Tulong ed Dugan Panaon
1 Sanen amoria nen apostol Pedro a nakaukolan a pabiskegen iray kapananisiaan to, sikato so nampaga kanian sikaray maaron pinanonotan tan pinaseseg to. (2 Ped. 1:12, 13; 3:1) Pinaseseg to ‘iramay akagamor na pananisia’ ya itultuloy dan paaligwasen iray espiritual a kalidad da pian ag-ira magmaliw a “manmenengmeneng tan ag-ombunga ed pikakabat ed Katawan tayo a Jesu-Kristo.” (2 Ped. 1:1, 5-8) Say gagala nen Pedro et tulongan iran naseguro so impanawag tan impamili ed sikara nen Jehova, ta pian ‘naromog ira diad kareenan, ya andian na matik tan karumsisan ed imaton na Dios.’ (2 Ped. 1:10, 11; 3:14) Parad dakel, say panamaseseg to so nipanpanaon a tulong.
2 Saray Kristianon manangasikaso natan so mapaga met ed saray totoo na Dios. Diad sarayan ‘maatap a panaon a mairap a pidenengan,’ dakel a lingkor nen Jehova so kaukolan a mipuligesgesan ed makapasubok iran sirkumstansya. (2 Tim. 3:1) Lapu ed ompapalalo iran problema ed pinansyal, pamilya, odino personal, nalilikna na arum so singa alikna nen David: “Saray agnabilang a mamauges linimpog da ak; saray kasulitan ko asagmak da ak kanian ontan ya agko nayarian so ontangwa; dakel ira nen saray buek na ulok: kanian say pusok onkapuy ed siak.” (Sal. 40:12) Sarayan pakadesdesan so makapabelat a tuloy kanian napapaulyan da la iray makanan espiritual a responsabilidad da tan agla ra mibibiang diad Makristianon ministeryo. Ingen, anggaman ed kairapan da et ‘agda nilingwanan iray ganggan nen Jehova.’ (Sal. 119:176) Natan so dugan panaon pian sikaray tulongan na mamatatken.—Isa. 32:1, 2.
3 Pian natulongan ira, saray mamatatken so napapaseseg a manggawa na nikaduman sagpot pian tulongan iramay agla makakapibiang ed kimey a panagpulong. Gagawaen la natan so impasyan sagpot pian nasumpal itan tan mantultuloy anggad bulan na Marso. Akerew ed saray manangasikaso na panagaral ed libro ya ondalaw ed saray inaktibo pian tulongan ira ed espiritual tan pian natulongan iran mangituloy lamet ed aktibidad da a kaibay kongregasyon. No nakakaukolan, nayarin iyarunsa so personal a pangiyaral na Biblia. Arum a manangipalapag so nayarin nakerew ya ontulong. No sikayoy apabtangan ya ontulong, saray sagpot yo so makagunggonan tuloy, nagkalautla no sikayoy mamapaseseg diad mapangasi tan makatalos a paraan.
4 Amin tayo so talagan manggayaga sano walay mangituloy lamet ed aktibidad to a kaibay kongregasyon. (Luc. 15:6) Saray sagpot tayo a mamaseseg ed saray inaktibo so peteg a magmaliw a “salita a nibalikas ed dugan panaon.”—Uli. 25:11, NW.