Balon Programa ed Agew na Espisyal ya Asamblea

Say mata et sakey a komplikadon desinyo. (Sal. 139:14) Ingen ta sarag na satan so magmaliw a simpli ya onaapasakey ed sakey lambengat a bengatla ed kada bekta. Tua itan diad literal tan ed piguratibon paraan. Pian magmaliw a malinew tan akaapasakey so espiritual a pakanengneng tayo, nepeg tayon isentro so imano tayo ed panggawa na linawa na Dios. Lapud lawas ondarakel a pakaabalaan ed mundo nen Satanas, agaylan matukotukoy a say programa parad agew na espisyal ya asamblea ed 2006 so mangiparungtal ed teman “Pansiansiaen a Simpli so Mata Yo”!​—Mat. 6:22, NW.

Anto so nagawaan tayo pian makaawat itayo na bendisyon manlapud si Jehova? (Uli. 10:22) Sayan tepet so nasingbat ed parte a “Gamoran Iray Bendisyon Diad Pamasiansia ed Mata a Simpli.” Ipabitar na saray interbio no panon itayon nagunggonaan ed pangiyaplika ed saray Makasulatan a prinsipyo. Say unonan paliwawa na bisitan espiker a “Pamasiansia ed Mata a Simpli Diad Marelmeng a Mundo,” so mamasakbay ed sikatayo ed saray bengatlan mangomplika ed kabibilay tayo tan kalkalnan mamaer ed espiritualidad tayo. Naaralan tayo met no antoy nalalanor ed panamili ed “maong a betang.”​—Luc. 10:42.

Panon a napaseseg na atateng tan say arum ni iray kalangweran a Kristiano a mangiyapasakey ed saray maespiritual a gegemtan? Saray parte ya “Atateng a Duga so Pangikekenaan Da ed Saray Pana Ra” tan “Saray Tobonbalo a Manadampot ed Espiritual Iran Kalat” so mangilaktip ed saray balikas na atateng tan saray kalangweran ed sayan importantin tepet. (Sal. 127:4) Say unor a paliwawa na bisitan espiker so maningbat ed no panon itayon makapibansag ed organisasyon bilang indibidual, pamilya, tan kongregasyon.

Balanglan agano itayo ni ed katuaan odino manlilingkor tayo la ed si Jehova diad loob la na saray dekada, importante a pansiansiaen tayo so ‘mata tayo a maralus’ odino simpli. Say programa ed agew na espisyal ya asamblea so ontulong ed sikatayon manggawa ed satan a mismo.