Ipatnag so Personal ya Interes—Diad Pagmaliw a Maimano
1 Si Jehova a Dios tan si Kristo Jesus so ekselente no nipaakar ed panangamta ed espisipikon pankaukolan na totoo tan ed panangiyopresi na tulong ed sikara. (2 Awa. 16:9; Mar. 6:34) Sano natukoy tayo iray paniinteresan tan kapagaan na saramay nakakatongtong tayo ed ministeryo, nayarin niyadapta tayo ed saratan so pangipresenta tayo ed maong a balita.
2 Magmaliw a Maobserba ed Saray Detalye: Si Jesus et maimano. (Mar. 12:41-43; Luc. 19:1-6) Ontan met, sano onasingger itayo ed puerta na unabung tan imanoen tayo iray relihyoson dekorasyon, akasulat ed luluganan, odino gakgalaw ed sular, nayarin makapawala itayo na saray pankanawnawa pian epektibon makapantasi nipaakar ed maong a balita.
3 Say ipapatnag na lupa odino walna na too so nayarin mangipabitar ed nalilikna to. (Uli. 15:13) Nayarin lapu ed inkaandi sakey ya inadaro odino arum nin makapadesdes iran kipapasen et kaukolan toy naligliwa. Nayarin sikatoy naligliwa no basaan tayo na pigaran matukoy a teksto. (Uli. 16:24) Kasin manaapuran ombuat so unabung odino sankaeba toy onaakis ya ugaw? No ontan, nayarin magmaong no iyuksoy lan dalawen ed arum a panaon. Diad pagmaliw tayon makonsidera tan “maabagey,” nayarin napakiwas tayo so too ya ontalineng diad ipawil tayo.—1 Ped. 3:8.
4 Itukoy Iray Ibaga Yo: Naimano nen apostol Pablo a say syudad na Atenas et walaan na altar a nidedika “Dia ed Sakey a Dios ya Ag-amta.” Saya so angimpluensya ed impangipresenta to ed maong a balita, lapud inkuan to: “Saman sirin so igalgalang yo ya agyo amta, sikato so ipakabat ko ed sikayo.” Say inkataktika nen Pablo so amakiwas ed saray pigaran wadman a mangonsidera ed mensahe na Panarian tan magmaliw a mananisia.—Gawa 17:23, 34.
5 Mipadpara, ontulong ed sikatayo so pagmaliw a maimano pian natebek tayo so paninteresan na too sirin et niyadapta tayo so metodo tayo. Mangitepet na saray nayarin mamakiwas ed unabung a mangibesngaw ed nononoten to. Mannonot na saray tekston nausar pian paaralemen so interes to. (Uli. 20:5) Say pagmaliw tayon maimano tan say pangipatnag tayoy masimoon a personal ya interes ed arum so ontulong ed sikatayon sidudunong ya inabang so maong a balita.