Espisyal a Kampanya a Pangibunog ed Balon Brosyur
1 Dakel a totoo natan so napapagaan ed saray nagagawa ed mundo, ingen ta pigpigara so makaamta no akin a nagagawa iratan, no antoy nagawa ed arapen, tan no antoy nepeg dan gawaen pian naliktaray onsasabin panangukom. (Eze. 9:4) Pian natulongan iran natalosan so kabaliksan na saray nagagawa natan, sakey ya espisyal a kampanya ed pangibunog na balon brosyur a Mantultuloy a Manbantay! so gawaen ed interon bansa manlapud Lunes, Marso 21, anggad Simba, Abril 17.
2 Niyopresi so brosyur sano manpupulong ed kabkaabungan, manggagawa na panagpawil, mantatasi ya impormal, odino sano walad publiko iran pasen. Balet ta nepeg ya agbastabasta ititilak so Mantultuloy a Manbantay! Imbes, tilakan labat iramay interesado ed ibabaga na Biblia nipaakar ed kabaliksan na saray nagagawa ed mundo. Saramay anggapoy interes da ed mensahe so nayarin opresian labat lay tract.
3 Nayari yon naalay imano na too diad pangibagan:
◼ “Dakel a totoo natan so napapagaan ed saray graben problema tan makapakebbiew iran nagagawa a kaslakan la natan. [Manalambit na alimbawan balitato’d lugar yo.] Antam ta a nipasakbay la iraya ed Biblia? [Abuloyan ya onebat. Insan mangibasa na sakey a tekston ontukoy ed alimbawan abitla, a singa say Mateo 24:3, 7, 8; Lucas 21:7, 10, 11; odino 2 Timoteo 3:1-5.] Ipapaliwawa na Biblia no antoy kabaliksan na sarayay nagagawa natan tan no antoy manatalaran ed katooan diad arapen. Labay mo ni makaamtay dakel? [Abuloyan ya onebat. Iyopresi so brosyur no interesado.] Libre iya. Balet no labay mo so mandonasyon ed sankamundoan a kimey mi, pigara man itan, maliket min awaten.”
4 Odino nayarin epektibo met iyan introduksion:
◼ “Panaaburidoan a maong na dakel a totoo iray makapabiglan nagagawa odino saray trahedya a naeeksperiensya ran mismo. Panumamengan na arum no akin ya aabuloyan na Dios a nagawa iratan. Say Biblia so mangipapaseguro ed sikatayo a magano lan paandien na Dios so paniirap na katooan. Imanoen yo pa iray gunggona ya iter na Dios ed totoo. [Basaen so Salmo 37:10, 11.] Labay mo ni makaamtay dakel?” Sampotan unong ed nidatak ed tagey.
5 Panggunaetan ya alaen so ngaran tan address na kada toon angawat na kopya na brosyur, tan iyuksoy so pamawil tan pamayubo ed interes da. Saray suhestion no panon iyan gawaen so ompaway ed Abril 2005 ya isyu na Ministeryo Tayo ed Panarian. No angipanengneng na interes so too ed primeron dalaw, nayarian yo lan igapo a tampol so panagaral na Biblia ya usaren so Mantultuloy a Manbantay! odino say arum a publikasyon, a singa say brosyur a Kakaukolanen.
6 Naala iray kopya na balon brosyur kasumpal na Pantitipon Parad Panagserbi a siningbat iyan artikulo. Isusuheri a diad gapo, saray manangipalapag tan payunir so mangala labat na nasarag dan ibunog ed primeron pigaran agew na kampanya. Komon ta bendisyonan nen Jehova iyan espisyal a kimey parad kirayewan to tan pakagunggonaan na saray matuan-impanpuson totoo ed amin a pasen.—Sal. 90:17.