Balon Programa ed Agew na Espisyal ya Asamblea
No makanengneng odino makadngel itayo na pasakbay balet ta agtayo ontulok ed satan, makadesyang so resulta. Nagkalalo lan importante so ikiwas ed espiritual a panangiwanwan ya itatarya nen Jehova. Saya so nidanet ed programa ed agew na espisyal ya asamblea ed taon 2005. Say tema et “Manimano Kayo No Panon so Pandengel Yo.”—Luc. 8:18, NW.
Diad unonan paliwawa to, say bisitan espiker so mangonsidera no panon a say simbawa ed manangilukas iran kapitulo na apuyanan a sulat nen Pablo ed saray Hebreo so onaplika ed sikatayo natan. Diad pansampot a paliwawan, “Lawas Manimano ed Panamilin na Dios,” tulongan na bisitan espiker so amin a mangusisa no kasin sikaray peteg ya ontatalineng ed si Jehova, ed Anak to, tan ed “say matoor tan makabat ya aripen.”—Mat. 24:45.
Saray pigaran parte na programa so nagkalalo lan makagunggona ed saray pamilya. “Saray Pamilyan Agnisusuawi Diad Itatalineng Da ed Salitay Dios” so ontulong ed sikatayon paliisan iray bengatla ed mundo a mangamper ed espiritual ya ibubulaslas tayo. Satan so mangilaktip ed saray interbio ed saramay nanggawa na saray pananguman ta pian niyuna ra so espiritual iran bengatla. Kabiangan ed “No Panon a Napabiskeg Iray Tobonbalo ed Mapetepet ya Itatalineng ed Salita na Dios” iray interbio ed saray kalangweran ya angidepensa ed katuaan diad eskuelaan, ed saray kalimog da, odino ed ministeryo. “Saray Angkekelag ni ya Ontatalineng ed Dios tan Makakaaral” so ontulong ed sikatayon agmelmelagen so abilidad na saray ugugaw ed pakaaral. Naamtaan tayo ed saray interbio ed saray kalangweran tan saray atateng da so maabig a gunggona a resulta na panangipasal ed saray ananak ed saray dalan nen Jehova manlapud inkaugaw da.
Legan a ‘titilaan nen Satanas so lapag a sankamundoan,’ ipapanengneng nen Jehova ed saray matoor a lingkor to so dalan a nepeg dan pankurangan. (Apo. 12:9; Isa. 30:21) Say mapetepet ya italineng ed simbawa to tan matulok a pangiyaplika ed satan ed bilay tayo so manggawa ed sikatayon makabat, mangitarok ed sikatayo na liket, tan mangitonton ed andi-anggaan a bilay.—Uli. 8:32-35.