Pansiansiaen a Simpli so Mata Yo
1. Antoy kabaliksan na pakawalaay simplin mata, tan akin ya importante itan?
1 Diad Sermon to ed Palandey, impaimano nen Jesus so baleg a nagawaan na piguratibo odino espiritual a mata ed interon kabibilay tayo. Inkuan to: “Kanian no say matam et maralus, say amin a laman mo nalingbus na liwawa. Bangbalet no say matam et mauges; say amin a laman mo nalingbus na bilunget.” (Mat. 6:22, 23) Say simplin mata et akasentro ed saksakey a gagala, salanti, say panggawa ed linawa na Dios ya agnisuawi na pirmin panaburido ed saray materyal a bengatla. (Mat. 6:19-21, 24-33) Antoy makatulong pian napansiansia tayon simpli so mata tayo?
2. Anton panmoria ed materyal iran bengatla so ipapaseseg na Salita na Dios?
2 Pamayubo ed Inkakontento: Sakey a Makasulatan ya obligasyon so pangitarya na magenap a nakaukolan na sankaabungan. (1 Tim. 5:8) Balet agkakaukolanen na saya a lawas itayon tumalikarkar parad sankaabigan tan sankabaloan iran bengatla. (Uli. 27:20; 30:8, 9) Imbes et papasesegen itayo na Kasulatan a mankontento ed ‘tagano tan kawesen,’ a nakaukolan ed bilay. (1 Tim. 6:8; Heb. 13:5, 6) Ontulong ed sikatayo so itulok ed sayan simbawa pian napansiansia a suston akasentro so mata tayo.
3. Antoy makatulong ed sikatayon agnapabelatan so inkasikatayon mismo?
3 Makabat itayo no agtayo pabebelatan so inkasikatayo na agmet nakaukolan a panutang tan pangaliw na kaykayarian odino gegemtan a mangalay dakel ya oras tan atensyon. (1 Tim. 6:9, 10) Panon tayon nagawaan itan? Sano momorekdeken no antoy kaukolan a gawaen, maseet ya ipikasi so bengatla tan matuan usisaen no kasin nasebelan na satan iray espiritual a gegemtan. Determinadon iyuna iray espiritual a bengatla ed bilay yo.—Fil. 1:10; 4:6, 7.
4. Akin a kaukolan tayoy manggawa na paraan pian napasimpli so kabibilay tayo?
4 Pasimplien so Kabibilay Yo: Say sakey nin tulong pian naresistian so pananagyat na materyalismo et say panggawa na paraan a napasimpli so kabibilay yo. Oniay inkuan na sakey ya agin laki a naamtaan ton nayarian manaya na pamilya toy manbilay ya anggapo iray sobsobran materyal a bengatla: “Dakel la natay panaon ko ed kongregasyon pian manlingkor ed saray agagi. Kombinsido ak a bendisyonan nen Jehova so amin a lingkor to a mangiyuuna ed tuan panagdayew nen say personal a pankaabigan da.” Kaliktan yo ta so nawalaan na nagkalalo iran bendisyon diad pamasimpli ed kabibilay yo?
5. Akin a nakaukolan so mantultuloy a pansagpot pian napansiansian simpli so mata tayo?
5 Nakaukolan so mantultuloy a pansagpot pian naresistian so impluensya nen Satanas, say materyalistikon mundo to, tan say mismon ag-ayadyarin laman tayo. Imbes a paulyan so mata tayo a manyatawyataw, isentro tayo itan ed panggawa na linawa na Dios tan ed mablin ilalo tayo ya andi-anggaan a bilay.—Uli. 4:25; 2 Cor. 4:18.