, nagkalautla ed panangipasabi na maong a balita ed arum. (Tito 2:7, 8; Heb. 13:15) Sarayan makapakelkelaw a pananguman so mamapagalang ed si Jehova.
4 Alimbawa, sakey a lakin apasabian na maong a balita so walaan na dakel a tepet tan amin iratan so naebatan manlapud Biblia. Lapud apakiwas ed nadngelan to, ginapoan toy nanaral a mamidua ed sakey simba tan inmatendi ed saray miting. Sikatoy nikelawan ed maaron impangabrasa ed sikato diad Kingdom Hall, lapud maslak a wadman et nanduruma so rasa ra. Diad aganon panaon, sikaran sanasawa so anguman ed kabibilay da tan sikaray abautismoan. Nanlapula’d saman sikatoy akatulong ed manga 40 totoo ni a manlingkor ed si Jehova, a kabiangan so dakel a membro na pamilya to. Anggaman ed inkabaldado to, agano ni labat et sikatoy ginmapon nanlingkor bilang payunir.
5 Ibangat so Arum: Saray nagagawa ed mundo so mamapakiwas ed dakel a matuan totoo pian usisaen lamet so panmoria tan kabibilay da. Singa si Jesus, pampilalekan tayo komon a tulongan ira. Saray epektibon panagpawil tan panangiyaral na Biblia so tombok pian natulongan iramay masimoon a makaaral ed puron lenguahe.
6 Say sakey a paraan ya apaneknekan ya epektibo parad totoon okupado et say pangikondukta na antikey a panangiyaral na Biblia diad mismon puerta ra. (km 5/02 p. 1) Kasin asali yo la iya? No sikayoy manpaparaan pian manggaway panagpawil, mamili manlapud insert na Mayo 2002 a Ministeryo Tayo ed Panarian na sakey a presentasyon ya ontukoy ed unabung. Dakel ed saray presentasyon ed sayan insert so denisinyo pian nidirekta so unabung diad paningbat ed brosyur a Kakaukolanen odino ed libron Pikakabat. Ipasal so presentasyon pian kayari yon iparungtal itan et nituloy yo diad paningbat na sakey ed saray parapo. Mamili na sakey odino duaran teksto ed parapo a basaen tan singbaten, tan sampotan itan diad pamalesa na tepet. Ontulong itan pian nituloy yo ed parapo a getma yon singbaten diad ontumbok ya idalaw yo.
7 Naeeksperiensya na totoo nen Jehova so dakel a bendisyon lapud panaaral da ed puron lenguahe. Komon ta maseet tayon tulongan so arum pian miulop ira ed sikatayon ‘ontawag ed ngaran nen Jehova’ tan ‘manlingkor ed sikato a benebenek.’—Sof. 3:9.