Panaon na Memoryal—Panaon na Pamadaak ed Kimey
1. Antoy epekto na saray ‘nigetar a piesta’ ed matakot ed Dios iran Israelita?
1 Walaray niganan panaon ed loob na sakey taon a seselebraan na kadaanan ya Israelita ‘iray nigetar a piesta nen Jehova.’ (Lev. 23:2) Say impangigana ray panaon pian morekdeken so kaabigan na Dios da so nanresulta ed baleg a liket tan nagkalalon seseg ed puron panagdayew.—2 Awa. 30:21–31:2.
2, 3. Akin a matukoy labat a padaaken tayo iray maespiritual a kimey tayo legan na panaoy Memoryal, tan kapigan tayo selebraan itan?
2 Diad modernon panaon, say makapaliket a teokratikon kimey tayo so lalon onaaligwas kada taon legan na panaoy Memoryal. Saya so panaon a momorekdeken tayon maong so mabmablin regalo ya inter nen Jehova ed sikatayo, salanti, say bogbogtong ya Anak to. (Juan 3:16; 1 Ped. 1:18, 19) Legan tayon dadalepdepen so panangaron impatnag nen Jehova tan say Anak to, napakiwas itayo met a mangidaydayew ed Sikato tan magunaet a manggawa ed madibinon linawa to.—2 Cor. 5:14, 15.
3 Diad sayan taon et selebraan so Pangdem na Katawan dia ed Huebes, Marso 24, kaselek na agew. Tan lapud walay espisyal a panangibunog tayo ed brosyur a Mantultuloy a Manbantay! manlapud Marso 21 anggad Abril 17, labay tayon pankakasakeyen so nikabiig a sagpot tayo legan na satan. Panon tayon napadaak so pibiang tayo ed ministeryo legay bulan na Marso, Abril, tan Mayo?
4, 5. (a) Antoy akatulong ed arum pian nipulong ed mas dakel nin totoo so maong a balita? (b) Antoy nalmoan yon epektibo ed lugar yo?
4 Pulongan so Dakel nin Totoo: Manggawa na paraan pian napulongan so dakel nin totoo anggad posible sano mibiang ed lawak na serbisyo. Niyuksoy yo kasi so mankabkaabungan sano say maslak a totoo et walad abung, a singa diad ngarem odino pansirunget? No walaray kagrupo yo ed panagaral ed libro a malabay a manpulong sakbay na panagaral, makapangiyuksoy so manangasikaso na panagaral ed libro na antikey a pantitipon sakbay ya ompaway ed lawak na serbisyo pian nakimeyan so asingger a teritorya.
5 Say sananey nin paraan pian nakatongtong so dakel a totoo et diad pampulong ed saray publikon pasen. Labay na sakey ya agin bii a taga Hapon so man-auxiliary payunir anggaman sigpot-panaon so trabaho to. Kanian insuheri na sakey a matatken a nayarian toy inagew-agew a manpulong ed karsadan asingger ed istasyon na tren sakbay na iloob to ed trabaho. Kayari ton atalonaan so inkamabaing tan panagludlurey na pigaran pasahero, sikatoy awalaan na 40 a rota na magasin, a kabiangan ed satan iray pasahero, empleyado ed istasyon na tren, tan saray makankayarian ed kabangibang a puesto. Walay promedyon 235 a magasin a niyopresi to ed sakey bulan. Diad panginanabang to na Makasulatan iran punto ed saray totoo diad loob na pigaran minuto labat kada agew, sikatoy akapangigapo na anemiran panangiyaral na Biblia.
6. Panon a napadaak na saray kalangweran iray maespiritual a kimey da?
6 Saray Pankanawnawa Pian Makapantasi: Legan na Marso, Abril, tan Mayo et bakasyon na maslak a maneeskuelan manangipalapag. Pankanawnawa iraya pian makapan-auxiliary payunir ira. Niarum ni, napadaak na saray Kristianon kalangweran so kimey da diad pantasi ed eskuelaan. Nayarin nasurprisa kayo ed panupapet na saray kaklase yo nipaakar ed saray sisiaen yo. Akin ta no anamoten yo so mantasi legan na saray diskusyon ed klase odino sano mansulat na saray essay? Arum so akapantasi la diad impangusar da ed saray video tayo. Walaray akapangigapo met na panangiyaral na Biblia ed saray kaklase ra tan atulongan da ran onaligwas anggad dedikasyon tan bautismo. Maabig irayan paraan pian ‘nidayew so ngaran nen Jehova.’—Sal. 148:12, 13.
7. (a) Panon ya inanamot na sakey ya agin laki iray pankanawnawa pian makapantasi ed arum? (b) Wala ta met lay naeksperiensyam a mipara ed satan?
7 Diad inagew-agew a kimey mo, manggawa ka na paraan pian nitongtong ed saray totoo so nipaakar ed maomaong a Dios tayo tan saray alay abig a sipan to. Sakey ya agin laki ya inagew-agew a manbiabiahe ed parehon tren so manpupulong ed saray kaluganan to sano matukoy. Alimbawa, legan ton aalagaren so ontumbok a tren diad sakey ya istasyon, inagew-agew ton pinulongan so sakey a balolaki diad loob na manga limaran minuto. Bilang resulta, sayan balolaki tan saray katrabahoan to so impaiyaralan na Biblia. Ikokondukta toy panag-aral na Biblia diad loob na tren legan na biahe ra. Agnambayag, say agi so inasinggeran na sakey ya akulaw ya abayag lan ontatalineng ed saray pantotongtong da pian paiyaralan met na Biblia. Panggagayagaan met na sayan akulaw so panagaral to diad saray agew na ilulugan to ed tren. Diad onian paraan, sayan agi so makapangiyaaral ed samploran indibidual ya onlulugan ed tren.
8. Antoran metodo so nayarin ontulong ed saray nalilimitaan lapud inkatakken odino beblay na laman pian napadaak so pibibiang da ed ministeryo?
8 Panon to no nalilimitaan so nagawaan mo lapud inkatakken odino beblay na laman? Wala niran siansia so paraan pian napabulaslas moy pangidaydayew mo ed si Jehova. Asalim ta lay nampulong panamegley na telepono? No agka segurado no panon iyan gawaen, itongtong iya ed manangasikaso na panagaral ed libro. Nayarin niyuksoy toy pakapikimey ed sika na saray manangipalapag a manguusar la’d sayan metodo. No maniibaan kayo, makaaral kayo ed balang sakey tan makapantutulongan kayo pian epektibo kayon makapantasi. Walaray maabig a suhestion ed pampulong panamegley na telepono a naromog ed Pebrero 2001 a Ministeryo Tayo ed Panarian, pahina 5-6.
9. Panon tayon natulongan iray iyaaralan na Biblia ya onkualipikan mibiang ed mapublikon ministeryo a kaibay kongregasyon?
9 Say pakaatendi ed Memoryal so nayarin mamaseseg ed saray balo ni pian napabulaslas so panangidayew da ed si Jehova. Natulongan yo iran manalona ed kapapagaan da ed pibibiang ed pormal a panagtasi no iyestorya yo ed sikara iray makapaseseg ya eksperiensya yo ed lawak na serbisyo tan diad mantultuloy a pangipasal yo ed sikaran mangipaliwawa ed bangabangat na Biblia tan mangidepensa ed pananisia ra. (1 Ped. 3:15) No imbalikas na iyaaralan na Biblia so pilalek to ya onggapon mangipalapag na maong a balita, mitongtong ed mangidadaulon manangasikaso. Diad ontan et iyuksoy to so pitongtong ed iyaaralan pian naseguro no onkualipika la kasin mibiang ed mapublikon ministeryo a kaibay kongregasyon. Seguradon mamapaliket a maong ed puso nen Jehova so pakanengneng ed saray balo ni ya onsuporta ed sankatalbaan ya inkasoberano to!—Uli. 27:11.
10. (a) Panon itayon natulongan na say maabig ya eskedyul pian makapan-auxiliary payunir? (b) Niyuksoy mo ta so pan-auxiliary payunir nen imbeneg a taon legan na panaon na Memoryal? Panon mon agawaan?
10 Makapan-auxiliary Payunir Ka Kasi?: Nepeg a seryosoen na saray auxiliary payunir so kakaukolanen a 50 ya oras. (Mat. 5:37) Kabaliksan na saya a kaukolan mon iyuksoy so pangitalaga na promedyon 12 oras parad lawak a serbisyo a sinimba. Ontukoy kasi ed saray kipapasen mo so sakey ed saray eskedyul parad pan-auxiliary payunir a walad pahina 5? No andi, nayarian mo kasin iyuksoy so eskedyul mo pian makapan-auxiliary payunir ka no Marso, Abril, odino Mayo? Kerewen ed si Jehova a bendisyonan to iray sagpot mon mamadaak ed serbisyom.—Uli. 16:3.
11. Panon a natulongan na mamatatken tan ministeryal a lingkor iramay man-auxiliary payunir?
11 Suportaan a maong na saray mamatatken tan ministeryal a lingkor so panggugunaet mon pagmaliwen iyan panaon na Memoryal a sakey a nikabkabiig a panangidayew ed si Jehova, nagkalalo la ta walay kampanya tayo nipaakar ed brosyur a Mantultuloy a Manbantay! Maseguron dakel ed sikara so man-auxiliary payunir met. Iyuksoy na mamatatken so kaaruman iran pantitipon antis ya ompaway ed lawak na serbisyo, unong a nakaukolan, a singa diad ngarem, diad saray labi na pegley-simba, tan diad sampot simba. Pian naamtaan no iner tan no kapigan gawaen iray pantitipon tan no siopay nayarin mangidaulo, katongtongen na mamatatken iramay walaan na pihon plano odino mannononot a manpayunir. Panggunaetan na mamatatken so manggawa na saray uksoyan pian walan walay nakaibam a manangipalapag ed saramay agew tan oras ya inyeskedyul mon ipaway. Diad onian paraan et niletneg a malet iray plano tan dakel so maabig a nagawaan.—Uli. 20:18.
12. Antoy mamakiwas ed sikatayo a mangidaydayew ed si Jehova ed amin a panaon?
12 Gawam so Anggaay Nayarian Mo: No ag-iyabuloy na kipapasen mo a makapan-auxiliary payunir ka, tandaan ya aawaten nen Jehova iray sagpot tan sakripisyo tayo ‘unong a wala ed sikatayo, aliwan unong ya anggapo ed sikatayo.’ (2 Cor. 8:12) Dakel iray nepeg tayon pisalamatan ed si Jehova. Oniay insulat nen David tekep na maabig a rason: “Galangen ko si Jehova ed amin a panaon: say kigalang to naynay dia ed sangik.” (Sal. 34:1) Ontan komon so determinasyon tayo legan na sayan panaon na Memoryal.
[Kahon ed pahina 3]
Panon Mon Napadaak so Kimey Mo?
◼ Manpulong sano walad abung iray totoo
◼ Mantasi diad saray publikon pasen
◼ Mantasi diad pantatrabahoan odino eskuelaan
◼ Manpulong panamegley na telepono
◼ Man-auxiliary payunir
[Tsart ed pahina 5]
Pangaligan Iran Eskedyul Parad Pan-auxiliary Payunir—No Panon Mon Niyeskedyul so 12 Oras a Panserbi ed Lawak ed Kada Sakey Simba
Diad saray kabuasan na Lunes Anggad Sabado
Nayarin isandi so Simba ed anggan anton agew.
Agew Peryodo Oras
Lunes Kabuasan 2
Martes Kabuasan 2
Mierkoles Kabuasan 2
Huebes Kabuasan 2
Biernes Kabuasan 2
Sabado Kabuasan 2
Dagup ya Oras: 12
Duaran Sanagew
Anggan dinan a duaran agew so pilien. (Base ed saray agew ya apili, sayan eskedyul so nayarin mamawala labat na dagup a 48 oras ed loob na sakey bulan.)
Agew Peryodo Oras
Mierkoles Sanagew 6
Sabado Sanagew 6
Dagup ya Oras: 12
Duaran Labi tan diad Saray Sampot-Simba
Anggan dinan a duaran labi na pegley simba so pilien.
Agew Peryodo Oras
Lunes Labi 11⁄2
Mierkoles Labi 11⁄2
Sabado Sanagew 6
Simba Kapalduay Agew 3
Dagup ya Oras: 12
Taloran Ngarem tan Sabado
Nayarin isandi so Simba ed anggan anton agew.
Agew Peryodo Oras
Lunes Ngarem 2
Mierkoles Ngarem 2
Biernes Ngarem 2
Sabado Sanagew 6
Dagup ya Oras: 12
Personal ya Eskedyul Ko ed Serbisyo
Desidien lan bukor no pigaran oras so igetar mo ed kada peryodo.
Agew Peryodo Oras
Lunes
Martes
Mierkoles
Huebes
Biernes
Sabado
Simba
Dagup ya Oras: 12