Edukasyon a Mangitonton ed Bilay
1 Agaylan makatumang a nanengneng ya onliliwawa so kamataan na saray totoo legan dan natatalosan so katuaan manlapud Salita na Dios! Say pananginabang ed arum na kakabatan nipaakar ed Dios tan say gagala to parad katooan et peteg a makapnek. Nayarian na satan ya edukasyon ya itonton so sakey a too ed andi-anggaan a bilay.—Juan 17:3.
2 No Akin a Superyor: Natan et say edukasyon so iyoopresi ed amin lawari lan posiblin paraan tan ed amin a naisip lan tema. (Ecl. 12:12) Balet satan a kakabatan so agmakakompara ed balor na “saray makapakelaw a gawa na Dios.” (Gawa 2:11) Apaapit ta na say edukasyon ya iyoopresi na mundo iray katooan ed Manamalsa tan kasin nipaamta na satan so gagala to? Atulongan kasi na satan iray totoo a natalosan no antoy nagagawa sano ompatey itayo odino no akin a kasmak lay kairapan? Akapangiter ta itan ed katooan na ilalo? Kasin akatulong itan pian napaaligwas so uksoyan na pamilya? Andi. Diad panamegley lambengat na madibinon edukasyon a naromog tayo iray peteg ya ebat ed saray sankaimportantian a tepet ed bilay.
3 Itatarya na madibinon edukasyon so bengatlan nankulangan a maong na say mundo natan, salanti, say panamaaligwas ed moral. Say panaglabi lapud rasa odino tribu, tan nasyonalismo et sigpot ya eekalen na Salita na Dios ed puso na saramay mangawat tan mangiyaplika ed saray bangat na satan. (Heb. 4:12) Pinakiwas na satan iray totoo a mangipulisay ed amin a nengneng na karawalan tan ‘isulong so balon inkatoo.’ (Col 3:9-11; Miq. 4:1-3) Sakey ni, say madibinon edukasyon so amakiwas la ed minilyon a mangiwaklit ed saray linmamut lan maong ya ag-agamil tan ugali ya agmakapaliket ed Dios.—1 Cor. 6:9-11.
4 No Akin a Maganat Itan Natan: Ipapaimano na say Baleg ya Instruktor tayo so kabaliksan na panaon a kawalaan tayo la. Lugan na saray nipropesiyan panangukom to so nipanpanaon ya impormasyon a nepeg ya iyabawag ed interon dalin. (Apo. 14:6, 7) Si Kristo so manuuley la ed tawen, asingger lan nabagbag so sankamundoan ya empiryo na palson relihyon, tan say Panarian na Dios so akaparaan lan maneral ed amin a gobierno ed dalin. (Dan. 2:44; Apo. 11:15; 17:16) Kanian, inkaganatan la so pamidbir na saray totoo ed Ari na Dios a manguuley la natan, say ipaway da ed Babilonia a Baleg, tan itawag da ed ngaran nen Jehova tekep na pananisia. (Sal. 2:11, 12; Roma 10:13; Apo. 18:4) Komon ta pasyaen tayoy mibiang ed pananginabang ed arum na say edukasyon a mangitonton ed bilay.