Balon Programa na Sirkiton Asamblea

Legan na kaunoran iran agew na sayan mauges a daan a mundo, importante a pansiansiaen tayo so espiritual a kawes tayo tan alwaran so Kristianon talindeg tayo. (Apo. 16:15) Sirin, matukotukoy a say tema na sirkiton asamblea ed 2006 et “Kawesan Yoy Inkasikayo na Balon Personalidad.”​—Col. 3:10, NW.

Unonan Agew: Say primeron simposium a “Pangipatnag na Saray Aspekto na Balon Personalidad,” so mangipabitar ed no panon a say pamayubo ed balon personalidad so mangunggona ed sikatayo ed amin ya aspekto na bilay tayo. Panon tayon nabayuboan so balon personalidad? Satan so nakonsidera ed unor a duaran paliwawa ed unonan agew, “Disiplinaen Yoy Inkasikayo Nipaakar ed Dugan Panagdalepdep” tan “Edukasyon a Manmomoldi ed Balon Personalidad.”

Komaduan Agew: Nasingbat ed komaduan simposium a “Pamayubo ed Dila na Makabat” no panon a naimpluensyaan na balon personalidad so panangusar tayo ed dila. “Kasin Nadadaeg Mo so Marelmeng a Sakey?” so tema na publikon paliwawa, a mangipapabitar a kaukolan so pansiansian alerto ed saray taktika nen Satanas. Say unor a duaran paliwawa na sirkiton asamblea a, “Pansiansiaen Yoy Inkasikayon Agnamatikan na Mundo” tan “Inagew-agew Tayon Pasimbaloen so Inkatoo Tayo,” so ontulong ed sikatayon italirak iray ugali tan konduktan agmitunosan ed matunong iran dalan na Dios tan mansiansian mapekder ed panagdayew tayo ed si Jehova.

Agaylan pampirawatan tayon nagamoran iyan panamaseseg ya isulong tan pansiansiaen so balon personalidad!