Repaso ed Agew Na Espisyal Ya Asamblea

Sayan materyal so usaren bilang paunan impormasyon tan repaso na programa ed agew na espisyal ya asamblea parad 2005. Say artikulo a “Balon Uksoyan ed Panrepaso ed Saray Programa ed Asamblea,” a walad pahina 4 na sayan insert, so mangipapaliwawa no panon iyan gawaen. Legan na repaso, apagen so oras ta pian nasingbat so amin a tepet. Say repaso so nepeg a niyapasakey ed no panon tayon niyaplika so impormasyon a niparungtal.

SESYON ED KABUASAN

1. Akin ya ompapalalo so pankaukolan ya ontalineng ed si Jehova? Anto so kabaliksan na italineng? (“No Akin a Talinengen so Boses nen Jehova”)

2. Panon a napansiansia na saray pamilya so maabig a programa na espiritual ya aktibidad? (“Saray Pamilyan Agnisusuawi Diad Itatalineng Da ed Salitay Dios”)

3. Panon a saramay kabiangan na sirkito so anganamot ed saray pankanawnawan mantasi ed impormal a paraan? (“Gawaen so Amin a Bengatla Parad Kigloriaan na Dios”)

4. Antoran leksion so naaralan tayo manlapud panmadmaran ya agawa a naromog ed Hebreos kapitulo 3 tan 4? Panon a mitotongtong si Jehova ed sikatayo natan? (“Say Italineng ed Ibabaga na Dios so Manalimbeng ed Sikatayo”)

5. Panon kayon agunggonaan ed paliwawa ed bautismo? (“Dedikasyon tan Bautismo”)

SESYON ED NGAREM

6. Anto so natebek tayo ed si Jesus sanen sikatoy kalangweran ni, tan panon a saray kalangweran ed sirkito so mangaalig ed ehemplo to? (“No Panon a Napabiskeg Iray Tobonbalo ed Mapetepet ya Itatalineng ed Salita na Dios”)

7. Antoray pigaran paraan a nigapo na saray atateng so pangipasal ed angkelag niran ananak tan ed saray kalangweran ed saray dalan nen Jehova? (“Saray Angkekelag ni ya Ontatalineng ed Dios tan Makakaaral”)

8. Antoray pigaran espisipikon pamaakaran a nakaukolan tayo so manimano ed si Jehova, ed Anak to, tan ed “matoor tan makabat ya aripen”? (Mat. 24:45) Akin ya importantin gawaen tayo itan? (“Lawas Manimano ed Panamilin na Dios”)