Utang a Nepeg Tayon Bayaran ed Arum
1 Alikna nen apostol Pablo ya obligasyon ton pulongan iray totoo. Kabat ton ginawa nen Jehova a posible so pakaliktar na amin a nengneng na totoo panamegley na mablin dala na Anak To. (1 Tim. 2:3-6) Kanian, imbaga nen Pablo: “Mautang ak ed saray Griegos tan Barbaros, makabat tan agmakabat.” Sikato so magunaet tan makulin nankimey pian nabayaran so utang to ed kaparan totoo diad impanginabang toy maong a balita ed sikara.—Roma 1:14, 15.
2 Singa si Pablo, saray Kristiano natan so mapeleng a manginanabang na maong a balita ed saray kapara ran totoo diad amin a pankanawnawa. Lapud maples a panasingger na “baleg a kairapan,” inkaganatan lay pananap tayo ed saray matuan-impanpuson totoo. Komon ta pakiwasen itayo na peteg a panangaro ed totoo a pankulian iyan manangiliktar-bilay a kimey.—Mat. 24:21; Eze. 33:8.
3 Bayaran so Utang Tayo: Say manunan paraan pian nakatongtong tayo iray totoo et diad panagpulong ed kabkaabungan. Diad saray teritoryan amayamay so agnababanaan a totoo ed kaabungan da, ontulong so pamasiansiay suston rekord tan say ipawil ed nanduruman oras pian mas dakel nin totoo so nakatongtong tayo. (1 Cor. 10:33) Nakatongtong tayo met iray totoo panamegley na pampulong diad saray pasen na negosyo, karsada, diad saray parki, paradaan, tan diad panamegley na telepono. Tepetan tayoy inkasikatayo, ‘Mamapasya ak ta’n salien so amin a paraan na panagpulong pian ninabang so mensahe na bilay?’—Mat. 10:11.
4 Aliknan tuloy na sakey a payunir so responsabilidad ton nakatongtong so amin a totoo ed teritorya ra. Walay sakey ya abung a naynay ya akasara so bintana to tan anggapoy toon nababanaan. Balet, aminsan ya agew sanen agmanpupulong so payunir, naimano ton walay kotsi ed arapan na sayan abung. Lapud agto labay a napalampas iyan pankanawnawa, sikatoy nantembre. Walay inmebat a laki, tan sayan primeron impantongtong so nanresulta ed aminpigan impawil na sayan agin bii tan say asawa to. Diad kaunoran, say laki so angawat na panagaral ed Biblia, tan natan et bautismado la. Sikatoy misalsalamat ta alikna na sayan bii so responsabilidad a pulongan so arum.
5 Lapud maples a panasingger na anggaan, natan la so panaon pian bayaran so utang tayo ed kapara tayon too diad impasyan pansagpot ed panagpulong a kimey.—2 Cor. 6:1, 2.