Makapagayaga so Grupon Panagpulong
1 Sanen imbaki nen Jesus so 70 babangatan a manpulong, imbangat to ira no anto so ibaga ra, inapag to ira a sanderwa, tan inturo to so teritorya a kobrian da. Saya so amagayaga ed sikara. (Luc. 10:1-17) Saray totoo na Dios met natan so nakikinlongan, naoorganisa, tan napapaseseg lapud grupon panagpulong da.
2 Saray Mamatatken so Mangidadaulo: Saray mamatatken so walaan na manunan betang ed panutulong ed amin a makapibiang a regular diad panagpulong. Say manangasikaso na serbisyo so mangidadaulo ed panggagawa na saray uksoyan ed kapapaway ed pegley-simba. Responsabilidad na kada manangasikaso na panagaral ed libro so pangorganisa ed kimey na grupo to, nagkalalo la diad sampot na simba. Panapanaon, sano mantitipon so interon kongregasyon parad lawak na serbisyo, a singa diad kayari Panagaral na Panag-Bantayan, kaukolan ya asikasoen na kada manangasikaso na panagaral ed libro iray pankaukolan na grupo to.
3 ‘Masimpit tan Unong ed Uksoyan’: Say aturon mangikondukta ed pantitipon parad lawak na serbisyo so kaukolan a mangigapo ed suston oras tan limitaan to so pantitipon ed 10 odino 15 minuto. Sikatoy kaukolan a mangiyareglo na saray grupo tan mangiasain na teritorya (likud no aasikasoen itan na saray manangasikaso na panagaral ed libro, unong a nipaimano) sakbay ton saraan panamegley na pikakasi. Diad ontan et agla kaukolan a manmumungkog iray manangipalapag diad teritorya, a makabawas ed dignidad na kimey tayo. Satan met so mitunosan ed simbawa nen Pablo: “Nagawa komon so sarayan amin ed kasimpitan tan mauksoy.” (1 Cor. 14:40) Maabig so resulta na sayan uksoyan no amin ya onatendi ed sarayan pantitipon et onsabi ed suston oras, sigpot a mikoopera ed manangidaulo, tan onla lan tampol diad teritorya bektaman ya asumpal so pantitipon.
4 Maniiba ed Pankakasakey: Saray uksoyan a grupon panagpulong et alay abig a pankanawnawa tayo pian napikabkabatan so arum diad kongregasyon. Bangta aliwan makapuy so masakbay lan pitarato ed sakey a nakaulop, makagunggona met ed sikatayo so iyatendi ed saray pantitipon parad lawak na serbisyo ya anggapo ni so akitaratoan tayo. Nayarin napabtangan itayon mikimey ed sakey ya agtayo ni kabkabat a maong, diad ontan et ‘napalaknab’ tayo so panangaro tayo.—2 Cor. 6:11-13.
5 Say grupon panagpulong so mamaseseg tan mamakasakey ed sikatayo bilang ‘mankakatangbayan ed katuaan.’ (3 Juan 8) Komon ta sigpot itayon mibiang ed satan!